இரட்டை பெண் குழந்தைகளை கொன்ற தாய்; தானும் தற்கொலை; பெரம்பலூரில் துயரம்

தனது இரட்டை பெண் குழந்தைகளை விஷம் கொடுத்து கொன்றுவிட்டு தாயும் தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது.

பெரம்பலூர் மாவட்டம் குன்னம் வட்டத்தை சேர்ந்தவர் விஜயகுமார். இவருக்கு கடந்த இரண்டு ஆண்டுகள் முன்பு திருமணமாகி ஜெயா என்ற மனைவியும் நிகிதா, நிகிஷா என்ற இரட்டை பெண் குழந்தைகளும் உள்ளனர். விஜயகுமார் துபாயில் வேலை செய்து வருவதால் ஜெயா தனது குழந்தைகளுடன் கடலூர் மாவட்டத்தில் உள்ள தனது பெற்றோருடன் தங்கி இருந்துள்ளார். கடந்த ஒரு வாரத்துக்கு முன்பு தனது கணவரின் இல்லத்திற்கு வந்து தனது குழந்தைகளுடன் ஜெயா தங்கியுள்ளார்.

இந்நிலையில் இன்று காலை குழந்தைகளுடன் தனது அறையில் தூங்கிக் கொண்டு இருந்த ஜெயா வெகு நேரமாகியும் அறையின் கதவை திறக்காததால் குடும்பத்தினருக்கு சந்தேகம் வந்துள்ளது. தொடர்ந்து குடும்பத்தினர் ஜெயா தங்கியிருந்த அறையின் கதவை பலமுறை தட்டினர். கதவு திறக்கப்படாததால் அக்கம்பக்கத்தினர் உதவியுடன் கதவை உடைத்து உள்ளே சென்று பார்த்தனர். அங்கு ஜெயா மின்விசிறியில் தூக்கு போட்டு சடலமாக தொங்கிக் கொண்டிருந்தார். கட்டிலில் அவரது பெண் குழந்தைகளும் வாயில் நுரை தள்ளிய நிலையில் இறந்து கிடந்தனர்.

தகவல் அறிந்து சம்பவ இடத்திற்கு விரைந்த காவல்துறையினர் மூவரின் உடல்களையும் மீட்டு பிரேதப் பரிசோதனைக்கு அனுப்ப உத்தரவிட்டனர். ஆனால் ஜெயாவின் உறவினர்கள் ஜெயா மரணத்தில் மர்மம் இருப்பதாக கூறி உடலை எடுத்துச் செல்ல விடாமல் போராட்டத்தில் ஈடுபட்டனர். இதனைத் தொடர்ந்து காவல்துறையினர் அவர்களுடன் பேச்சுவார்த்தையில் ஈடுபட்டனர். உரிய விசாரணைக்கு உத்தரவிட்டு ஜெயா இறப்பிற்கு காரணமானவர்கள் மீது கடும் நடவடிக்கை எடுக்கப்படும் என உறுதி அளித்ததை அடுத்து உறவினர்கள் போராட்டத்தை கைவிட்டனர்.

இதன்பின் மூவரின் உடல்களும் பிரேதப் பரிசோதனைக்கு அனுப்பப்பட்டது. இதனைத் தொடர்ந்து காவல்துறையினர் விசாரணை நடத்தி வருகின்றனர். முதற்கட்ட விசாரணையில், ஜெயா இரண்டு பெண் குழந்தைகளையும் கொன்று விட்டு தானும் தூக்கிட்டு தற்கொலை செய்து கொண்டது தெரிய வந்தது. மேலும் ஜெயா இந்த முடிவு எடுத்ததற்கான காரணங்கள் குறித்தும் விசாரித்து வருகின்றனர். ஜெயாவின் மாமியார், மாமனார் மற்றும் உறவினர்களிடமும் தொடர்ந்து விசாரணை நடத்தி வருகின்றனர். இச்சம்பவம் பெரம்பலூரில் பரபரப்பை ஏற்படுத்தி உள்ளது.