“ஆட்டத்திற்கு ஏத்த கூலி.. கூலிக்கு ஏத்த ஆட்டம்..” - இயக்குநர் லெனின் பாரதி காட்டம்

தேர்தல் பத்திரம் திட்டத்தில் வெளிப்படைத்தன்மை இல்லை என எதிர்க்கட்சிகள் குற்றம்சாட்டி வழக்கு தொடர்ந்தது. இந்த வழக்கில் உச்சநீதிமன்றம் தேர்தல் பத்திரம் தொடர்பான தகவலை இந்திய தேர்தல் ஆணையத்திடம் பாரத் ஸ்டேட் வங்கி அளிக்க வேண்டும் என உத்தரவிட்டிருந்தது. அதனை தொடர்ந்து எஸ்பிஐ வங்கி தரப்பில் நேரம் கேட்கப்பட்டிருந்த நிலையில், அதற்கு கண்டனம் தெரிவித்த உச்சநீதிமன்றம் தேதியை நிர்ணயித்து தேர்தல் பத்திரங்கள் தொடர்பான தகவல்களை இந்திய தேர்தல் ஆணையத்திலும் ஒப்படைக்க உத்தரவிட்டிருந்தது.

அதனைத் தொடர்ந்து எஸ்பிஐ வங்கி நாடு முழுவதும் 2019 ஆம் ஆண்டு முதல் 2024 ஆம் ஆண்டு வரை 22,217 தேர்தல் பத்திரங்கள் விற்கப்பட்டுள்ளதாக உச்சநீதிமன்றத்தில் நேற்று பிரமாண பத்திரம் தாக்கல் செய்திருந்தது. மேலும் தேர்தல் பத்திரங்களை வாங்கியவர்கள், வாங்கிய தேதி வாங்கிய தொகை ஆகியவை விவரங்களாக தேர்தல் ஆணையத்தில் பட்டியலிடப்பட்டுள்ளதாகவும் அவை அனைத்தும் பென்டிரைவ் வடிவில் அளிக்கப்பட்டுள்ளதாகவும் எஸ்பிஐ வங்கி தரப்பில் தெரிவிக்கப்பட்டிருந்தது.

இந்தநிலையில் தேர்தல் பத்திரம் மூலமாக அரசியல் கட்சிகளுக்கு கொடுக்கப்பட்ட நன்கொடைகள் குறித்த தகவல்கள் வெளியாகி உள்ளது. இந்திய தேர்தல் ஆணையம் இது தொடர்பான விவரங்களை இணையத்தில் பதிவேற்றம் செய்துள்ளது. அதில் அதிகபட்சமாக நாட்டிலேயே அதிக நன்கொடை பெற்ற கட்சியாக பாஜக முதலிடத்திலும் திரிணாமுல் காங்கிரஸ் இரண்டாவது இடத்திலும் உள்ளன. தேர்தல் பத்திரம் மூலம் பாஜக 6,060 கோடி ரூபாய் நன்கொடையாக பெற்றுள்ளது. பாஜகவிற்கு அடுத்தபடியாக திரிணாமுல் காங்கிரஸ் கட்சி 1,609 கோடி ரூபாய் நன்கொடை பெற்றுள்ளது. மூன்றாவது இடத்தில் உள்ள காங்கிரஸ் கட்சி 1,421 கோடி ரூபாயும், பிஆர்எஸ் கட்சி 1,214 கோடியும் நன்கொடை பெற்றுள்ளன. திமுக 617 கோடி ரூபாய்யும் பெற்றுள்ளது. தேர்தல் பத்திரம் குறித்த தகவல் வெளியான நிலையில் இந்திய அளவில் பேசு பொருளாக மாறியுள்ளது.

இந்த நிலையில் இயக்குநர் லெனின் பாரதி வெளியிட்டுள்ள சமூக வலைத்தள பதிவில், “தேசிய ஆட்டக்கார கோஷ்டிக்கு ஆறாயிரத்தி சில்லரை கோடி.. மாநில ஆட்டக்கார கோஷ்டிக்கு அறனூத்தி சில்லரை கோடி… இதர ஆட்டக்கார கோஷ்டிகளுக்கும் கோடிகளென… ஆட்டத்திற்கு ஏத்த கூலி.. கூலிக்கு ஏத்த ஆட்டம்… மக்களுக்கு ஊஊஊ…” என்று குறிப்பிட்டுள்ளார்.

தேசிய ஆட்டக்கார கோஷ்டிக்கு ஆறாயிரத்தி சில்லரை கோடி.. மாநில ஆட்டக்கார கோஷ்டிக்கு அறனூத்தி சில்லரை கோடி… இதர ஆட்டக்கார கோஷ்டிகளுக்கும் கோடிகளென… ஆட்டத்திற்கு ஏத்த கூலி.. கூலிக்கு ஏத்த ஆட்டம்… மக்களுக்கு ஊஊஊ… 🐚🐚🐚 #ElectoralBondScam #தேர்தல்_பத்திர_ஊழல்#கேலிக்கூத்து_ஜனநாயகம் pic.twitter.com/jaY2F22WQE

 

— leninbharathi (@leninbharathi1) March 15, 2024