பரோட்டா மாஸ்டர் பகீர் சுருட்டல்! ரிட்டயர்டு ஊழியர்களுக்கு வலைவீச்சு;சேலத்தில் தொடரும் நூதன மோசடி!

சேலத்தில் ஓய்வு பெற்ற அரசு ஊழியர்களை குறி வைத்து, நூதன முறையில் நிதி மோசடியில் ஈடுபடும் சம்பவங்கள் தொடர்ந்து அரங்கேறி வருகின்றன. பள்ளிப்படிப்பைக்கூட முடித்திடாத பரோட்டா மாஸ்டர் ஒருவர், அதிக வட்டி வருவதாக ஐந்நூறுக்கும் மேற்பட்ட முதலீட்டாளர்களிடம் 3 கோடி ரூபாய் வரை சுருட்டியிருப்பதன் மூலம், மோசடி கும்பலின் வண்டவாளங்கள் இப்போது வெளிச்சத்திற்கு வந்துள்ளன.

சேலம் பெரிய கொல்லப்பட்டி முல்லை நகரைச் சேர்ந்த முனியம்மாள் (46) என்பவர் ஜூலை 15ம் தேதி, சேலம் மத்திய குற்றப்பிரிவில் ஒரு புகார் அளித்தார். அந்த புகாரில், ''சேலம் கோரிமேடு அன்பு நகரைச் சேர்ந்த கண்ணன் (34), பெரமனுரைச் சேர்ந்த ஜான்சன் (71) ஆகியோர் சேலம் புதிய பேருந்து நிலையம் அருகே திருமலை டிரேடர்ஸ் என்ற பெயரில் நிதி நிறுவனம் நடத்தி வந்தனர். அதில், ஒரு லட்சம் ரூபாய் முதலீடு செய்தால் 121 நாள்களில் ஒன்றரை லட்சம் ரூபாயாக திருப்பி வழங்கப்படும் என்று உறுதிமொழி அளித்தனர். 

அதை நம்பி நானும், குடும்ப உறுப்பினர்களும் சேர்ந்து 15.85 லட்சம் ரூபாய் முதலீடு செய்தோம். உறவினர்கள் சிலரையும் இந்த நிறுவனத்தில் உறுப்பினராக சேர்த்துவிட்டு, அவர்கள் மூலம் 85 லட்சம் ரூபாய் முதலீடு செய்தோம். ஆனால் முதிர்வுக்காலம் முடிவடைந்த பிறகும் கண்ணனும், ஜான்சனும் அசல் மற்றும் வட்டித்தொகையை திருப்பித் தராமல் மோசடி செய்து விட்டனர்,'' என்று கூறியிருந்தார்.

இதுகுறித்து வழக்குப்பதிவு செய்த மத்திய குற்றப்பிரிவு காவல்துறையினர், கண்ணனையும், ஜான்சனையும் அன்றைய தினமே அதிரடியாக தூக்கி வந்து விசாரித்தனர். ஆரம்பத்தில் அப்படி எல்லாம் எந்த மோசடியும் செய்யவில்லை என்று மறுத்துள்ளனர். ஜான்சனோ, ''நான் ஒரு உண்மையான கிறிஸ்தவன். ஆண்டவர் கிறிஸ்துவுக்கு பயப்படுபவன். நான் ஒருபோதும் இந்த மாதிரியான மோசடிகளை செய்ய மாட்டேன்,'' என்று பரிசுத்த ஆவியின் பெயரில் சத்தியம் செய்தாராம். இருவரிடமும் காவல்துறையினர் தங்கள் பாணியில் 'பக்குவமாக' விசாரித்த பிறகுதான், 3 கோடி ரூபாய்க்கு மேல் அவர்கள் சுருட்டி இருப்பது தெரிய வந்துள்ளது. 

இருவரின் பின்னணி குறித்து நாம் களத்தில் இறங்கி விசாரித்தோம்.

இந்த வழக்கில் முதல் குற்றவாளியான கண்ணன், எட்டாம் வகுப்பைக்கூட தாண்டாதவர். இவருடைய பூர்வீகம், மதுரை மாவட்டம் சோழவந்தான். தற்போது சேலத்தில் செட்டில் ஆகிவிட்டார். அதிக வட்டி தருவதாக ஆசை வார்த்தை கூறி நிதி மோசடியில் ஈடுபடும் பாலபாடத்தை இவருக்குக் கற்றுக்கொடுத்ததும், இன்னொரு பகாசூர மோசடி பேர்வழியான சிவக்குமார்தான்.

