Skip to main content

சகோதரரின் நியமனத்தை எதிர்த்த தலைமைச் செயலாளர் இறையன்பு!

Published on 16/11/2021 | Edited on 16/11/2021

 

General Secretary Iraiyanbu opposes brother's appointment

 

வங்கக் கடலில் உருவான காற்றழுத்த தாழ்வு நிலை காரணமாக, கடந்த வாரம் பொழிந்த கடும் மழையால் சென்னை மாநகரமே வெள்ளத்தில் தத்தளித்தது. இடுப்பளவுக்குத் தேங்கிய வெள்ளத்தை வெளியேற்ற மிகுந்த சிரமத்தையும் சிக்கலையும் சந்தித்தது சென்னை மாநகராட்சி நிர்வாகம்.

 

இந்த நிலையில், இதுபோன்ற சூழல் இனிவரும் காலங்களில் உருவாகக் கூடாது என்பதை திட்டமிட்டு, மழைநீர் தேங்குவதைத் தடுப்பதற்கான நிரந்த தீர்வு காணும் வழிகளை ஆராய்வதற்காக ஓய்வுபெற்ற ஐ.ஏ.எஸ். அதிகாரி திருப்புகழ் தலைமையில் ஒரு குழுவை அமைத்திருக்கிறார் முதல்வர் மு.க. ஸ்டாலின். இவரது நியமனம் பல கேள்விகளை உருவாக்கியிருந்தது. குறிப்பாக, தமிழ்நாடு அரசின் தலைமைச் செயலாளர் இறையன்புவின் சகோதரர்தான் திருப்புகழ் என்றும், மோடிக்கு நெருக்கமானவர் என்றும் என்பதைச் சுட்டிக்காட்டி பல்வேறு சர்ச்சைகள் பரவிவருகின்றன.

 

உண்மையில் நடந்தது என்ன என்பது குறித்து கோட்டை வட்டாரங்களில் விசாரித்தபோது, “இறையன்புவின் சகோதரர்தான் திருப்புகழ். இவர், குஜராத் கேடர் ஐ.ஏ.எஸ். அதிகாரி. குஜராத்தின் முதல்வராக மோடி இருந்தபோது, அவரது ஆட்சியில் முக்கிய துறைகளின் அதிகாரியாக பணியாற்றியவர். மோடியின் செயலாளர்களில் ஒருவராகவும் இருந்தவர் திருப்புகழ்.

 

பேரிடர் மேலாண்மைத் துறையில் பட்டம் பெற்றவர்; நிபுணத்துவம் கொண்டவர். குஜராத் பூகம்பத்தின்போது மீட்புப் பணிகளில் இவர் ஆற்றிய பணிகள் மிகச்சிறப்பானவை. பூகம்பம், சுனாமி, மழை வெள்ளம், சூறாவளி உள்ளிட்ட இயற்கை பேரிடர் காலச் சூழல்களை எதிர்கொள்வது குறித்து பல தீர்வுகளைக் கொடுத்தவர். அப்படிப்பட்ட அதிகாரியைப் பயன்படுத்திக்கொள்ள வேண்டும் என்கிற நோக்கத்தில்தான் திருப்புகழ் தலைமையில் ஒரு குழுவை அமைத்தார் முதல்வர் ஸ்டாலின்.

 

General Secretary Iraiyanbu opposes brother's appointment

 

அவரது நியமனத்திற்கான கோப்பு இறையன்புவின் ஒப்புதலுக்கும் பரிந்துரைக்கும் அனுப்பிவைக்கப்பட்டது. அதனைப் பார்வையிட்ட இறையன்பு, அதனை ஏற்க மறுத்தார். அதேசமயம், “திருப்புகழ் எனது சகோதரர். இவரது நியமனத்துக்கு நான் ஒப்புதல் தருவது ஆரோக்கியமானதில்லை. இந்த நியமனம், தேவையற்ற விவாதங்களை ஏற்படுத்தும். எனக்கு இதில் உடன்பாடில்லை. அவரை என்னால் பரிந்துரைக்க முடியாது. முதலமைச்சர் முடிவு செய்யட்டும். என்னால் இந்தக் கோப்பில் கையெழுத்திட முடியாது” என்று அந்தக் கோப்பில் எழுதிவிட்டார்.

 

இதனையடுத்து, அதனைப் பார்வையிட்ட முதல்வர் அலுவலக அதிகாரிகள், முதல்வர் ஸ்டாலினின் கவனத்துக்கு இதனைக் கொண்டுசென்றனர். அதன்பிறகு, முதல்வரின் தீர்க்கமான முடிவின்படியே, திருப்புகழ் நியமிக்கப்பட்டார். திருப்புகழ் நியமனத்தில் இறையன்புவுக்கு தொடர்பு கிடையாது. அவரது சகோதரர் என்பதற்காகவும் நியமிக்கப்படவில்லை. மேலும், இந்தக் குழுவின் தலைவர் பதவிக்கு சம்பளம் எதுவும் கிடையாது” என்று தெரிவிக்கிறார்கள் தலைமைச் செயலக அதிகாரிகள்.

