'கொடி பறந்தா பார்த்துவிட்டு சொல்றங்க'-அமைச்சர் முத்துசாமி பேட்டி

நடிகர் விஜய் தமிழக வெற்றிக் கழகம் எனும் அரசியல் கட்சியைத் தொடங்கியதோடு, தொடர்ந்து அடுத்தடுத்த நடவடிக்கைகளை மேற்கொண்டு வருகிறார். அதன்படி நேற்று பனையூரில் உள்ள அவரது கட்சி அலுவலகத்தில் தமிழக வெற்றிக் கழகத்தின் கொடி அறிமுகம் செய்யப்பட்டது. அதேபோல் கட்சிக்கான பாடலும் வெளியிடப்பட்டிருந்தது.

நடிகர் விஜய் கட்சிக்கொடி அறிமுகப்படுத்தியிருப்பது தொடர்பாக பல்வேறு அரசியல் தலைவர்களும் கருத்து தெரிவித்து வருகின்றனர். இந்நிலையில் ஈரோட்டில் செய்தியாளர்களை சந்தித்த அமைச்சர் முத்துசாமியிடம் நடிகர் விஜய் கட்சிக் கொடியை அறிமுகப்படுத்தியிருப்பது தொடர்பாக கேள்வி எழுப்பினர். 'கட்சிக் கொடியை விஜய் அறிமுகப்படுத்தி இருக்கிறார் அதை எப்படி பார்க்கிறீர்கள்' என்ற கேள்விக்கு, ''கொடி பறந்தா பார்த்து சொல்றங்க'' என்றார்.

உடனடியாக செய்தியாளர்கள் 'கொடி பறக்காதா?' என கேட்டதற்கு, ''அப்படி சொல்லவில்லை. யாரையும் நாங்கள் டிஸ்கரேஜ் பண்ணவில்லை. கொடி பறந்த உடன் பார்த்துவிட்டு சொல்கிறேன் என்று சொன்னேன். ஒருவர் கட்சி ஆரம்பிக்கிறார். கொடிய அறிமுகப்படுத்துகிறார். அதில் என்ன நான் சொல்வது. திமுக எவ்வளவு வலுவானது? எவ்வளவோ பாதிப்புகளை எல்லாம் பார்த்து வெற்றிபெற்று வந்தது தான் இந்தியா கூட்டணி. இதெல்லாம் ஒரு பிரச்சனை அல்ல. அவரை நாங்கள் டிஸ்கரேஜ் பண்ணவில்லை. நாங்கள் எங்களை வலுவாக்கி கொள்கிறோம்'' என்றார்.

அமைச்சரவை மாற்றம் குறித்த கேள்விக்கு, ''நான் அதைப் பற்றி எதுவும் சொல்லக் கூடாதுங்க. இதில் உங்களுக்கு ஏதாவது ஆசை இருந்தா சொல்லுங்க'' என அமைச்சர் சொல்ல, சுற்றி இருந்த நிர்வாகிகள் சிரித்தனர்.