'விஜய்க்கு பட்டால்தான் தெரியும்'-கார்த்தி சிதம்பரம் கருத்து

தமிழக வெற்றிக் கழகம் என்ற அரசியல் கட்சியை நடத்தி வரும் விஜய், 2026ல் வரவிருக்கும் தமிழக சட்டமன்றத் தேர்தல் தான் தனது இலக்கு எனக் குறிவைத்துச் செயல்பட்டு வருகிறார். அந்த வகையில் உறுப்பினர் சேர்க்கை, உட்கட்சி கட்டமைப்பு விரிவாக்கம், நிர்வாகிகள் ஆலோசனைக் கூட்டம் என அடுத்தடுத்து நடத்தினார்.

இதன் தொடர்ச்சியாக இன்று கட்சியின் கொடி அறிமுக நிகழ்ச்சி பனையூரில் உள்ள கட்சித் தலைமை அலுவலகத்தில் நடைபெற்றது. இதில் விஜய்யின் தந்தை எஸ்.ஏ சந்திரசேகர், தாய் ஷோபனா மற்றும் நூற்றுக்கணக்கான நிர்வாகிகள் கலந்து கொண்டனர். தொடர்ந்து விஜய்யால் அறிமுகம் செய்யப்பட்ட கொடியில் கீழும் சிவப்பு நிறம் இருக்க நடுவில் மஞ்சள் நிறம். அதில் மஞ்சள் நிற பகுதியில் 2 போர் யானைகளுக்கு நடுவில் வாகை மலர் மற்றும் அந்த மலரைச் சுற்றி  23 பச்சை நிற நட்சத்திரங்களும், 5 வெளிர் நீல நிற நட்சத்திரங்களும் இடம் பெற்றுள்ளன. இதையடுத்து கட்சிக்கான பாடலையும் வெளியிட்டார் விஜய். அதில், ‘தமிழன் கொடி பறக்குது... தலைவன் யுகம் பொறக்குது... வீரக் கொடி... விஜயக் கொடி’ உள்ளிட்ட வரிகள் இடம்பெற்றிருந்தது.

இந்நிலையில் நடிகர் விஜய்க்கு பட்டால்தான் தெரியும் என காங்கிரஸ் எம்பி கார்த்தி சிதம்பரம் தெரிவித்துள்ளார். புதுக்கோட்டையில் செய்தியாளர்களைச் சந்தித்த கார்த்தி சிதம்பரத்திடம் செய்தியாளர்கள் நடிகர் விஜய்யின் தமிழக வெற்றிக் கழகத்தின் கொடி குறித்து கேள்வி எழுப்பினர். அதற்கு பதிலளித்த அவர், 'தனிக்கட்சி நடத்துவது குறித்து நடிகர் விஜய்க்கு பட்டால்தான் தெரியும். கட்சியை அறிவிப்பது பெரிய விஷயம் அல்ல, நிலைப்பாடு என்ன என்பதை தெரிவிக்க வேண்டும். ஜிஎஸ்டி, நீட் உள்ளிட்ட விவகாரங்களில் விஜய்யின் நிலைப்பாடு என்ன என்பதைத் தெரிவிக்க வேண்டும். விஜய் கொடியை அறிமுகம் செய்ததை வைத்தும் மட்டும் எதையும் கூற முடியாது' என்றார்.