 

 

சார்ந்த செய்திகள்

Next Story

''ஐஏஎஸ்' கனவை 'ஐஎஸ்ஐ' முத்திரை போல பதிய வைத்தவர்'' -சிலாகிக்கும் மக்கள் சிந்தனை பேரவை

Published on 01/07/2023 | Edited on 01/07/2023

 

"He who instilled the dream of 'IAS' in the youth like an 'ISI' stamp"-makkal sinthanai Council

 

தமிழகத்தின் தலைமைச் செயலாளராக செயல்பட்டு வந்த இறையன்பு நேற்றுடன் ஓய்வு பெற்றார். அதனையொட்டி தமிழகத்தின் புதிய தலைமைச் செயலாளராக சிவ்தாஸ் மீனாவை தமிழக அரசு நியமித்தது. நேற்று தலைமைச் செயலகத்தில் தனது பொறுப்புகளை சிவ்தாஸ் மீனாவிடம் முன்னாள் தலைமைச் செயலாளர் இறையன்பு ஒப்படைக்கும் நிகழ்வு நடைபெற்றது. 1990 ஆம் ஆண்டு பணியைத் துவங்கிய இறையன்பு, தனது 33 ஆண்டுகால பணியினை நேற்றுடன் நிறைவு செய்தார்.

 

இந்நிலையில் ஈரோட்டை சேர்ந்த 'மக்கள் சிந்தனை பேரவை' தலைவர் ஸ்டாலின் குணசேகரன் இறையன்பு குறித்து அறிக்கை ஒன்றை வெளியிட்டுள்ளார். அதில், 'ஆயிரக்கணக்கான தமிழக இளைஞர்களின் மனதில் 'ஐஏஎஸ்' கனவை 'ஐஎஸ்ஐ' முத்திரை போல பதிய வைத்தவர்' தமிழக மாணவர்கள் பலருக்கு தன்னம்பிக்கையூட்டி அவர்களை 'ஐஏஎஸ்' படிக்க தட்டியெழுப்பியவர். இவரால், இவரது உரைகளால், இவரது எழுத்துக்களால், ஐஏஎஸ் வெற்றி படிக்கட்டுகள் என்ற இவரது ஆழமும், அகலமுமான மிக அற்புத நூலின் தூண்டுதலால், பச்சை தமிழர் பலர் புகழ்மிக்க ஐ.ஏ.எஸ் அதிகாரிகளாக உருவெடுத்தனர். உயர்ந்தனர். 

 

"He who instilled the dream of 'IAS' in the youth like an 'ISI' stamp"-makkal sinthanai Council

 

அடங்காத அறிவுத்தாகம் கொண்ட இவர் ஐஏஎஸ் அதிகாரியாக வந்த பின்னர் மூன்று பிஹெச்டிகளை முடித்தவர். சிறிதும் பெரிதுமாக 100 நூல்களை எழுதி வெளியிட்டவர். சமீபத்தில் வெளியான 'மூளைக்குள் சுற்றுலா' என்ற 625 பக்கங்களை கொண்ட இவரது பெருநூல் ஒரு மணிமகுடம். மக்கள் சிந்தனை பேரவையின் சார்பில் தேர்வு செய்யப்பட்ட 125 கல்லூரி மாணவர்களுக்கான ஒரு நாள் பயிலரங்கில் 2014 இல் பங்கேற்றதோடு காலை 10 மணியிலிருந்து மாலை 6 மணி வரை நின்று கொண்டே மாணவர்களுக்கு ஆளுமை பயிற்சி எடுத்த இறையன்பு அவர்களின் உணர்வும், பண்பும் என்றென்றும் நினைத்து மகிழத்தக்கதாகும். 

 

பயிற்சி வகுப்பு எடுப்பதிலும், பயிற்சி கொடுப்பதிலும் அவருக்கு அளவற்ற ஈடுபாடு. வகுப்பின் நிறைவு பகுதியின் போது மாணவர்கள் அனைவரையும் பெயர் சொல்லி அழைத்ததை எண்ணி மாணவர்கள் மட்டுமல்ல, நாங்கள் அனைவருமே வியந்து போனோம். காலையில் அறிமுகப்படலத்தின் போது அவரவர் எழுந்து தங்களின் பெயர்களை உச்சரித்ததை மனதில் வைத்து மாலையில் அவர்களின் பெயர்களை நினைத்துச் சொல்லும் அவரின் நினைவாற்றல் பிரமிப்பை ஏற்படுத்தியது.

 

ஈரோடு புத்தகத் திருவிழாவில் இறையன்பு ஆற்றிய சொற்பொழிவுகள் அனைத்தும் தனித்தனியாக முத்திரை பதித்தவை. 2008 இல் 'ரௌத்திரம் பழகு' என்ற தலைப்பிலும் 2012 இல் 'நாம் ஏன் அடிமையானோம்' என்ற தலைப்பிலும், 2015 இல் 'வனநாயகம்' என்ற தலைப்பிலும் 2017 இல் ‘எது ஆன்மீகம்’ என்ற தலைப்பிலும், 2020 இல் 'பயணங்கள் முடிவதில்லை' என்ற தலைப்பிலும் உரை நிகழ்த்தியுள்ளார். ஒன்றுக்கொன்று சம்பந்தமில்லாத தலைப்புகள். ஆனால் தனிநூலாக வெளியிடும் தரத்திலும் தயாரிப்பிலும் நிகழ்த்தப்பட்ட ஆழமான ஆய்வுரைகள். இவை மக்கள் சிந்தனை பேரவைக்கு கிடைக்கப்பெற்ற அனுபவங்கள்.

