Skip to main content

இளம்பெண் ஈவ்டீசிங்! -சிக்கும் டிக்டோக் வில்லன்கள்!

Published on 12/02/2019 | Edited on 12/02/2019
TikTok


‘குட்டி சொர்ணாக்கா’ என்கிற பெயரில் டப்ஸ்மாஷ்… டிக் டோக் மூலம் இளம்பெண்ணை ஈவ்டீசிங் செய்யும் வீடியோக்கள் சமூக வலைதளங்களில் பரவி கடும் சர்ச்சையை உருவாக்கிக்கொண்டிருக்கிறது. இதுகுறித்து, விசாரிக்க ஆரம்பித்தபோதுதான் சினிமா ஆசையில் பெற்ற தாயே வீடியோக்களை பரப்பி வருவதாக குற்றச்சாட்டு கிளம்பியிருக்கிறது.
 

சர்ச்சைக்குரிய வீடியோக்களை பார்த்த மாற்றுத்திறனாளிகளுக்கான டிசம்பர்-3 இயக்கத்தின் தலைவரும் பேராசிரியருமான தீபக்நாதன் நம்மிடம், “ஒரு மாற்றுத்திறனாளி இளம்பெண்ணை சுற்றி இளைஞர்கள் சூழ்ந்துகொண்டு கல்யாணம் பண்ணிக்கிறீயா? என்றெல்லாம் கேலி செய்தும்… கழுத்தை நெறித்தும்… சீண்டியும் கோபத்தை வரவழைத்து அவள் கதறும் வீடியோக்களை எடுத்து டப்ஸ்மாஷ்… டிக்டோக் மூலம் பரப்புகிறார்கள் என்றால் எவ்வளவு கொடூரமான மனநிலைகொண்டவர்களாக இருப்பார்கள். 


 

TikTok

                                                                                 தீபக்நாதன்


இப்படி பரப்பிய இளைஞர்களைவிட, இந்த வீடியோவை  ரசிக்கிறவர்களுக்குத்தான் வக்கிரப்புத்தி அதிகமாகிவிட்டது என்று தோன்றுகிறது. குழந்தைமாதிரி இருக்கும் இந்த பெண் பேசும் வீடியோக்களைப் பார்க்கும் குழந்தைகளும் இதேபோல்தானே பேசும்? ஏற்கனவே, சினிமாக்களில் உயரம் குறைவானவர்களை இழிவுபடுத்திக்கொண்டிருக்கும் சூழலில் இப்படியொரு வீடியோ இன்னும் இழிவுபடுத்துகிறது. 
 

இதன்மூலம், உயரம் குறைவானர்களை இன்னும் சிறுமைபடுத்துகிறார்கள் என்றுதான் அர்த்தம். உடல் வளர்ச்சி இல்லாமல் இப்படியிருக்கும் அப்பெண்ணுக்கு சொர்ணாக்கா என்று பெயர் வைத்து வீடியோக்கள் வெளியிடுவதே அப்பெண்ணுக்கு எதிரான குற்றம்தான். இப்படி, மாற்றுத்திறனாளிகளை வைத்து எள்ளி நகையாடும் வீடியோக்களை வெளியிடுபவர்கள்மீது சட்டரீதியான நடவடிக்கைகள் எடுக்கப்படவேண்டும். அதுவும், அந்த இளம்பெண்ணை துன்புறுத்தி வீடியோக்கள் எடுப்பது மிகவும் தவறு” என்று கடும் கண்டனம் தெரிவித்தார்.

 

TikTok



இதுகுறித்து, பிரபல உளவியல் நிபுணர் டாக்டர் நப்பின்னைசேரன் நம்மிடம், “ஒவ்வொருவரும் சமூகத்தில் ஏதோ ஒரு ஐடிண்டிட்டியை தேடுகிறார்கள். அதனால்தான், தங்களது திறமைகளை ஏதோ ஒருவழியில் வெளிப்படுத்துகிறார்கள். அதனால், டப்ஸ்மாஷ்… டிக் டோக் செயலிகள் மூலம் நடிப்பது… ஆடுவது… பாடுவது என தங்களின் திறமைகளை வெளிப்படுத்துவதில் எந்த தவறும் இல்லை. கேவலமாக விமர்சித்தாவது நம்மை பலரும் பார்க்கவேண்டும் என்று நினைத்து எல்லை மீறுவதுதான் ஆபத்து. 
 

