பாஜகவிற்கு கடும் போட்டியைத் தந்த மக்களுக்கு நன்றி! - ராகுல்காந்தி

Published on 19/12/2017 | Edited on 19/12/2017

பாஜகவிற்கு கடும் போட்டியைத் தந்த மக்களுக்கு நன்றி! - ராகுல்காந்தி

குஜராத் சட்டமன்றத் தேர்தலில் பாஜகவிற்கு கடும் போட்டியைத் தந்த மக்களுக்கு நன்றி என காங்கிரஸ் தலைவர் ராகுல்காந்தி தெரிவித்துள்ளார்.

குஜராத் தேர்தல் முடிவுகள் குறித்து செய்தியாளர்களின் கேள்விகளுக்குப் பதிலளித்த காங்கிரஸ் தலைவர் ராகுல்காந்தி, ‘மூன்று, நான்கு மாதங்களுக்கு முன்னாள் நாங்கள் குஜராத் மாநிலத்திற்கு சென்றிருந்தோம், அப்போது காங்கிரஸ் கட்சியானது பாஜகவிடம் போட்டியிடும் அளவிற்கு திறன் வாய்ந்ததாக இல்லை என பாஜகவினர் விமர்சித்திருந்தனர். குஜராத் மாநில காங்கிரஸ் கட்சியினருடன் ஒன்றிணைந்து, வலுவான தேர்தல் பணிகளில் ஈடுபட்டோம். அதற்கான முடிவுகள்தான் தற்போது உங்கள் முன் உள்ளன. தேர்தல் முடிவுகள் எங்களுக்கு தோல்வியைத் தந்திருந்தாலும், எங்களைப் பொருத்தவரை இது நல்ல முன்னேற்றமே.

குஜராத் தேர்தல் என்பது எனக்கு மகிச்சிறந்த கற்றல் அனுபவமாக அமைந்தது. அன்பாலும், சகோதரத்துவத்தாலும் எதிரியை எளிதாக வெல்லலாம் என்பதை அங்குள்ள மக்கள் எனக்கு புரியவைத்துள்ளனர்.

மகாத்மா காந்தி கற்பித்த சில விஷயங்கள் குஜராத் மக்கள் மனதில் நன்கு ஆழமாகப் பதிந்துள்ளது. அதைத்தான் நான் அவர்களிடமிருந்து கடந்த மூன்று, நான்கு மாதங்களாக கற்றுக்கொண்டேன்’ என அவர் தெரிவித்துள்ளார்.