தி.மு.க. முன்னாள் எம்.எல்.ஏ. காலமானார்!

நாமக்கல் சந்தைப்பேட்டைப் புதூரைச் சேர்ந்தவர் கே.கே.வீரப்பன் (வயது 77). கடந்த 1996- ல் நடந்த சட்டமன்ற தேர்தலில் திமுக சார்பில் கபிலர் மலை தொகுதியில் போட்டியிட்டு வெற்றி பெற்று சட்டமன்ற உறுப்பினர் ஆனார். 

தி.மு.க.வில், நாமக்கல் மாவட்டச் செயலாளராக இருந்துள்ளார். அதுமட்டுமின்றி, மாவட்ட ஊராட்சிக்குழுத் தலைவர், மாநிலங்களவை நாடாளுமன்ற உறுப்பினர்., ஆகிய பதவிகளையும் வகித்துள்ளார். கடந்த 2001-ல் நடந்த சட்டமன்றத் தேர்தலின்போது, கபிலர் மலை தொகுதியில் சுயேச்சையாகப் போட்டியிட்டு தோல்வி அடைந்தார். அதையடுத்து, காங்கிரஸ் கட்சியில் இணைந்த அவர், மாவட்ட தலைவராகவும் இருந்து வந்தார். 

எனினும், அதன்பிறகு அரசியல் களம் அவருக்குப் பெரிதாகக் கைகொடுக்காததால், சில ஆண்டுகளாகத் தீவிர அரசியலிலிருந்து ஒதுங்கி இருந்தார். இதற்கிடையே உடல்நலமும் பாதிக்கப்பட்டு, அவ்வப்போது சிகிச்சை பெற்று வந்த அவர், புதன்கிழமை (ஜூன் 15) காலை அவருடைய இல்லத்தில் காலமானார். 

இவர், 12.8.1945- ஆம் ஆண்டு பிறந்தார். இவருக்குச் சிவகாமி என்ற மனைவியும், கால்நடை மருத்துவர் சந்திரசேகர், பொறியாளர் ராஜேந்திர குமார் என இரு மகன்களும் உள்ளனர். மகன்கள் இருவருக்கும் திருமணம் ஆகி குடும்பத்துடன் வசிக்கின்றனர்.