சேலம் மாவட்டம் அயோத்தியாபட்டணம் முனியப்பன் நகரைச் சேர்ந்தவர் ஜெயவேல் (67). இவர், தனது உறவினர்கள் தங்கபழம், பிரேம் ஆனந்த், சரண்யா ஆகியோரை கூட்டு சேர்த்துக் கொண்டு, சேலத்தில் அமுதசுரபி கூட்டுறவு மற்றும் சிக்கன நாணய சங்கம் என்ற பெயரில் கூட்டுறவு நிறுவனத்தை தொடங்கினார். இதையடுத்து, தமிழகத்தின் பிற மாவட்டங்களிலும் இந்த சங்கத்தின் கிளைகளைத் தொடங்கினர். இந்த சங்கத்தில், குறுகிய கால வைப்புகளுக்கு அதிக வட்டி வழங்கப்படும் என அறிவித்தனர். கவர்ச்சிகரமான அறிவிப்பை பார்த்து நம்பிய ஏராளமான முதலீட்டாளர்கள் அமுதசுரபி கூட்டுறவு சிக்கன நாணய சங்கத்தில் முதலீடுகளைக் கொட்டினர். ஆனால் முதிர்வுக் காலம் முடிந்த பிறகும் உறுப்பினர்களுக்கு அசல், வட்டி தொகையைத் தராமல் சங்க நிர்வாகிகள் இழுத்தடித்து வந்துள்ளனர்.  

இந்த நிலையில் தான் இதில் முதலீடு செய்து ஏமாந்து போன சேலம் அம்மாபேட்டையைச் சேர்ந்த பாஸ்கரன் (52) என்பவர், பொருளாதார  குற்றப் பிரிவில் அமுதசுரபி கூட்டுறவு நிறுவனத்தின் மீது புகாரளித்தார். அதில், தனது 2.92 லட்சம் ரூபாயை ஏமாற்றிவிட்டதாகத் தெரிவித்து இருந்தார். இவரைத் தொடர்ந்து நூற்றுக்கும் மேற்பட்ட முதலீட்டாளர்கள், இந்த சங்கத்தின் மீது புகார்களைக் கொடுத்தனர். டிஎஸ்பி சீனிவாசன் மற்றும் காவல்துறை நடத்திய விசாரணையில், அமுதசுரபி கூட்டுறவு நிறுவனம் 58 கோடி ரூபாய்க்கு மேல் மோசடி செய்திருப்பது தெரிய வந்தது.     

முதலீட்டாளர்கள் நெருக்கடி அளித்ததால் சங்க நிர்வாகிகள் தலைமறைவு ஆகிவிட்டனர். இந்நிலையில், சங்கத்தின் தலைவராக செயல்பட்ட ஜெயவேல், கணக்காளர் கண்ணன் ஆகியோரை கைது செய்தனர். பின்னர், இந்த நிறுவனத்தின் முக்கிய நிர்வாகிகளுள் ஒருவரான தங்கபழத்தை பொருளாதார குற்றப்பிரிவு காவல்துறையினர் கடந்த மே மாதம் 10 ஆம் தேதி கைது செய்தனர். அவரை கோவையில் உள்ள டான்பிட் நீதிமன்றத்தில் ஆஜர்படுத்திய பிறகு, கோவை மத்திய சிறையில் அடைத்தனர். இந்நிலையில், தங்கபழத்தை காவலில் எடுத்து விசாரிக்க பொருளாதார குற்றப்பிரிவினர் முடிவு செய்தனர். அதையடுத்து டான்பிட் நீதிமன்றத்தில் தங்கபழத்தை  நான்கு நாள்கள் காவலில் எடுக்க அனுமதி கேட்டு மனுத்தாக்கல் செய்தனர். மனுவை விசாரித்த நீதிமன்றம் 2 நாள் காவலில் எடுத்து விசாரிக்க அனுமதி அளித்துள்ளது.    

