தலைமை நீதிபதி சஞ்ஜிப் பானர்ஜி மேகாலயாவுக்கு மாற்ற பரிந்துரை!

நடப்பாண்டில் கடந்த செப்டம்பர் மாதம் 16- ஆம் தேதி அன்று உச்சநீதிமன்றத்தின் கொலிஜியத்தின் கூட்டம் நடைபெற்றது. இக்கூட்டத்தில் எடுக்கப்பட்ட முடிவின் படி, தற்போது சென்னை உயர்நீதிமன்றத்தின் தலைமை நீதிபதியாக உள்ள சஞ்ஜிப் பானர்ஜியை, மேகாலயா உயர்நீதிமன்றத்திற்கு மாற்ற பரிந்துரை செய்துள்ளது. 

அதேபோல், மேகாலயா உயர்நீதிமன்றத்தின் நீதிபதி முனீஸ்வர் நாத் பண்டாரியை சென்னை உயர்நீதிமன்றத்தின் நீதிபதியாகப் பணியிட மாற்றம் செய்து கொலிஜியம் பரிந்துரை செய்துள்ளது. 

உச்சநீதிமன்றத்தின் கொலிஜியத்தின் பரிந்துரையானது குடியரசுத்தலைவருக்கு அனுப்பப்பட்டுள்ள நிலையில், நீதிபதிகளின் பணியிட மாற்றம் குறித்து அறிவிப்பை, குடியரசுத்தலைவர் விரைவில் வெளியிடும் என்று எதிர்பார்க்கப்படுகிறது.