'மோசடி மன்னன் சிவக்குமார்' என்று அவரின் லீலைகள் குறித்து நக்கீரன் இதழிலும், நக்கீரன் இணையத்திலும் ஏற்கனவே விரிவாக எழுதியிருக்கிறோம். அதன்பிறகே அவரால் ஏமாந்த பலர் புகார் கொடுக்க ஆர்வமாக முன்வந்தனர். 72 கோடி ரூபாய் சுருட்டி விட்டதாக அவர் மீது புகார்கள் எழுந்து, விசாரணையில் உள்ளது.

வின்ஸ்டார் நிறுவனத்தில் மார்க்கெட்டிங் பிரிவில் வேலை செய்து வந்த கண்ணன், குருவின் வழியிலேயே கடந்த 2016ம் ஆண்டு சேலம் புதிய பேருந்து நிலையம் அருகில், திருமலை டிரேடர்ஸ் குரூப் ஆப் கம்பெனீஸ் என்ற பெயரில் ரியல் எஸ்டேட் நிறுவனத்தைத் தொடங்கினார். அந்த நிறுவனத்துக்கு கண்ணன் நிர்வாக இயக்குநர். இரண்டாவது குற்றவாளியான ஜான்சன், பொது மேலாளர். இவர், கூட்டுறவு சங்கத்தில் பணியாற்றி ஓய்வு பெற்றவர். ஆரம்பத்தில் நிலத்தின் மீதான முதலீடு என்று சொல்லித்தான் முதலீடுகளை திரட்டி உள்ளனர். 

ஓய்வு பெற்ற அரசு ஊழியர்கள்தான் இந்த கும்பலின் முதல் இலக்கு. ஏனெனில், அவர்கள் ஓய்வு பெறும்போது கிடைக்கும் பி.எப்., கிராஜூட்டி தொகையை கொத்தாக தங்கள் நிறுவனத்தில் முதலீடு செய்ய வைப்பதை ஓர் உத்தியாகவே செயல்பட்டு வந்துள்ளனர். இதற்காகவே அவர்களிடம் டெலிபோனில் குழைந்து குழைந்து பேச முப்பதுக்கும் மேற்பட்ட இளம்பெண்களை பணியில் அமர்த்தியுள்ளனர். ஒரு லட்சம் ரூபாய் முதலீடு திரட்டி கொடுத்தால் 5000 ரூபாய் கமிஷன் கிடைக்கும் என்பதால், இளம்பெண்கள் எப்படியாவது பேசி பணத்தைக் கறப்பதில் ஆர்வமாகச் செயல்பட்டுள்ளனர்.
 

ஒரு லட்சம் ரூபாய் முதலீடு செய்தால் பத்தாவது மாதத்தில் ஒன்றரை லட்சம் ரூபாயாக பெற்றுக்கொள்ளலாம். இத்தொகையை மாதந்தோறும் தலா 15 ஆயிரம் ரூபாயாக தவணை முறையில் பெற்றுக்கொள்ளலாம் என்றும் வாக்குறுதி அளித்துள்ளனர். பெற்றுக்கொள்ளும் தொகைக்கு வெற்றுக்காசோலைகள் மற்றும் ஒரு ரூபாய் ஸ்டாம்ப் ஒட்டி அதில் கண்ணன் கையெழுத்திட்ட ரசீது ஒன்றையும் கொடுத்துள்ளார். நிறுவனம் தொடங்கிய இரண்டு ஆண்டுகள் வரை சொன்னபடி பலருக்கு பணத்தையும் திருப்பிக் கொடுத்துள்ளனர். ஆனால், கடந்த ஆறு மாதத்தில் முதலீடு செய்தவர்களுக்கு இதுவரை பத்து பைசா கூட பணம் வரவில்லை என்று நெஞ்சு நெஞ்சாக அடித்துக்கொண்டு புலம்பித்தவிக்கின்றனர், பணத்தை பறிகொடுத்தவர்கள்.

பத்து மாதத்தில் முதலீட்டு தொகையை எப்படி ஒன்றரை மடங்காக திருப்பிக் கொடுக்க முடியும் என்றும் விசாரித்தோம். 

கோரிமேடு, கருப்பூர், பேளூர் ஆகிய இடங்களில் ஆடு, மாடு, கோழிப்பண்ணைகள் வைத்திருப்பதாகவும், காமலாபுரம், ஓமலூர் பகுதிகளில் வீட்டுமனைகளில் முதலீடு செய்திருப்பதாகவும், கணிசமான தொகையை பங்குச்சந்தையில் முதலீடு செய்திருப்பதாகவும் அவற்றில் இருந்து கிடைக்கும் லாபத்தில் இருந்து முதலீட்டாளர்களுக்கு பணத்தைக் கொடுத்து வருவதாகவும் பலரையும் நம்ப வைத்துள்ளனர் கண்ணனும், ஜான்சனும். ஆனால் அவர்கள் குறிப்பிட்ட மூன்று இடத்திலும் பெயரளவுக்கு நாட்டு  மாடு, ஆட்டுப்பண்ணைகள் வைத்துவட்டு, ஒரே மாதத்தில் அவற்றை காலி செய்திருப்பதும் தெரிய வந்தது. 