ஏற்கனவே, மாற்றுத்திறனாளி குழந்தைகள் இரண்டுபேர்  ‘வடிவேலு’ காமெடிக்கு வாய் அசைப்பதுபோலவும் நடிப்பதுபோலவும் வரும் வீடியோக்கள் பலராலும் இரசிக்கப்பட்டுக்கொண்டிருக்கிறது. ஆனால், இந்த மாற்றுத்திறனாளி இளம்பெண்ணின் வீடியோக்களை பார்க்கும்போது ரசிக்கமுடியவில்லை. காரணம், மாற்றுத்திறனாளியாக இருந்தாலும் அவள் ஒரு பெண். அதுவும், 18 வயது பெண் என்கிறார்கள். அப்படிப்பட்ட, ஒரு பெண்ணைச் சுற்றி  இளைஞர்கள் நின்றுகொண்டு அவளிடம் அந்தரங்க கேள்விகளை கேட்பது… கேலி கிண்டல் செய்வதும் என்பது சட்டப்படி குற்றம். அதைவிட குற்றம்… அதை வீடியோ எடுத்து இணையதளங்களில் பரப்புவது. அந்த இளம்பெண்ணின் வீடியோக்களை பார்க்கும்போது அவர் ஏதோ ஒரு மன எழுச்சி நிலையில் இருப்பதுபோலவே தோன்றுகிறது. அவர், உளவியல் ரீதியான பாதிப்புக்குள்ளாகிறாரோ என்ற சந்தேகம் ஏற்படுகிறது. அப்படிப்பட்ட ஒரு பெண்ணைப்பார்த்து,  ‘என்னை கல்யாணம் பண்ணிக்கிறியா? உங்க அக்கா வீட்டுக்காரரு என்ன பண்ணினாரு? உன் மேல கை போட்டுக்கலாமா?’ என்று கேட்டு அவளது உள்ளக்கிளர்ச்சியை தூண்டி அவள் கோபப்படுவதையும் அழுவதையும் ரசிப்பது என்பது மிகப்பெரிய வன்மம்.
 


அந்த இளம்பெண்ணின் வயதுக்கு மீறிய பேச்சை… அதுவும் ஆபாசமான பேச்சுகளையும் அவளுக்கு தெரியாமல் வீடியோ எடுத்து வெளியிட்டவர்கள் கடுமையான தண்டிக்கப்படவேண்டியவர்கள். இப்படி, வீடியோ எடுப்பதை பெற்ற தாயும் கண்டுகொள்ளாமல் இருப்பது அவரது பொறுப்பற்றத் தன்மையை காட்டுகிறது. அந்த பெண்ணுக்கு கவுன்சிலிங் கொடுக்கவேண்டுமோ இல்லையோ இப்படி வீடியோக்கள் வெளியிடுவதை கண்டுகொள்ளாமல் இருக்கும் அப்பெண்ணின் தாய்க்குத்தான்  கவுன்சிலிங் கொடுக்கப்படவேண்டும். யார் யாரெல்லாம் அப்பெண்ணின் வீடியோக்களை எடுத்தார்கள் என்பதை விசாரித்து காவல்துறை கடுமையான நடவடிக்கை எடுக்கவேண்டும். அப்போதுதான், இதுபோன்ற வீடியோக்களை பரப்பாமல் இருப்பார்கள்” என்கிறார் ஆலோசனையாக.
 

இந்த வீடியோவில் இருக்கும் மாற்றுத்திறனாளி இளம்பெண் யார்? என்று நாம் விசாரித்தபோதுதான் இராமநாதபுரம் மாவட்டம் சேதுநகரை சேர்ந்த மஞ்சுளாவின் மகள் என்பது தெரியவந்தது. ஊர் மக்களிடம் விசாரித்தபோது, “ஒரு வயசு புள்ளைய காலிப்பசங்க சுத்தி நின்னு வீடியோ எடுக்கிறானுங்க… அந்த வீடியோக்கள நெட்டுல உடுறானுங்கன்னு அந்த பொண்ணோட அம்மா மஞ்சுளாக்கிட்ட பல பேரு சொல்லிட்டோம். அந்த லேடி கண்டுக்கவே இல்ல. விலங்குகளை வெச்சு வித்த காட்டி பணம் சம்பாதிச்சாலே மனசுக்கு கஷ்டமா இருக்கு. ஆனா, மாற்றுத்திறனாளி புள்ளைய வெச்சு வித்த காட்டி சம்பாதிக்கணும்னு ஆசை வந்துடுச்சு மஞ்சுளாவுக்கு. அதனாலதான், யார் வீடியோ எடுத்தாலும் அதைப்பற்றி பெரிசா எடுத்துக்கிறதில்ல. இந்த, வீடியோக்கள் பரவி யூ- ட்யூப் சேனல்களில் வர ஆரம்பிச்சதும் இதை வெச்சு சினிமா வாய்ப்புகள் தேட ஆரம்பிச்சுட்டாங்க மஞ்சுளா. படத்துல நடிக்கிறதோ தன்னோட திறமையை வெளிப்படுத்துறதோ பிரச்சனையில்ல. ஆனா, அதுக்காக பெத்த புள்ள அதுவும் பொம்பளப்புள்ளைய எவன் வீடியோ எடுத்தாலும் அதை பப்ளிசிட்டியா நினைக்க ஆரம்பிச்சுட்டாங்க இந்த புள்ளையோட அம்மா மஞ்சுளா.  ‘ஏம்மா… இப்படி வீடியோ எடுத்து நெட்டுல விடுறானுங்களே… கண்டிக்கவேண்டிதான?ன்னு ஊர்க்காரங்க சொன்னா, ‘என் புள்ளைய பார்த்துக்க எனக்கு தெரியும். உங்க வேலையைப் பாருங்கன்னு சொல்லிட்டு போறாங்க. இதுக்குமேல, நாம என்ன செய்யமுடியும்?” என்கிறார்கள் வெறுப்புடன்.

