Skip to main content

ஓட்டுக்கு டோக்கன் வழங்கும் பாஜக.. ஏமாந்த அதிமுக பிரமுகர்..!

Published on 05/04/2021 | Edited on 05/04/2021

 

BJP thiruvannamalai issue

 

திருவண்ணாமலை சட்டமன்றத் தொகுதி, அதிமுக கூட்டணியில் உள்ள பாஜகவுக்கு ஒதுக்கப்பட்டது. அதனைத் தொடர்ந்து இத்தொகுதியில் திமுக பாஜக நேரடியாகக் களம் காண்கிறது. இதில், திமுக சார்பில் வாக்காளருக்கு 500 ரூபாய் வழங்கப்பட்டுவிட்டது.

 

பாஜக சார்பில் எவ்வளவு தருவார்கள் எனப் பலரும் எதிர்பார்த்துக் காத்திருந்தனர். ஒரு ஓட்டுக்கு இரண்டாயிரம் ரூபாய், ஆயிரம் தருவார்கள் எனச் சொல்லப்பட்டது. ஆனால் எதுவும் தரப்படவில்லை. இந்நிலையில், ஏப்ரல் 5ம் தேதி, ‘க்யூ.ஆர் கோட்’ அச்சடிக்கப்பட்ட டோக்கன் கட்டுகளை அதிமுக நிர்வாகிகளிடம் பாஜக சார்பில் தந்து, ‘ஒரு குடும்ப அட்டைக்கு ஒரு டோக்கன் எனத் தாங்க’ எனச் சொல்லியுள்ளனர். ‘டோக்கன் எல்லாம் நாங்கப்போய் தரமுடியாது, ஆர்.கே.நகரில் 20 ரூபாய் டோக்கன் தந்து என்ன ஆச்சுன்னு ஊருக்கே தெரியும். நாங்க ரிஸ்க் எடுக்கவிரும்பல. பணம் தர்றதாயிருந்தா தாங்க; கொண்டு போய்த் தர்றோம்’ எனச்சொல்லி அதிமுக பூத் கமிட்டியினர் ஒதுங்கிக் கொண்டதாகக் கூறப்படுகிறது.

 

வீடு வீடாகச் சென்ற பாஜகவினர், 4 வாக்குகள் கொண்ட ஒரு குடும்ப அட்டைக்கு க்யூ.ஆர் கோட் மற்றும் சீரியல் எண் அச்சடிக்கப்பட்ட ஒரு டோக்கன் வழங்கியுள்ளனர். இந்த டோக்கனை கொண்டு சென்று திருவண்ணாமலையில் உள்ள மிகப்பிரபலமான நகைக்கடையில் தந்தால் நான்கு கிராம் தங்கக் காயின் வழங்கப்படும் எனச் சொல்லி ஆச்சர்யத்தை ஏற்படுத்தியுள்ளனர்.

 

டோக்கன் வாங்கிய அதிமுக பிரமுகர் ஒருவர், தி.மலையில் உள்ள பிரபலமான அந்த நகைக் கடைக்குச் சென்று டோக்கனை தந்தபோது, அங்கிருந்த மேலாளர் இது என்ன எனக் கேட்டுள்ளார். இந்த டோக்கனை காட்டினால் நான்கு கிராம் தங்கக் காயின் வழங்குவீர்கள் எனச் சொல்லி தந்தார்கள், அதனால் வந்தேன் எனக் கூறியுள்ளார். அதனைக் கேட்டு அதிர்ச்சியான அந்த அந்த நகைக் கடை மேலாளர், அதெல்லாம் ஒன்றும் இல்லை வெளியே போங்கள் எனக்கூற வெளியே வந்துள்ளார்.

 

இதுகுறித்து, பாஜக வேட்பாளருக்கு நெருக்கமான வட்டாரத்தில் கேட்டபோது, ‘மே 3 ஆம் தேதி அந்த கடைக்குச் சென்று டோக்கன் தந்தால் தான், 4 கிராம் தங்க நகை அல்லது அதற்கு ஈடாகப் பணம் தருவார்கள். இப்போது, போய் தந்தால் தரமாட்டார்கள். வெற்றியோ, தோல்வியோ எதுவந்தாலும் டோக்கனுக்கு பொருளோ அல்லது பணமோ நிச்சயம் தருவோம்’ என்றார்கள். மே 3ஆம் தேதி தருவதை இப்போதே தரலாமே எனக் கேட்டபோது, அதற்குப் பதில் சொல்ல மறுத்துவிட்டார்கள். 4 கிராம் தங்கக் காயின் என்றால் அதன் மதிப்பு சராசரியாக 18 ஆயிரம். அப்படியாயின் ஒரு ஓட்டின் மதிப்பு 4,500 ரூபாயா?


 

 

சார்ந்த செய்திகள்

Next Story

பிரதமர் மோடிக்கு தேர்தல் ஆணையம் நோட்டீஸ்!