இதையடுத்து நாம் இந்நிறுவனத்தில் முதலீடு செய்து ஏமாந்த சிலரிடமும் நேரில் பேசினோம்.

சேலம் கோரிமேட்டைச் சேர்ந்த பெஞ்சமின் (74), ஓய்வு பெற்ற மின்வாரிய ஊழியர். அவர் நம்மிடம், ''எனக்குத் தெரிந்த ஓய்வு பெற்ற அரசு ஊழியர்கள் பலர், கண்ணன் நடத்தி வந்த திருமலை டிரேடர்ஸ் நிறுவனத்தில் முதலீடு செய்து, அதன்மூலம் லாபமும் அடைந்திருந்தனர். அதை நம்பி நானும் இந்த நிறுவனத்தில் 2 லட்சம் முதலீடு செய்தேன். அத்தொகையை பெற்றுக்கொண்டகற்கு அத்தாட்சியாக 20 ரூபாய் பத்திரத்தில் எழுதியும் கொடுத்தனர். 

என் மகன் சத்ய ஜீசஸ் ராஜன் பலரிடம் கடன் வாங்கியும், மனைவியின் நகைகளை அடகு வைத்தும் 15 லட்சம் முதலீடு செய்தார். பேரனும் 50 ஆயிரம் ரூபாய் முதலீடு செய்திருந்தார். இப்படி திடீரென்று பணத்தை தராமல் கண்ணன் இழுத்தடித்து வருகிறார். ஒவ்வொரு முறை நாங்கள் கேட்கும்போதும், ஏதாவது ஒரு தேதியைக் குறிப்பிட்டு வாய்தா கேட்பாரே தவிர பணத்தைத் தந்ததில்லை. இதனால் நாங்கள் பணத்தைத் தொலைத்தது மட்டுமின்றி, குடும்பத்தின் நிம்மதியையும் தொலைத்து  விட்டோம்,'' என்று புலம்பினார்.

திருமலைகிரியைச் சேர்ந்த ஓய்வு பெற்ற சிவில் சப்ளைஸ் துறை ஊழியர், தனக்குக் கிடைத்த ஓய்வுக்கால பணப்பலன்கள், உறவினர்களிடம் பெற்ற தொகை என மொத்தமாக 41 லட்சம் ரூபாய் முதலீடு செய்துள்ளார். இன்னும் அவருக்கு சல்லிக்காசுகூட கிடைத்தபாடில்லை என்கிறார்கள் சக முதலீட்டாளர்கள். கருப்பூர் ராஜன் (50) என்பவர் 3 லட்சம், ஆத்துக்காடு ஜெயராமன் (65) என்பவர் 2 லட்சம் ரூபாய், கோரிமேடு சம்பூர்ணம் 15 லட்சம் ரூபாய் என இந்த பட்டியல் நீள்கிறது. திருமலை டிரேடர்ஸ் நிறுவனத்தில் பணியாற்றி வந்த பெண் ஊழியர் ஒருவர் தன் தாய்மாமகன்களிடம் பெற்றது, தனது சேமிப்புப்பணம் என 5 லட்சத்தை முதலீடு செய்துவிட்டு கண்ணீரும் கம்பலையுமாக காவல் நிலையத்தில் புகார் அளிக்க வந்திருந்தார். 

மோசடி தொகையின் மூலம் கண்ணன் மதுரையில் சில இடங்களில் நிலங்களாக வாங்கிப் போட்டிருப்பதாகச் சொல்கிறது ஒரு தரப்பு. பொது மேலாளர் ஜான்சன், பெங்களூருவில் வசிக்கும் தன் மூத்த மகனுக்கு சொகுசு பங்களா, கடைசி மகனுக்கு சொகுசு கார் வாங்கிக் கொடுத்திருப்பதாகவும் சொல்கின்றனர். 
 

