Skip to main content

வாய் பேச இயலாத, காது கேட்காத மாற்றுத்திறனாளி கல்லால் தாக்கி கொலை!

Published on 06/10/2021 | Edited on 06/10/2021

 

salem district incident police investigation

 

சேலம் அருகே, வாய் பேச இயலாத, காது கேட்காத மாற்றுத்திறனாளியை மர்ம நபர்கள் கல்லால் தாக்கியும், மது பாட்டிலால் குத்தியும் கொலை செய்த சம்பவம் பரபரப்பை ஏற்படுத்தியுள்ளது.

 

சேலம் மாவட்டம் அயோத்தியாப்பட்டணம் அருகே உள்ள அ.நாட்டாமங்கலம் வள்ளுவர் நகரைச் சேர்ந்தவர் கோடி. இவருடைய மனைவி சாந்தி. இவர்களுக்கு மூன்று மகன்களும், மூன்று மகள்களும் உள்ளனர். 

 

இவர்களுடைய இரண்டாவது மகன் மணி (எ) மணிகண்டன் (வயது 30). கட்டடத் தொழிலாளி. பிறவியிலேயே வாய் பேச இயலாத, காது கேட்காத  மாற்றுத்திறனாளி. 

 

கடந்த திங்கள்கிழமை (04.10.2021) இரவு 10.00 மணியளவில், வீட்டிலிருந்து வெளியே சென்ற மணிகண்டன் அதன்பிறகு வீடு திரும்பவில்லை. இந்நிலையில் செவ்வாய்க்கிழமை காலை, காரிப்பட்டி பிரிவு சாலை அருகே உள்ள கரட்டில் நிர்வாண நிலையில் மணிகண்டன் சடலமாகக் கிடப்பது குறித்து காரிப்பட்டி காவல் நிலையத்திற்குத் தகவல் கிடைத்தது. 

 

சடலத்தைக் கைப்பற்றிய காவல்துறையினர், உடற்கூராய்வுக்காக சேலம் அரசு மருத்துவமனைக்கு அனுப்பிவைத்தனர். மர்ம நபர்கள் மணிகண்டனை தலையில் கல்லால் தாக்கி கொலை செய்திருப்பது தெரியவந்தது. அவருடைய வயிற்றில் மது பாட்டிலால் குத்தப்பட்ட காயங்களும் இருந்தன. அதனால் மது குடிக்கும்போது ஏற்பட்ட தகராறில் தெரிந்த நபர்களே மணிகண்டனை தாக்கிக் கொலை செய்திருக்கலாம் என சந்தேகிக்கப்படுகிறது. வாய் பேச இயலாத, காது கேட்காத மாற்றுத்திறனாளி என்பதால் மணிகண்டனால் கத்திக் கூச்சலும் போட முடியாமல் தடுமாறி இருக்கிறார்.

 

சேலம் மாவட்ட எஸ்.பி. ஸ்ரீஅபிநவ் நேரில் சென்று பார்வையிட்டார். காரிப்பட்டி காவல் ஆய்வாளர் செந்தில்குமார் தலைமையில் கொலையாளிகளைப் பிடிக்க தனிப்படை அமைத்து உத்தரவிட்டார். 

 

விசாரணையில், கொலையுண்ட மணிகண்டன் அக். 3ஆம் தேதி இரவு வீட்டிலிருந்து வெளியே கிளம்பிச் சென்றுள்ளார். உள்ளூரைச் சேர்ந்த இரண்டு நண்பர்களுடன் அவர் சென்றிருப்பது தெரியவந்துள்ளது. அந்த இருவரின் வீடுகளிலும் காவல்துறையினர் சென்று விசாரித்தபோது, இருவரும் திடீரென்று தலைமறைவாகி இருப்பது தெரியவந்தது. 

 

தீவிர தேடுதலுக்குப் பிறகு, அவர்களில் ஒருவரைப் பிடித்துவிட்டனர். வாழப்பாடி டி.எஸ்.பி. முத்துசாமி, ஆய்வாளர் செந்தில்குமார் ஆகியோர் தீவிர விசாரணை நடத்தினர்.  