 

TikTok

                                                                                   மஞ்சுளா


இதுகுறித்து, பாதிக்கப்பட்ட இளம்பெண்ணின் தாய் மஞ்சுளாவிடம் கேட்டபோது, “யாரு வந்து வீடியோ எடுத்து எதுல போடுறான்னு எனக்கு தெரியமாட்டேங்குது. நான், என்ன செய்றது? என் பொண்ணுக்கு இப்போதான் சினிமாவுல வாய்ப்பு கிடைச்சிருக்கு. அதுக்கு எதுவும் பாதிப்பு வந்துடப்போகுது” என்கிறார்… அப்போதுகூட சினிமா வாய்ப்பு பறிபோய்விடுமோ என்றும் கொஞ்சம்கூட பெற்ற மகளின் மீது அக்கறையில்லாமல்.
 

இதுகுறித்து, ராமநாதபுரம் மகளிர் இன்ஸ்பெக்டர் சுந்தரம்பாளிடம் பேசியபோது, “வீடியோவில் அப்பெண்ணிடம் ஈவ்டீசிங்கில் ஈடுபட்டவர்கள் மீது சட்டரீதியான நடவடிக்கை எடுக்கப்படும். இப்பெண்ணிடம் மட்டுமல்ல. எந்த பெண்ணிடமும் இப்படி கேலி கிண்டல் செய்து வீடியோ எடுத்து வெளியிடுபவர்கள் மீது கடுமையான நடவடிக்கை எடுக்கப்படும்” என்றார் எச்சரிக்கையாக.
 

என்ன விளைவுகளை ஏற்படுத்தினாலும் பரவாயில்லை… எவ்வளவு அசிங்கப்பட்டாலும் அவமானப்பாட்டாலும் பரவாயில்லை. சீரியல், சினிமா வாய்ப்புகள் கிடைக்கவேண்டும்… பணம் சம்பாதிக்கவேண்டும்… பிரபலமாகவேண்டும் என்று நினைப்பவர்கள் இருக்கும்வரை சட்டமன்றத்தில் தீர்மானம் நிறைவேற்றினாலும் இதுபோன்ற செயல்களையும் ‘செயலி’களையும் தடுக்கவே முடியாது. 
 

 

 


 

Next Story

வாட்ஸ்அப்பில் பரவிய வதந்தி; உண்மை கண்டறியும் குழு விளக்கம்!

Published on 26/03/2024 | Edited on 26/03/2024
A rumor spread on WhatsApp; TN Fact Finding Committee Explained

திருவாரூர் மாவட்ட ஆட்சியர் அலுவலகம் அருகே திடீரென பயங்கர வெடிச்சத்தம் மற்றும் நில அதிர்வு ஏற்பட்டதாகவும், இதனால் பொதுமக்கள் மற்றும் அரசு ஊழியர்கள் அச்சமடைந்து ஆட்சியர் அலுவலகத்தில் இருந்து வெளியேறினர் என செய்தி வெளியாகியது. மேலும், விமான விபத்து நடந்ததாக வாட்ஸ்அப் குழுக்களிலும் வதந்தி செய்தி பரவியது. இதனால் திருவாரூர் மற்றும் அதன் சுற்று வட்டாரத்தில் பெரும் பரபரப்பு ஏற்பட்டது.