இதையடுத்து தங்கபழத்தை காவலில் எடுத்த பொருளாதார குற்றப்பிரிவினர், முதலீடாக பெற்ற தொகையை என்ன செய்தனர்? அதன்மூலம் எந்தெந்த இடங்களில் சொத்துகளை வாங்கியுள்ளனர்? தங்கம், கிரிப்டோகரன்சிகளில் முதலீடு செய்துள்ளனரா? எனப் பல்வேறு கோணங்களில்  விசாரணை நடத்தி வருகின்றனர். இன்றுடன் (ஜூன் 22, 2023) தங்கபழத்தின் காவல் முடிகிறது. விசாரணை முடிந்த பிறகு அவரை இன்று மாலை டான்பிட் நீதிமன்றத்தில் ஆஜர்படுத்த உள்ளனர். இது ஒருபுறம் இருக்க, தலைமறைவாக உள்ள பிரேம் ஆனந்த், சரண்யா ஆகியோரை தேடும் பணிகளும் முடுக்கி விடப்பட்டுள்ளன. 

அதிமுகவின் இடைக்கால பொதுச்செயலாளர் எடப்பாடி பழனிசாமி தலைமையில் சென்னை ராயப்பேட்டையில் இருக்கக் கூடிய அதிமுக தலைமை அலுவலகத்தில் மாவட்ட செயலாளர்கள் மற்றும் சட்டமன்ற உறுப்பினர்கள் கலந்து கொண்ட ஆலோசனைக் கூட்டம் நடைபெற்றது.

அதிமுகவின் இடைக்கால பொதுச்செயலாளராக எடப்பாடி பழனிசாமி தேர்வு செய்யப்பட்ட பின் நடைபெறும் முதல் கூட்டம் என்பதால் அதிமுகவின் சட்டமன்ற உறுப்பினர்கள் மற்றும் மாவட்ட செயலாளர்கள் அனைவரும் கலந்து கொண்டனர். மேலும் முன்னாள் அமைச்சர்கள் ஜெயக்குமார், எஸ்பி வேலுமணி, நத்தம் விஸ்வநாதன், காமராஜ், தங்கமணி, பொன்னையன் உள்ளிட்டோரும் பங்கேற்றனர்.

அதிமுக தற்போது இரு தரப்பாக இருக்கும் நிலையில் மொத்தம் இருக்கக்கூடிய 75 மாவட்ட செயலாளர்களில் எடப்பாடி பழனிசாமிக்கு ஆதரவாக உள்ள 69 மாவட்ட செயலாளர்கள் பங்கேற்றனர். 61 பழனிசாமி சட்ட மன்ற உறுப்பினர்கள் கலந்து கொண்டனர்.

அதிமுகவின் பொன்விழா ஆண்டினை முன்னிட்டு தமிழகம் எங்கும் பொதுக்கூட்டம் நடத்த இந்த கூட்டத்தில் விவாதிக்கப்பட்டுள்ளதாகவும் தகவல்கள் வெளியானது. மேலும் 17ம் தேதி நடைபெறும் சட்டப்பேரவை கூட்டத் தொடரில் செய்ய வேண்டிய நடவடிக்கைகள் குறித்து கூட்டத்தில் ஆலோசனை செய்யப்பட்டது எனவும் தகவல் வெளியாகியுள்ளது. 

அதிமுகவின் துணை சட்டப்பேரவைத் தலைவராக இருந்த ஓபிஎஸ் மற்றும் துணை கொறடாவாக இருந்த மனோஜ் பாண்டியனையும் நீக்கி புதிய துணை சட்டப்பேரவை தலைவராக ஆர்.பி.உதயகுமாரையும் துணை கொறடாவாக  அக்ரி கிருஷ்ணமூர்த்தியையும் நியமித்து எடப்பாடி பழனிசாமி தரப்பு சட்டப்பேரவைக்கு கடிதம் வழங்கி இருந்தது. இது குறித்து சபாநாயகர் முடிவு ஏதும் எடுக்காத நிலையில் அது குறித்தும் ஆலோசிக்கப்படலாம் என தெரிகிறது.