தமிழில் வளர்ந்து வரும் ஹீரோக்களில் அசோக் செல்வனும் ஒருவர். இவர் நடிப்பில் சமீபத்தில் வெளியான படம் 'ஹாஸ்டல்'. ஆர்.ரவீந்திரன் தயாரித்திருந்த இப்படத்தில் பிரியா பவானிசங்கர், சதீஷ், நாசர் உள்ளிட்ட பலர் நடித்திருந்தனர். காமெடி கலந்த திகில் ஜானரில் வெளியான இப்படம் கலவையான விமர்சனங்களையே பெற்றது. இதனை அடுத்து 'கே 4 க்ரியேஷன்' சார்பாக கேசவன் தயாரிக்கும் 'வேழம்' படத்தில் நடித்துள்ளார். ஜனனி ஐயர், ஐஸ்வர்யா மேனன் ஆகியோர் முக்கிய கதாபாத்திரத்தில் நடித்துள்ளனர். அறிமுக இயக்குநர் சந்தீப் ஷ்யாம் இயக்கியுள்ள இப்படத்திற்கு ஜானு சந்தர் இசையமைக்கிறார். சமீபத்தில் இப்படத்தின் ஃபர்ஸ்ட் லுக் வெளியாகி நல்ல வரவேற்பை பெற்றது.
இந்நிலையில் 'வேழம்' படத்தின் ரிலீஸ் மற்றும் சென்சார் சான்றிதழ் குறித்த அறிவிப்பு வெளியாகியுள்ளது. அதன் படி ஜூன் மாதம் 24-ஆம் தேதி திரையரங்குகளில் இப்படம் வெளியாகவுள்ளது. இதனை அதிகாரப்பூர்வமாக சமூக வலைத்தளத்தில் படக்குழு தெரிவித்துள்ளது. மேலும் இப்படத்திற்கு யு/ஏ சான்றிதழ் கிடைத்துள்ளது. 'எஸ்பி சினிமாஸ்' இப்படத்தின் திரையரங்க உரிமையை கைப்பற்றி உலகெங்கும் உள்ள திரையரங்குகளில் வெளியிடுகிறது.
