Skip to main content

கங்குலி தேர்வு செய்துள்ள 4 ஆம் வரிசை வீரர் யார் தெரியுமா?

Published on 16/03/2019 | Edited on 16/03/2019

மற்றவர்கள் என்ன சொல்வார்களோ என்று  நினைக்காமல் தன்னுடைய கருத்துகளை பதிவு செய்யும் கிரிக்கெட் வீரர்களில் ஒருவர் முன்னாள் ஜாம்பவான் கங்குலி. 
 

ganguly


 

நம்பர் 1 பேட்ஸ்மேன், நம்பர் 1 பவுலர் கொண்ட இந்திய அணி சுமாரான மிடில் ஆர்டர் பேட்டிங் யூனிட்டைகொண்டுள்ளது. அதிலும் யார் நம்பர் 4 என்பதற்கு இன்னும் தீர்வு கிடைக்காமல் உள்ளது. இந்த நிலையில் தன்னுடைய பாணியில் சர்ப்ரைஸ் தரும் வகையில் ஒரு வீரரை நம்பர் 4 இடத்திற்கு பரிந்துரை செய்துள்ளார் கங்குலி.
 

கடந்த சில மாதங்களாக தினேஷ்கார்த்திக், ராயுடு, விஜய் சங்கர், ரிஷாப் பண்ட் என பல வீரர்கள் அந்த இடத்தில் விளையாடியுள்ளனர். அவர்களில் ராயுடு தொடர்ந்து அந்த இடத்தில் விளையாடி வந்தார். ஆனால் தற்போது நடந்து முடிந்த ஆஸ்திரேலியா தொடரில் 3 போட்டிகளில் 33 ரன்கள் மட்டுமே எடுத்தார். இது பெரும் ஏமாற்றத்தை அளித்தது.
 

விஜய் சங்கர் தற்போது சிறப்பாக விளையாடி வரும் நிலையில் 4-வது இடத்தில் அவரை களமிறக்கலாம். விஜய் சங்கர் ஆல்ரவுண்டராக இருப்பதால் பவுலிங்கிலும் பங்களிப்பார். இப்படி 4-வது இடத்தில் இறங்கும் வீரர் பற்றி பல கருத்துகள் வெளிவரும் நிலையில் இந்திய அணியின் முன்னாள் கேப்டன் கங்குலி புஜாராவை நம்பர் 4 வீரராக களமிறக்கலாம் என்று கூறியுள்ளார்.
 

என்னுடைய சாய்ஸ் பலருக்கு ஆச்சரியமாகவும், சிரிப்பாகவும் இருக்கலாம். இதுவரை நம்பர்4-க்கு முயற்சி செய்த வீரர்களை ஒப்பிடும்போது புஜாரா சிறந்தவர். அவருடைய பீல்டிங் பலவீனம் தான். ஆனால் மிகச்சிறந்த பேட்ஸ்மேன் என்று கங்குலி தெரிவித்துள்ளார்.
 

டாப் ஆர்டர் பேட்ஸ்மேன்கள் விரைவாக அவுட் ஆகும் போது நிலையாக விளையாடும் வீரர் 4-வது இடத்தில் இறங்க வேண்டும். டெஸ்ட் போட்டிகளில் வெளிநாடுகளில் பல முறை இந்திய அணியை இக்கட்டான சூழ்நிலையில் வெற்றி பெற வைத்துள்ளார் புஜாரா. இந்த அனுபவம் புஜாராவிற்கு உதவும் என்று கங்குலியின் கருத்துக்கு ஆதரவு பெருகி வருகிறது.
 

ஒருநாள் போட்டிகளில் டிராவிட் இந்திய அணிக்கு சிறப்பாக விளையாடிய நிலையில் புஜாராவால் அந்த இடத்தில் விளையாட முடியும் என்று கங்குலி கூறினார். புஜாரா 5 ஒருநாள் போட்டிகளில் விளையாடி 51 ரன்கள் மட்டுமே எடுத்துள்ளார். ஆனால் டெஸ்ட் போட்டிகளில் ஃபாஸ்ட் பவுலிங்கிற்கு சாதகமான மைதானங்களில் பலமுறை சிறப்பாக விளையாடியுள்ளார் புஜாரா.