Published on 25/04/2024 | Edited on 25/04/2024
Election Commission notice to Prime Minister Modi

ராஜஸ்தான் மாநிலம் பன்ஸ்வாரா பரப்புரையில் பேசிய பிரதமர் மோடி, ''நாட்டின் சொத்தில் இஸ்லாமியர்களுக்கே முதல் அதிகாரம் என்று காங்கிரஸ் ஆட்சியில் சொன்னார்கள். இதனால் இந்துக்களின் சொத்துகள் போகிறது. இந்துக்களின் பணத்தை எடுத்து இஸ்லாமியர்களுக்கு கொடுக்க நினைக்கிறது காங்கிரஸ். இதன் பொருள் அவர்கள் இந்தச் செல்வத்தை அதிக குழந்தைகளைப் பெற்றவர்களுக்கும், ஊடுருவல்காரர்களுக்கும் பகிர்ந்தளிப்பார்கள்.

நீங்கள் கஷ்டப்பட்டு சம்பாதித்த பணம் ஊடுருவல்காரர்களுக்கு செல்ல வேண்டுமா? இதை நீங்கள் அங்கீகரிக்கிறீர்களா? பெண்கள் வைத்திருக்கும் தங்கத்தைக் கணக்கிட்டு, அந்தச் செல்வத்தை பங்கீடு செய்வோம் என்று காங்கிரஸின் தேர்தல் அறிக்கை கூறுகிறது. மன்மோகன் சிங் தலைமையிலான அரசு, முஸ்லீம்களுக்கு செல்வத்தில் முதல் உரிமை உண்டு என்று கூறியது. இந்த நகர்ப்புற நக்சல் சிந்தனை என் தாய்மார்கள் மற்றும் சகோதரிகளின் மாங்கல்யத்தைக் கூட விட்டுவைக்காது.." எனச் சர்ச்சையாக பேசினார். இஸ்லாமியர்கள் ஊடுருவல்காரர்கள் என நாட்டின் பிரதமர் மோடி பேசிய பேச்சுக்கு நாடு முழுவதும் பலத்த கண்டனம் எழுந்து வருகிறது.

முன்னதாக பிரதமர் மோடியின் இத்தகைய வெறுப்பு பேச்சுக்கு தேர்தல் ஆணையம் உரிய நடவடிக்கை எடுக்க வேண்டும் எனக் காங்கிரஸ் கட்சியின் மூத்த தலைவர்கள் அபிஷேக் மனு சிங்வி, சல்மான் குர்ஷித், குர்தீப் சத்பால் ஆகியோர் தேர்தல் ஆணையத்திற்கு நேரில் சென்று புகார் மனு அளித்திருந்தனர். அந்த மனுவில், ‘சமூகங்களுக்கு இடையே வெறுப்பை பரப்பும் வகையில் பேசிவரும் பிரதமர் மோடி மீது நடவடிக்கை எடுக்க வேண்டும்’ என குறிப்பிடப்பட்டிருந்தது.

இந்நிலையில் தேர்தல் பரப்புரையில் மதத்தை தொடர்புபடுத்தி பேசியதாக பிரதமர் மோடிக்கு மக்கள் பிரதிநிதித்துவச் சட்டத்தின் பிரிவு 77 கீழ் தேர்தல் ஆணையம் நோட்டீஸ் அனுப்பியுள்ளது. அதாவது பாஜக தலைவர் ஜேபி நட்டாவிற்கு அனுப்பட்டுள்ள இந்த நோட்டீஸில் வரும் 29 ஆம் தேதி காலை 11 மணிக்குள் தேர்தல் ஆணையம் பதிலளிக்க உத்தரவிடப்பட்டுளது. அதே போன்று பாஜக அளித்த புகாரில் காங்கிரஸ் எம்.பி. ராகுல்காந்திக்கும் தேர்தல் ஆணையம் நோட்டீஸ் அனுப்பியுள்ளது. மேலும் அரசியல் கட்சிகள் தங்கள் வேட்பாளர்கள், குறிப்பாக நட்சத்திர பேச்சாளர்களின் பேச்சு அதிக பொறுப்புடன் இருக்க வேண்டும். உயர் பதவிகளில் இருப்பவர்களின் பிரச்சார உரைகள் மிகவும் கடுமையான விளைவுகளை ஏற்படுத்தும் என்று தேர்தல் ஆணையம் தெரிவித்துள்ளது. 

Next Story

“ரூ.4 கோடிக்கும் எனக்கும் சம்பந்தம் இல்லை” - நயினார் நாகேந்திரன்!