 

விசாரணையில் பிடிபட்ட நபரும், ஏற்கனவே ஒரு கொலை வழக்கில் சிக்கிய வாழப்பாடியைச் சேர்ந்த மற்றொரு நபரும் சேர்ந்துதான் மணிகண்டனை தீர்த்துக் கட்டியிருப்பது தெரியவந்துள்ளது. அவரையும் தேடிவருகின்றனர். அவரும் பிடிபட்டால்தான், கொலைக்கான முழு காரணமும் தெரியவரும். இச்சம்பவம் அப்பகுதியில் பரபரப்பை ஏற்படுத்தியுள்ளது.

 

 

சார்ந்த செய்திகள்

Next Story

பட்டப்பகலில் வீடு புகுந்து படுகொலை; 6 மணி நேரத்தில் பிடிபட்ட குற்றவாளி

Published on 29/03/2024 | Edited on 29/03/2024
Cruelty to a woman in broad daylight; Criminal caught in 6 hours

திருவள்ளூர் மாவட்டம் பொன்னேரியில் வீட்டில் தனியாக இருந்த பெண் ஒருவர் சரமாரியாக வெட்டிக் கொலை செய்யப்பட்ட சம்பவம் பரபரப்பை ஏற்படுத்திய நிலையில், இந்த வழக்கில் 6 மணி நேரத்தில் குற்றவாளியை போலீசார் கைது செய்துள்ளனர்.

திருவள்ளூர் மாவட்டம் பொன்னேரி பகுதியைச் சேர்ந்தவர் குமார். ஓய்வு பெற்ற மின்வாரிய ஊழியரான இவர் நேற்று வெளியே சென்றுவிட்டு வீடு திரும்பியுள்ளார். அப்போது வீட்டின் ஹாலில் அவருடைய மனைவி சரஸ்வதி வெட்டுக் காயங்களுடன் ரத்த வெள்ளத்தில் கிடந்தார். இதனைக் கண்டு அதிர்ச்சியடைந்த குமார் கூச்சலிட்டுள்ளார். அக்கம் பக்கத்தில் இருந்தவர்கள் ஓடி வந்து பார்த்து போலீசாருக்கு தகவல் கொடுத்தனர்.

தகவலறிந்து உடனடியாக சம்பவம் நடந்த இடத்திற்கு வந்த போலீசார், ரத்த வெள்ளத்தில் உயிரிழந்து கிடந்த சரஸ்வதியின் உடலைப் பிரேதப் பரிசோதனைக்காக அனுப்பி வைத்தனர். மர்ம நபர்கள் சரஸ்வதியை வெட்டிப் படுகொலை செய்துவிட்டு அவர் கழுத்தில் இருந்த தங்க நகையைப் பறித்துச் சென்றது விசாரணையில் தெரியவந்தது. இருப்பினும் இந்த கொலை, நகைக்காக நடந்ததா அல்லது வேறு ஏதேனும் முன் விரோதப் பிரச்சனை காரணமாக நிகழ்ந்ததா என்பது தொடர்பாக விசாரணை நடத்தி வருகின்றனர். பட்டப்பகலில் பெண் படுகொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தியது.

Cruelty to a woman in broad daylight; Criminal caught in 6 hours

இந்த சம்பவத்தில் போலீசார் விசாரணை மேற்கொண்டு வந்த நிலையில், உயிரிழந்த பெண்ணின் சகோதரி மகனே கொலையில் ஈடுபட்டது தெரியவந்தது. பணம் கேட்டுத் தராததால் ஆத்திரத்தில் இருந்த சரஸ்வதியின் சகோதரி மகன் அசோக் குமார், வீட்டில் சரஸ்வதி தனியாக இருந்த பொழுது கத்தியால் குத்திக் கொலை செய்தது தெரியவந்தது.

Next Story

யோகா மாஸ்டர் அடித்து கொலை; விசாரணையில் பகீர்!

Published on 23/03/2024 | Edited on 23/03/2024
Transgressive yoga master beaten to ; Body recovery in a ruined well

கராத்தே மாஸ்டர் காணாமல் போன சம்பவத்தில், கொலை செய்யப்பட்டு கிணற்றில் வீசப்பட்டது  சென்னையில் பரபரப்பை ஏற்படுத்தி இருக்கிறது.

