மோடி விரும்புவதை தமிழக மக்கள் விரும்பவில்லை! -விளாசிய ராகுல்!  

வாக்குவங்கி பலம் பற்றிக் கவலைப்படாமல், "ஒரு கை பார்ப்போம்'’என்ற பெயரில் தமிழகம் முழுதும் காங்கிரஸ் சார்பில் தேர்தல் பிரசாரம் நடந்து கொண்டிருக்கிறது. அதன் ஹைலைட்டாக, காங்கிரஸ் கட்சியின் முன்னாள் தலைவர் ராகுல் காந்தி கடந்த 23- ந் தேதி கோவைக்கு வந்தார்.

நேரு குடும்பத்தின்மீது தமிழக மக்களுக்கு எப்போதுமே ஈர்ப்பு உண்டு. காளப்பட்டி சாலை சந்திப்பில் திறந்த காரில் நின்று பேசிய ராகுல், ""தமிழகத்துக்கு வருவதில் நான் மிக்க மகிழ்ச்சி அடைகிறேன். இப்போது உள்ள பி.ஜே. பி அரசு. ஒரே மொழி, ஒரே கலாசாரம், ஒரே கொள்கைதான் இருக்க வேண்டும் என நினைத்து காய் நகர்த்துகிறது. ஆனால் அந்த காய் நகர்த்தலை எதிர்த்து தான் நாம் போராடி வருகிறோம்.

பிரதமர் நரேந்திர மோடி, தமிழக மக்களின் கலாசாரம், மொழிப் பற்று எதையும் மதிப்பது இல்லை. தமிழக மக்களை ரெண்டாம் தர குடி மக்களாக கருதுகிறார். இந்தியாவில் பன்முக கலாசாரம், மொழிகள், வாழ்க்கை முறைகள் உள்ளன. தமிழ், பெங்காலி, இந்தி அனைத்து மொழிகளையும் நாங்கள் சமமாகத்தான் நடத்துகிறோம். ஆனால் மோடி அப்படி அல்ல. அவர் இந்தியாவில் உள்ள 2, 3 பெரிய தொழில் அதிபர்களுக்காக ஆட்சி நடத்துகிறார். இதுதான் நமக்கும், மோடிக்கும் உள்ள வித்தியாசம்.

3 வேளாண்மை சட்டங்களை கொண்டு வந்திருக்கிறது மோடி அரசு. அந்த சட்டங்கள் , இந்தியாவில் பாரம்பரியமாக தொழில் செய்து வரும் விவசாயிகளை தொழிலதிபர்களின் வேலைக்காரர்களாக மாற்றும் சட்டங்கள். அதை திறம்பட மோடி வடிவமைத்து இருக் கிறார். தமிழகம்தான் எந்தவொரு விசயத்திற்கும் முன்னுதாரணமாக இருக்கிறது. இன்னும் இருக்கும்...'' என பலத்த கை தட்டல்க ளுக்கிடையே பேசி விட்டு... திருப்பூரை நோக்கி அவர் வாகனம் பறந்தது. போகும் வழியில் சின்னியம்பாளையத்தில் பேசிய ராகுல் காந்தி...

""ஆளும் தமிழக அரசை அச்சுறுத்துவதற்காக சி.பி.ஐ,- வருமானவரித் துறையை மோடி பயன்படுத்துகிறார். இதன் மூலம் தமிழக அரசை தன் கட்டுப்பாட்டில் வைக்க மோடி விரும்புவதை தமிழக மக்கள் விரும்பவில்லை.

என் பாட்டி, தந்தை ஆகியோர்மீது அதீத அன்பை தமிழக மக்கள் நீங்கள் வைத்து உள்ளீர்கள் என்பதை நான் அறிவேன். என் மீது அன்பும், நம்பிக்கையும் வைத்திருக்கிற நீங்கள் தமிழகத்தில் புதிய அரசு உருவாக வேண்டும் என்கிற எண்ணத்தையும் நான் அறிவேன். அந்த எண்ணத்தை நான் பூர்த்தி செய்வேன். தமிழ்நாடு இந்தியாவின் ஒரு பகுதி என மோடி நினைக்கிறார். ஆனால் தமிழ்நாடேதான் இந்தியாவாக இருக்கும்...'' என பேசி விட்டு திருப்பூர் அவினாசிப் பாளையத்தில் உள்ள ஒரு பேக்கரிக்குள் சென்றார் ராகுல்.

ராகுல் வந்திருக்கிறார் என்பதைத் தெரிந்து கொண்ட அங்கிருந்த மூதாட்டி ஒருவர்... ""என்னை மாதிரி வயசானவங்க சாப்பாட்டுக்குக்கூட வழியில்லாம நிக்கறோம்''னு சொல்ல.. ""அடுத்து வரும் ஆட்சி உங்களை காப்பாத்தும்... அதற்கு நான் சாட்சி...'' என சொல்லி அந்த மூதாட்டியை ஆறுதல் படுத்தினார். பேக்கரிக்குள் வந்த எல்லோரும் ராகுலுடன் செல்பி எடுத்துக் கொண்டார்கள். சளைக்காமல் போட்டோவுக்கு போஸ் கொடுத்து விட்டு... எல்லோருடனும் கைக்குலுக்கி விட்டு தன் பயணத்தை தொடர்ந்தார் ராகுல்.

தமிழ்நாட்டில் காங்கிரஸ் ஆட்சியை இழந்து அரை நூற்றாண்டுக்கு மேல் ஆன நிலையில், அதன் வாக்கு வங்கியும் குறைந்துகொண்டே வந்தது. அருகில் உள்ள புதுச்சேரியில் ஆட்சியில் இருந்தாலும், கூட்டணிக் கட்சியான தி.மு.க. தன் பலத்தைப் பெருக்கும் வகையில் தேர்தல் வியூகங்களை வகுத்துள்ளது. இந்நிலையில், தமிழகத்தில் இருக்கும் காங்கிரசின் செல்வாக்கைத் தக்க வைக்கவும், தி.மு.க. கூட்டணியில் தனக்கான இடங்களைப் பெறவும் ராகுல் வருகை பயன்படும் என நம்புகிறார்கள் தமிழக காங்கிரஸ் தலைவர்கள். கமல் போன்ற கட்சிகளுடனான கூட்டணிக்கும் இந்தப் பயணம் பயன்படும் என எதிர்பார்க்கப்படுகிறது.

ஈரோடு சென்ற அவருக்கு பெருந்துறை விவசாய மக்கள் கை காட்டி ஆர்ப்பரிப்பு செய்தனர். பின்னர் ஈரோட்டில் பேசிய ராகுல்... "சிறு, குறு தொழிற்கூடங்கள் மூடப்பட்டுள்ளன. அதை அடுத்து வரும் ஆட்சி சரி செய்யும். இந்த தமிழகத்தை நான் பிறந்த மண்ணாக உணர்கிறேன்.

நான் இந்த தமிழகத்திற்கு அடுத்த முறை வரும் போது... நல்ல ஆட்சியாளர்தான் இந்த தமிழ் நாட்டை ஆண்டு கொண்டிருப்பார்...'' என முத்தாய்ப்பாய் பேசி கை சின்னத்தை காட்டி விட்டு கிளம்பினார். பகல் நேர சூரிய வெளிச்சம் அவர் மீது படர்ந்திருந்தது.