இந்நிலையில், இது குறித்து தமிழ்நாடு உண்மை கண்டறியும் குழு விளக்கம் அளித்துள்ளது. அதில், “மேற்கண்ட தகவல் பொய்யானது. இந்திய விமானப்படை தஞ்சையில் இருந்து கோடியக்கரை வரை விமான ஒத்திகையை நடத்தியுள்ளது. விமானம் புறப்படும் போது காற்று உயர் அழுத்தத்தில் விடுவிக்கப்படும் (Airlock Release). இதன் காரணமாக ஏற்பட்ட அதிர்ச்சியை நில அதிர்வு எனத் தவறாக பரப்பி வருகின்றனர்.

மேலும் இதுகுறித்த முறையான முன்னறிவிப்பானது விமானப்படை தரப்பில் முன்பே காவல்துறைக்குத் தெரிவிக்கப்பட்டுள்ளது. மேலும், விமான விபத்து நிகழ்ந்ததாகவும் பொய்யான புகைப்படங்களும் பரவி வருகின்றன” எனத் தெரிவிக்கப்பட்டுள்ளது. 

Next Story

மழை பாதிப்பு; உதவிக்கு வாட்ஸ் ஆப் எண் அறிவிப்பு

Published on 18/12/2023 | Edited on 18/12/2023
WhatsApp number to report rain damage; Tamil Nadu Government Notification

கன்னியாகுமரி, திருநெல்வேலி, தூத்துக்குடி, தென்காசி ஆகிய தென் மாவட்டங்களின் பல இடங்களில் கனமழை பொழிந்து வருகிறது. நேற்று முன் தினம் (16-12-23) இரவு முதல் தொடர்ந்து மழை பெய்து வருவதால் தாழ்வான பகுதிகளில் வெள்ள நீர் சூழ்ந்து மக்கள் தவித்து வருகின்றனர். பல்வேறு இடங்களில் போக்குவரத்து சேவையும் பாதிக்கப்பட்டுள்ளது. 

தொடர் கனமழை எதிரொலியாக குடியிருப்பு பகுதிகள், சாலைகள், ரயில் நிலையம் என அனைத்து இடங்களிலும் வெள்ளம் சூழ்ந்துள்ளதால் மக்களின் இயல்பு வாழ்க்கை பாதிக்கப்பட்டுள்ளது. இதனையொட்டி, தூத்துக்குடி, திருநெல்வேலி, விருதுநகர் உள்ளிட்ட 8 மாவட்டங்களில் உள்ள பள்ளி, கல்லூரிகளுக்கு விடுமுறை அறிவிக்கப்பட்டிருந்தது. அதே போல், சென்னையில் இருந்து தென் மாவட்டங்களுக்கு செல்லும் விரைவு ரயில் ரத்து செய்யப்பட்டும், மாற்று பாதையில் இயக்கப்பட்டும் வருகின்றன. மேலும், தூத்துக்குடி, திருநெல்வேலி, கன்னியாகுமரி மற்றும் தென்காசி மாவட்ட மக்களுக்கான அவசர உதவிகளுக்கு உதவி எண்கள் அறிவிக்கப்பட்டுள்ளது. இதனை தொடர்ந்து, தென் மாவட்டங்களில் தொடர் கனமழை காரணமாக தமிழக அரசு சார்பில் பல்வேறு முன்னச்சரிக்கை ஏற்பாடுகளும், மீட்புப்பணிகளும் மேற்கொள்ளப்பட்டு வருவதாக தலைமை செயலாளர் சிவ்தாஸ் மீனா கூறியிருந்தார்.

இந்த நிலையில், மழை பாதிப்பை தெரிவிக்க வாட்ஸ் அப் எண்ணை தமிழக அரசு வெளியிட்டுள்ளது. இது குறித்து வெளியிட்டுள்ள செய்திக்குறிப்பில், ‘கன்னியாகுமரி, திருநெல்வேலி, தூத்துக்குடி, தென்காசி ஆகிய தென்மாவட்டங்களில் கடந்த இரண்டு நாட்களாக கடுமையான மழை பெய்து வருகிறது. இந்த கனமழையால் பாதிக்கப்பட்டுள்ள மக்களுக்கு முன்னெச்சரிக்கை ஏற்பாடுகள் தமிழக அரசு சார்பாக செய்யப்பட்டு வருகிறது. அந்த வகையில், தமிழக அரசின் 8148539914 என்ற வாட்ஸ் அப் எண்ணில் மழை பாதிப்பு, உதவி தேவைகளை மக்கள் தெரிவித்து பயன்பெறலாம். மேலும் @tn_rescuerelief என்ற எக்ஸ் தள பக்கத்திலும் தங்களது குறைகளை தெரியப்படுத்தலாம் என்று அறிவிக்கப்பட்டுள்ளது.