 

"He who instilled the dream of 'IAS' in the youth like an 'ISI' stamp"-makkal sinthanai Council

 

ஒட்டுமொத்த தமிழ் மக்களுக்கு இதுபோன்ற ஆயிரமாயிரம் அனுபவங்கள் அவர் மூலம் கிட்டியுள்ளன. அரசு பணியாளராக அவர் ஆற்றிய நற்பணிகள் அந்தந்த பகுதிகளில் அவர் பெயரை காலகாலத்திற்கும் சொல்லும் கல்வெட்டுகள் போல் நிலைபெற்றிருக்கின்றன. உச்ச அதிகாரம் பெற்ற உயர் மனிதன் என்ற சுவடே இல்லாமல் இவரால் இயல்பாக நடந்துகொள்ள முடிந்துள்ளது. அதிகாரம் இவரின் கண்களை மறைத்ததில்லை. உயர் அதிகாரி என்ற பிம்பம் இவரின் உடல்மொழியில் ஒட்டவில்லை.

 

இறையன்பு ஐஏஎஸ் இப்போது தலைமைச் செயலாளர் பொறுப்பில் இருந்து பணிநிறைவு பெற்றுள்ளார். இனிமேல் இவரின் பணி, சுதந்திர தமிழ்நாட்டை உருவாக்கும் சூத்திரங்களை உள்ளடக்கியதாக விளங்கும். இவரின் அறிவும் ஆற்றலும் தன்னம்பிக்கையோடு தமிழக இளைஞர்களை விளங்க வைப்பதாக அமையும், அமைய வேண்டும். பதவியில் இருந்த காலத்தில் மக்கள் சிந்தனை பேரவையின் முன்னெடுப்புகளுக்கு முழு ஒத்துழைப்பை நல்கிய இவருக்கு இவரின் பணி நிறைவு நேரமே நன்றி சொல்வதற்கு ஏற்ற காலம் என்று கருதியே பேரவை சார்பில் இந்த அறிக்கையை பதிவிடுகிறோம். அவரின் வெற்றி பயணம் முழு வீச்சோடு தொடரும். தொடர வேண்டும்' என கூறப்பட்டுள்ளது.

 

 

Next Story

இறையன்புக்கு கோரிக்கை வைத்த ராமதாஸ்

Published on 01/07/2023 | Edited on 01/07/2023

 

Ramdas who requested God's favor

 

“மது, புகையிலை, போதைப் பொருட்களின் தீமைகளில் இருந்து இளைஞர்களை காப்பதற்கான பரப்புரையில் இறையன்பு ஈடுபட வேண்டும்” என பா.ம.க. நிறுவனர் மருத்துவர் இராமதாஸ் வேண்டுகோள் வைத்துள்ளார். 

 

இது குறித்து அவர் தனது ட்விட்டர் பக்கத்தில், “தமிழக அரசின் தலைமைச் செயலாளராக சிறப்பாக பணியாற்றி ஓய்வு பெற்றுள்ள வெ.இறையன்பு அவர்கள், எந்த அரசு பதவியையும் ஏற்கப் போவதில்லை என்றும், இளைஞர்கள் மற்றும் மாணவர்களின் முன்னேற்றத்திற்காக உழைக்கப் போவதாகவும் அறிவித்திருக்கிறார். அவர் எடுத்திருப்பது மிகவும் சரியான முடிவு. அதற்காக அவரை நான் பாராட்டுகிறேன்.

 

தமிழ்நாட்டின் இளைஞர் சமுதாயம் மது, புகையிலை, போதைப் பொருட்கள் ஆகிய முப்பெரும் அரக்கர்களிடம் சிக்கி சீரழிந்து வருகிறது. முப்பெரும் தீமைகளிடமிருந்து இளைஞர்களைக் காக்க அரசியல் ரீதியாக பாட்டாளி மக்கள் கட்சி போராடிக் கொண்டிருக்கிறது. இளைஞர்கள் மற்றும் மாணவர்கள் நலனில் அக்கறை கொண்டிருக்கும் வெ.இறையன்பு அவர்கள் மது, புகையிலை, போதைப் பொருட்களின் தீமைகளில் இருந்து இளைஞர்களை காப்பதற்காக அவர் வழியில் பரப்புரை செய்ய வேண்டும்; பாடுபட வேண்டும் என்று கேட்டுக் கொள்கிறேன். அது அவரை வளர்த்தெடுத்த தமிழ்ச் சமூகத்திற்கு அவர் செய்யும் கைம்மாறாக அமையும்” என்று பதிவிட்டுள்ளார்.