ஓபிஎஸ் வீட்டருகே நடந்த விபத்தில் பிரபல நடிகையின் கணவர் படுகாயம்!

தமிழில் வண்ண வண்ண பூக்கள் படம் மூலம் நாயகியாக அறிமுகமானவர் நடிகை வினோதினி. திரைப்படங்கள் மட்டுமின்றி சீரியலிலும் இவர் நடித்துள்ளார். இவரது கணவர் வெங்கட் ஸ்ரீதர்(52) பீல்டிங் கான்ட்ராக்டராக உள்ளார். இவர் நேற்று திருவான்மியூரில் இருந்து அண்ணா சதுக்கம் வரை இருசக்கர வாகனத்தில் சென்றுள்ளார். கிரீன்வேஸ் சாலையில் உள்ள துணை முதல்வர் ஓ.பன்னீர்செல்வம் வீட்டிற்கு முன் சென்ற போது இவரது வாகனம், பாஷா என்பவரின் வண்டி மீது மோதியது. இந்த விபத்தில் இருவருக்குமே பலத்த காயம் ஏற்பட்டது.

 

விபத்து குறித்து தகவல் அறிந்து சம்பவ இடத்திற்கு விரைந்து சென்ற அடையாறு போலீசார் இருவரையும் மீட்டு சிகிச்சைக்காக மருத்துவமனையில் அனுமதித்தனர். இதில் வெங்கட்டிற்கு வயிறு மற்றும் இடுப்பில் பலத்த காயம் ஏற்பட்டுள்ளதாகத் தெரிகிறது. இந்த விபத்து குறித்து அடையாறு போலீசார் வழக்குப்பதிவு செய்து விசாரணை மேற்கொண்டு வருகின்றனர்.