ஆப்பிரிக்கா வேர்; தமிழ்நாட்டில் வளர்ந்துவரும் ஆயிரம் ஆண்டுகள் பழமையான பிரமாண்டமான பொந்தன்புளி மரம்! 

விருதுநகர் மாவட்டம், மண்டபசாலை என்ற ஊரில் வணிகப்பெருவழியில் ஆயிரம் ஆண்டுகள் பழமையான பிரமாண்டமான பொந்தன்புளி மரம் வளர்ந்து வருகிறது. இதை மக்கள் தெய்வமாக வழிபட்டு வருகிறார்கள். 

மண்டபசாலையில் பிரமாண்டமான ஒரு மரம் இருப்பதாகக் கிடைத்த தகவலின் பேரில் ராமநாதபுரம் தொல்லியல் ஆய்வு நிறுவனத்தின் தலைவர் வே.ராஜகுரு, அருப்புக்கோட்டை தேவாங்கர் கல்லூரி வரலாற்றுத்துறை உதவிப் பேராசிரியர் செ.ரமேஷ் ஆகியோர் அங்கு ஆய்வு செய்தனர். 

இதுபற்றி ராமநாதபுரம் தொல்லியல் ஆய்வு நிறுவனத்தின் தலைவர் வே.ராஜகுரு கூறியதாவது; ‘விருதுநகர் மாவட்டம், மண்டபசாலை கருப்பசாமி கோயில் அருகில் கமுதி செல்லும் சாலையின் கிழக்குப்பகுதியில் 7 மீட்டர் உயரமும், அடிப்பகுதி 11 மீட்டர் சுற்றளவும் கொண்ட பிரமாண்டமான ஒரு மரம் வளர்ந்து வருகிறது. இது ஆப்பிரிக்கா, மடகாஸ்கர், ஆஸ்திரேலியா, அரேபியா போன்ற நாடுகளில் அதிகமாக வளர்ந்து வரும் பொந்தன்புளி மரம் ஆகும். ஐவிரல் அமைப்புடைய இலைகள், இயற்கையாக உருவாகக் கூடிய பெரிய அளவிலான பொந்துகள், யானை போன்ற மிகப் பிரமாண்டமான அடிமரம் ஆகியவை  இம்மரத்தின் சிறப்புகள். ஓராண்டில் ஆறு  மாதங்கள் வரை இதில் இலைகள் உதிர்ந்து காணப்படும். இம்மரங்கள் சாதாரணமாக 2000 ஆண்டுகளுக்கும் மேல் உயிர் வாழ்பவை. இதன் தண்டுகளில் தண்ணீரை சேமித்து வைக்கிறது.

மண்டபசாலையில் உயரமாக வளர்ந்து வந்த இம்மரத்தின் 3 கிளைகளும் சில ஆண்டுகளுக்கு முன் உடைந்து விழுந்துள்ளது. விழுந்த அதன் கிளைகளும் தொடர்ந்து வளர்ந்து வருகிறது. இம்மரத்து தண்டின் நடுவில் 10 பேர் அமரும் வகையில் பெரிய பொந்து உருவாகியுள்ளது. இதன் உள்ளே செல்லவும் வழியுள்ளது. இம்மரம் யானை போன்ற அமைப்பில் உள்ளது. இம்மரத்தை தெய்வமாக வழிபட்டு வருகிறார்கள்.

ராமநாதபுரம் மாவட்டத்தில் ராமேஸ்வரம், தங்கச்சிமடம், ராமநாதபுரம், தேவிபட்டினம், சேந்தனேந்தல், அழகன்குளம், ஏர்வாடி தர்கா, புல்லந்தை, மும்முடிச்சாத்தான், தேரிருவேலி, அருங்குளம், பனைக்குளம் போன்ற கடற்கரையோர ஊர்களிலும், வணிகப் பெருவழிகளிலும் இம்மரம் காணப்படுகிறது. தென்தமிழ்நாட்டின் நீண்ட கடற்கரையும், இயற்கையாக அமைந்த உப்பங்கழிகளும் பல இயற்கைத் துறைமுகங்களை உருவாக்கியுள்ளன. இதனால் வெளிநாடுகளைச் சேர்ந்த வணிகர்கள் பலர் சங்ககாலம் முதல் வணிகத்துக்காக பாண்டிய நாட்டுக்கு வந்துள்ளனர். 

அரேபியாவில் இருந்து இறக்குமதி செய்யப்பட்ட குதிரைகளுக்கு தீவனமாக பொந்தன்புளி மரத்தின் இலைகள், கனிகள், காய்கள் கொடுக்கப்பட்டுள்ளன. இம்மாவட்டத்தில் ராஜபாளையம், சிவகங்கை மாவட்டம் வேதியரேந்தல், மதுரை அமெரிக்கன் கல்லூரி, இலங்கை மன்னார் உள்ளிட்ட பல இடங்களிலும் இம்மரம் வளர்ந்து வருகிறது. இதன் பிரமாண்டம், பொந்து போன்ற அமைப்பு, இலைகளின் புளிப்பு சுவை ஆகியவற்றால் இந்த மரத்தை பொந்தன்புளி, யானைமரம், ஆனைப்புளி, பெருக்கமரம், பப்பாரப்புளி என பல பெயர்களில் அழைக்கிறார்கள். இதை ஆங்கிலத்தில் போபாப் என்கிறார்கள். 

மண்டபசாலை அருகில் பெருநிரவியார் எனும் வணிகக்குழுவின் பெயரால் அமைந்த நீராவி எனும் ஊர் உள்ளது. கேரளாவிலிருந்து மேற்குத் தொடர்ச்சி மலை வழியாக அழகன்குளம் செல்லும் வணிகப்பெருவழியில் இவ்வூரிலும் தேரிருவேலி, அழகன்குளத்திலும் இம்மரம் வளர்ந்து வருகிறது. ஓய்வு பெற்ற ஆங்கில ஆசிரியர் முத்துராஜா என்பவர் 5 அடி உயரத்திற்கு மரத்தைச் சுற்றி திண்டு கட்டிக் கொடுத்துள்ளதால் மரம் பாதுகாப்பாக உள்ளது. மரத்தின் வயது ஆயிரம் ஆண்டுகளைக் கடந்தபின்பே அதில் பொந்து உண்டாகிறது. எனவே பொந்து உள்ள இம்மரம் ஆயிரம் ஆண்டுகள் பழமையானது எனக் கருதலாம். இவ்வாறு அவர் கூறினார்.