பாஜக தேசிய செயற்குழு நாளை ஆலோசனை!

பாஜக தேசிய செயற்குழு கூட்டம் அக்கட்சியின் தேசிய தலைவர் ஜெ.பி. நட்டா தலைமையில் நாளை (07/11/2021) டெல்லியில் நடைபெறுகிறது. கட்சியின் தலைமை அலுவலகத்தில் நடைபெற உள்ள செயற்குழு கூட்டத்தில் பாஜக ஆட்சி செய்யும் மாநில முதலமைச்சர்கள், கட்சியின் முக்கிய நிர்வாகிகள், மூத்த தலைவர்கள் உள்ளிட்டோர் நேரடியாக பங்கேற்கின்றனர். அதேபோல், பாஜக மாநிலத் தலைவர்கள் கட்சியின் தலைமை அலுவலகங்களிலிருந்து காணொளி மூலம் பங்கேற்கின்றனர்.

இந்த செயற்குழு கூட்டத்தில், இடைத்தேர்தல்களில் பாஜக சந்தித்த சறுக்கல், உத்தரப்பிரதேசம், உத்தரகாண்ட், கோவா, பஞ்சாப், மணிப்பூர் உள்ளிட்ட ஐந்து மாநில சட்டப்பேரவைத் தேர்தல்கள் உள்ளிட்டவை குறித்து கட்சி நிர்வாகிகளுடன் தேசிய தலைவர் ஜெ.பி. நட்டா ஆலோசனை நடத்துகிறார். 

பாஜகவின் செயற்குழு கூட்டத்தில் கலந்துகொண்டு பிரதமர் நரேந்திர மோடி நாளை (07/11/2021) சிறப்புரையாற்ற உள்ளார்.