Published on 25/04/2024 | Edited on 25/04/2024
I have nothing to do with Rs. 4 crore Nayanar Nagendran

சென்னை எழும்பூர் ரயில் நிலையத்தில் இருந்து திருநெல்வேலிக்கு செல்லும் ரயிலில் தாம்பரம் ரயில் நிலையத்தில் கடந்த 6 ஆம் தேதி (06.04.2024) இரவு உரிய ஆவணங்களின்றி கொண்டு செல்ல முயன்றதாக சுமார் ரூ. 4 கோடி மதிப்பிலான ரொக்கம் பறக்கும் படையினரால் பறிமுதல் செய்யப்பட்டது. இதனையடுத்து இந்தப் பணத்தை எடுத்து வந்த புரசைவாக்கம் தனியார் விடுதி மேலாளரும் பாஜக உறுப்பினருமான சதீஷ், அவரின் சகோதரர் நவீன் மற்றும் லாரி ஓட்டுநர் பெருமாள் ஆகிய 3 பேரும் கைது செய்யப்பட்டனர். அப்போது திருநெல்வேலி மக்களவைத் தொகுதி பாஜக வேட்பாளர் நயினார் நாகேந்திரனுக்கு, இந்த பணத்தைக் கொண்டு செல்ல முயன்றதாக மூவரும் வாக்குமூலம் கொடுத்ததாகத் தகவல் வெளியாகி இருந்தது.

இந்தச் சம்பவம் தொடர்பாக நயினார் நாகேந்திரன் ஆஜராகி பதிலளிக்கும்படி காவல்துறை தரப்பில் சம்மன் அனுப்பப்பட்டிருந்தது. ஆனால் நயினார் நாகேந்திரன் விசாரணைக்கு ஆஜராகாத நிலையில் விசாரணைக்கு ஆஜராக பத்து நாட்கள் அவகாசம் வேண்டும் என நயினார் நாகேந்திரன் தரப்பில் காவல்துறைக்கு பதில் கடிதம் கொடுக்கப்பட்டிருந்தது. அதேசமயம் இந்த பணத்தை நயினார் நாகேந்திரன் உறவினர் முருகன், இவரின் நண்பர்களான ஆசைத்தம்பி, ஜெய்சங்கர் ஆகிய 3 மூவரும் கொடுத்து அனுப்பியதாக தெரிவித்திருந்தனர். இதனடிப்படையில் போலீசார் முருகன், ஆசைத்தம்பி, ஜெய்சங்கர் ஆகியோருக்கு சம்மன் அனுப்பி இருந்தனர். இதனையடுத்து இவர்கள் நேற்று முன்தினம் (23.04.2024) தாம்பரம் காவல் நிலையத்தில் நேரில் ஆஜராகி இருந்தனர்.

அப்போது நயினார் நாகேந்திரன் உறவினர் முருகன் காவல்துறையில் அளித்த வாக்குமூலத்தில், “தனக்கும் கைப்பற்றப்பட்ட பணத்திற்கும் எவ்வித சம்பந்தம் இல்லை. நயினார் நாகேந்திரன் உதவியாளர் மணிகண்டன் 3 நபர்கள் பணம் கொண்டு வருகிறார்கள். எனவே இவர்களின் பாதுகாப்பிற்காக இருவரை அனுப்ப கேட்டுக்கொண்டதால் தான் தன்னிடம் வேலை பார்க்கும் ஆசைத்தம்பி, ஜெய்சங்கர் என இருவரை அனுப்பி வைத்தேன். சென்னையில் 4 ஹோட்டல்களை வாடகைக்கு எடுத்து நடத்தி வருகிறேன். அதில் ஆசைத்தம்பி, ஜெய்சங்கர் இருவரும் பணியாற்றி வருகின்றனர்” என தெரிவித்துள்ளார். இந்த வாக்குமூலத்தின் அடிப்படையில் நயினார் நாகேந்திரன், மணிகண்டனுக்கு காவல் துறை சார்பில் சம்மன் அனுப்பப்பட்டதாக தகவல் வெளியாகி இருந்தது.

இந்நிலையில் சென்னை தியாகராயர் நகரில் நயினார் நாகேந்திரன் செய்தியாளர்களைச் சந்தித்தார். அப்போது அவர் பேசுகையில், “இந்த விவகாரத்தில் முழுக்க முழுக்க என்னை டார்கெட் செய்கின்றனர். இது ஒரு அரசியல் சூழ்ச்சி ஆகும். ரூ.4 கோடியை எங்கேயோ பிடித்துவிட்டு என் பெயரையும் சேர்த்து பயன்படுத்துகின்றனர். தமிழகத்தில் சுமார் 200 கோடிக்கும் மேல் பணம் பறிமுதல் செய்யப்பட்ட நிலையில் ரூ. 4 கோடி பறிமுதல் செய்யப்பட்டது குறித்து விசாரிக்கின்றனர். கைப்பற்றப்பட்ட இந்த பணத்திற்கும் எனக்கும் சம்பந்தம் இல்லை. தாம்பரம் காவல் நிலையத்தில் மே 2 ஆம் தேதி விசாரணைக்கு ஆஜராக உள்ளேன்” எனத் தெரிவித்தார்.