சேலம் மத்திய குற்றப்பிரிவு காவல் ஆய்வாளர் சதீஸிடம் கேட்டபோது, ''கண்ணன், பரோட்டா மாஸ்டராக வேலை செய்து வந்திருக்கிறார். அந்த அனுபவத்தில் திருமலை ஹோட்டல் என்ற பெயரில் சின்னதாக ஒரு உணவகம் நடத்தி வந்தார். பின்னர் நிதி நிறுவனம் தொடங்கி, அதிக வட்டி கொடுப்பதாகக்கூறி முதலீடுகளை திரட்டி இருக்கிறார். ஆரம்பத்தில் பத்து மாதங்களில் முதலீட்டு தொகையைக் காட்டிலும் ஒன்றரை மடங்கு அதிகமாக தருவதாகச் சொல்லி இருக்கிறார். ஆனால் சொன்னபடி முதலீட்டாளர்களுக்கு பணத்தைத் தர முடியாத நிலை ஏற்பட்டுள்ளது. 

அதனால் அதிக முதலீடுகளை திரட்டுவதற்காக 100 நாள்களில் இரண்டு மடங்கு, மூன்று மடங்கு வட்டி தருவதாக ஆசை வார்த்தை கூறி, பணத்தை திரட்டி இருப்பது தெரிய வந்துள்ளது. கண்ணன், ஜான்சன் ஆகியோர் மீது இதுவரை 15 பேர் புகார் அளித்துள்ளனர். அவர்களிடம் பணம் கொடுத்து ஏமாந்தவர்கள் புகார் அளிக்கலாம். இருவரும் 3 கோடி ரூபாய்க்கு மேல் மோசடி செய்திருக்கலாம் இருக்கலாம் எனத் தெரிகிறது. விரைவில் இருவரையும் கஸ்டடி எடுத்து விசாரிக்க உள்ளோம். அப்போதுதான் எவ்வளவு தொகை ஏமாற்றி இருக்கிறார்கள், எங்கெங்கு சொத்துகள் வாங்கியுள்ளனர் என்பது தெரிய வரும்,'' என்றார். 
 

இதுகுறித்து தேசிய மக்கள் உரிமைகள் மற்றும் நுகர்வோர் பாதுகாப்பு கவுன்சிலின் மாவட்டத் தலைவர் சந்திரசேகர் கூறுகையில், ''இதுபோன்ற நிதி மோசடிகள் சேலத்தில் தொடர்ந்து நடந்து கொண்டுதான் இருக்கின்றன. மக்களின் அறியாமை, மோசடி கும்பலின் வாய்ஜாலங்கள், எல்லாவற்றுக்கும் மேல் காவல்துறையின் ஒத்துழைப்பு ஆகிய காரணங்களால்தான் மோசடி கும்பல் மக்களின் பணத்தை வாரிச்சுருட்டிவிட்டு தலைமறைவாகி விடுகின்றனர்.

மோசடி மன்னன் வின்ஸ்டார் சிவக்குமாரிடம் இருந்து 'தொழில்' கற்றுக்கொண்ட கண்ணன், இப்போது பணத்தை வசூலித்துக்கொண்டு கம்பி நீட்டிவிட்டார். சிவக்குமாரிடம் பயிற்சிபெற்ற மற்றொரு ஊழியர் குறிஞ்சிநாதன் என்பவர் நகைக்கடை என்ற பெயரில் 100 கோடி ரூபாய் மோசடி செய்தார். 

இதே மாதிரி சேலத்தில் இன்னொரு மோசடி நடந்து கொண்டிருக்கிறது. அதுபற்றி காவல்துறையிடம் வாய்மொழியாக புகார் அளித்தேன். அவர்களோ சம்பந்தப்பட்ட நிறுவனத்திற்கு 'ஃபார்மல் விசிட்' செய்து விட்டு வந்துவிட்டனர். மோசடி நடந்திருப்பதாக யாராவது புகார் அளித்தால்தான் நடவடிக்கை எடுப்பேன் என்று சொல்லி காவல்துறை தப்பித்துக் கொள்ளும் வரை இன்னும் நூற்றுக்கணக்கான சிவக்குமார்களும், கண்ணன்களும் முளைத்துக்கொண்டுதான் இருப்பார்கள்,'' என்று கடுமையாக சாடினார். 

வின்ஸ்டார் நிறுவனம் 72 கோடி மோசடி, காயின் டோனா நிறுவனம் 30 கோடி மோசடி, திருமலை டிரேடர்ஸ் 3 கோடி மோசடி என புதுப்புது பெயர்களில் மோசடி மன்னர்கள் முளைத்துக் கொண்டே இருக்கிறார்கள். பேராசைக்காரர்களும், ஏமாளிகளும் இருக்கும் வரையிலும் இதுபோன்ற மோசடிகளும் முற்றுப்பெறப் போவதில்லை.