சாம்பியன் என்னும் படத்தில் சிறந்த நடிப்பை வெளிப்படுத்தியதற்காக சிறந்த நடிகருக்கான ஆஸ்கர் விருதுக்கு பரிந்துரைக்கப்பட்டவர் கிர்க் டக்ளஸ். 1946ஆம் ஆண்டு வெளியான தி ஸ்ட்ரேஞ் லவ் ஆஃப் மார்த்தா இவர்ஸ் படத்தின் மூலம் ஹாலிவுட் சினிமாவில் கால் பதித்தார். இதுவரை 90க்கும் மேற்பட்ட படங்களில் நடித்திருக்கும் டக்ளஸ் 103 வயதில் மரணமடைந்துள்ளார்.
உலகம் முழுவதும் உள்ள அவருடைய ரசிகர்கள் அவருக்கு அஞ்சலி செலுத்தி வருகின்றனர். ஸ்பார்டகஸ் (1960), லஸ்ட் ஃபார் லைஃப் (1956) ஆகிய படங்கள் இவரது திரையுலக பயணத்தில் பலருக்கும் பிடித்தவைகளாக இருக்கின்றன. டக்ளஸ் அந்த காலத்தில் சிக்ஸ் பேக் மனிதர். அவருடைய உடல் தோற்றத்திற்காக பெரும் ரசிகர் கூட்டம் உண்டு.
சினிமாவின் ஜாம்பவான்களான குப்ரிக், பில்லி வில்டெர் உள்ளிட்டோரின் இயக்கத்தில் நடித்திருக்கிறார். கடந்த 1996ஆம் ஆண்டு வாழ்நாள் சாதனைக்கான ஆஸ்கார் விருது வழங்கப்பட்டது.
கடந்த சில நாட்களாகவே உடல்நலக்குறைவால் அவதிப்பட்டு வந்த டக்ளஸ் நேற்று (05.02.2020) கலிபோர்னியாவில் உள்ள தனது வீட்டில் மரணமடைந்தார். கிர்கின் மரணத்திற்கு ஹாலிவுட்டின் பிரபல இயக்குனர்கள் பலரும் இரங்கல் தெரிவித்து வருகின்றனர்.
