காவல் உதவி ஆய்வாளருக்கு மிரட்டல்: தனியார் நிறுவன பெண் ஊழியர் கைது!

Published on 13/10/2017 | Edited on 13/10/2017

காவல் உதவி ஆய்வாளருக்கு மிரட்டல்:

தனியார் நிறுவன பெண் ஊழியர் கைது!

கோவையை மாநகர எல்லையிலுள்ள மதுக்கரையில் ஏற்றுமதி நிறுவனம் நடத்தி வருபவர் விகாஸ். இவரது நிறுவனத்தில் கணக்காளராகப் பணியாற்றி வருபவர் ஷியாமா (வயது-28). விகாஸ், அவரது நண்பர் ரமேஷ் ஆகியோருக்கு இடையே பணம் கொடுக்கல் வாங்கல் பிரச்னை இருந்து வந்துள்ளது.

இதுதொடர்பாக இரு தரப்பினரும் அளித்த புகாரின் பேரில் புலியகுளம் போலீஸார் இருதரப்பினரையும் நேரில் அழைத்து விசாரணை நடத்தி வந்தனர்.

நேற்று மதியம் காவல் நிலையத்தில் போலீஸார் விசாரணை நடத்திக் கொண்டிருந்தபோது, அதை ஷியாமா அவரது செல்லிடப்பேசியில் பதிவு செய்துள்ளார். இதைப் பார்த்த பெண் உதவி ஆய்வாளர் பிரபாவதி அவரை அழைத்து, “காவல் நிலையத்தில் இதுபோல செய்யக்கூடாது...” என்று எச்சரித்துள்ளார்.

அப்போது, இருவருக்கும் இடையே வாக்குவாதம் ஏற்பட்டுள்ளது. இதையடுத்து ஆவேசமடைந்த ஷியாமா உதவி ஆய்வாளர் பிரபாவதியை மிரட்டியும், அவதூறாக பேசியதாகவும் கூறப்படுகிறது.

இதுகுறித்து உதவி ஆய்வாளர் பிரபாவதி அளித்த புகாரின்பேரில் ஷியாமாவை புலியகுளம் போலீஸார் கைது செய்து விசாரணை மேற்கொண்டுள்ளனர்.

- சிவசுப்பிரமணியம்