சென்னை கிழக்கு கடற்கரை சாலை பகுதியிலுள்ள கானத்தூர் ரெட்டி குப்பம் பகுதியைச் சேர்ந்தவர் லோகநாதன். இவர் அந்த பகுதியில் பள்ளி மாணவர்களுக்கு கராத்தே மாஸ்டராகவும், யோகா மாஸ்டராகவும் பணியாற்றி வந்தார். இவரிடம் பல்வேறு குழந்தைகள் கராத்தே மற்றும் யோகா பயிற்சிகள் எடுத்து வந்த நிலையில் கராத்தே மாஸ்டர் லோகநாதனை கடந்த 13ஆம் தேதியிலிருந்து காணவில்லை என அவரது மகன் காவல் நிலையத்தில் புகார் அளித்தார்.

புகாரின் அடிப்படையில் போலீசார் விசாரணை நடத்தி வந்ததோடு காணாமல்போன லோகநாதன் தேடி வந்தனர். லோகநாதன் வைத்திருந்த செல்போனில் அவருடன் இறுதியாக பேசியது யார் என்பது தொடர்பாக போலீசார் விசாரணை செய்தனர். விசாரணையில் ஓஎம்ஆர் சாலையில் உள்ள நாவலூர் காரனை பகுதியைச் சேர்ந்த சுரேஷ் -கஸ்தூரி தம்பதியிடம் செல்போனில் பேசியது தெரியவந்தது.

சந்தேகத்தின் அடிப்படையில் இரண்டு பேரையும் காவல் நிலையத்திற்கு வரவழைத்து விசாரித்த விசாரித்தபோது யோகா மாஸ்டர் லோகநாதன் அடித்துக் கொலை செய்யப்பட்ட பகீர் தகவல் வெளிவந்தது. செம்மஞ்சேரி பூங்காவில் வைத்து லோகநாதன் பள்ளி மாணவ மாணவிகளுக்கு கராத்தே, யோகா பயிற்சிகளை  கொடுத்து வந்த நிலையில் சுரேஷ்-கஸ்தூரி தம்பதியின் 11 வயது மகன் லோகநாதனிடம் பயிற்சிக்காக சேர்க்கப்பட்டு பயிற்சி எடுத்து வந்தான். அதே நேரம் கஸ்தூரியும் அவரிடம் யோகா பயிற்சி மேற்கொண்டு வந்துள்ளார்.

Transgressive yoga master beaten to ; Body recovery in a ruined well

இந்நிலையில் கஸ்தூரியிடம் லோகநாதன் பாலியல் ரீதியாக தொல்லையில் ஈடுபட்டதாக தெரிகிறது. இதனால் லோகநாதனின் பயிற்சி வகுப்புக்கு செல்வதை கஸ்தூரி தவிர்த்து வந்துள்ளார். ஆனால் இருப்பினும் மொபைல் மூலம் கஸ்தூரியை தொடர்பு கொண்ட லோகநாதன் யோகா வகுப்புக்கு வரும்படி தொடர்ந்து வற்புறுத்தியுள்ளார். இதனால் ஆத்திரமடைந்த கஸ்தூரி இதுகுறித்து கணவரிடம் தெரிவிக்க இருவரும் சேர்ந்து கராத்தே மாஸ்டர் லோகநாதன் கொலை செய்ய திட்டமிட்டனர்.

அவரை மொபைல் மூலம் தொடர்புகொண்டு காரனை பகுதிக்கு வரவழைத்து அடித்து கொலை செய்ததோடு அங்குள்ள பாழடைந்த கிணற்றில் உடலை வீசிவிட்டுச் சென்றது போலீசார் விசாரணையில் தெரியவந்தது. உடனடியாக சம்பவ இடத்திற்கு சென்ற போலீசார் கிணற்றில் இருந்த லோகநாதனின் உடலை கயிறு மூலம் கட்டி வெளியே கொண்டு வந்தனர். யோகா மாஸ்டர் அடித்து கொலை செய்யப்பட்டு கிணற்றில் வீசப்பட்ட சம்பவம் அங்கு பரபரப்பை ஏற்படுத்தி இருக்கிறது.