 


 

Next Story

“மீண்டு வர சிறிது காலம் ஆகும்” - மருத்துவமனையில் முகமது ஷமி

Published on 28/02/2024 | Edited on 28/02/2024
Mohammed Shami tweet after surgery

இந்திய கிரிக்கெட் அணியின் முன்னணி பந்து வீச்சாளர் முகமது ஷமி. கடந்த ஆண்டு நடைபெற்ற உலகக் கோப்பை கிரிக்கெட் தொடர்களில் அதிக விக்கெட் வீழ்த்திய வீரராக சாதனை படைத்தார். அந்த போட்டிகளில் விளையாடிய போதே, முகமது ஷமியின் இடது கணுக்காலில் காயம் ஏற்பட்டது. அதனால், ஒவ்வொரு போட்டியிலும் அவர், காயத்திற்கான ஊசி செலுத்திக்கொண்டு விளையாடி வந்தார் என்று கூறப்படுகிறது. 

இதனையடுத்து, ஆஸ்திரேலியாவுக்கு எதிரான இறுதிப் போட்டியில் கடைசியாக இந்தியாவுக்காக விளையாடி வந்த முகமது ஷமி, அதன் பின் லண்டனுக்கு சென்று கணுக்கால் காயத்துக்கு சிகிச்சை பெற்று வந்தார். ஆனால், அவருக்கு அளிக்கப்பட்ட சிகிச்சை பலன் அளிக்காத காரணத்தினால், அறுவை சிகிச்சை செய்ய வேண்டிய கட்டாயம் ஏற்பட்டது. இதனால், இங்கிலாந்து அணிக்கு எதிரான தொடரிலும் முகமது ஷமி தேர்வு செய்யப்படவில்லை. 

இந்த நிலையில், நேற்று முன்தினம் (26-02-24) லண்டனில் உள்ள மருத்துவமனை ஒன்றில் முகமது ஷமிக்கு வெற்றிகரமாக அறுவை சிகிச்சை மேற்கொள்ளப்பட்டது. சிகிச்சைக்கு பின்னர் தனது புகைப்படத்தை எக்ஸ் (ட்விட்டர்) பக்கத்தில் பகிர்ந்து, அறுவை சிகிச்சை வெற்றிகரமாக முடிந்துள்ளதாகத் தெரிவித்துள்ளார். இது தொடர்பாக அவர் வெளியிட்ட பதிவில், “வெற்றிகரமாக அறுவை சிகிச்சை முடிந்தது. குணமடைய சிறிது காலம் ஆகும். மீண்டு வருவதற்கு ஆவலோடு காத்திருக்கிறேன்” என்று பதிவிட்டுள்ளார்.

இதனையடுத்து, அறுவை சிகிச்சை செய்து கொண்ட முகமது ஷமிக்கு பிரதமர் மோடி வாழ்த்துகளைத் தெரிவித்துள்ளார். இது தொடர்பாக அவர் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “நீங்கள் விரைவில் குணமடைந்து நல்ல ஆரோக்கியத்துடன் இருக்க வாழ்த்துகிறேன் முகமது ஷமி. மிகவும் தைரியத்துடன் இந்த காயத்தை நீங்கள் சமாளிப்பீர்கள் என்று நான் நம்புகிறேன்” என்று தெரிவித்துள்ளார்.

முகமது ஷமி அறுவை சிகிச்சை மேற்கொண்டுள்ளதால், அடுத்த மாதம் நடைபெறும் ஐ.பி.எஸ் தொடரிலும் ஜூன் மாதம் அமெரிக்கா, மேற்கு இந்திய தீவுகளில் நடைபெற உள்ள ஐசிசி டி20 கிரிக்கெட் உலகக் கோப்பை தொடரிலும் அவர் விளையாட வாய்ப்பில்லை என்று கூறப்படுகிறது. இது அவரது ரசிகர்கள் மத்தியில் பெரும் சோகத்தை ஏற்படுத்தியுள்ளது.

Next Story

சாதனை படைத்த அஸ்வின்; “சென்னையின் மைந்தன்” - தமிழக முதல்வர் வாழ்த்து

Published on 16/02/2024 | Edited on 16/02/2024
Greetings from the Chief Minister of Tamil Nadu Accomplished by cricket player Ashwin

இங்கிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டு 5 டெஸ்ட் போட்டிகள் கொண்ட தொடரில் விளையாடி வருகிறது. இதில், முதல் இரு டெஸ்ட் போட்டிகளிலும், இந்திய அணியும் இங்கிலாந்து அணியும் தலா ஒரு வெற்றியைப் பதிவு செய்தன. இதனையடுத்து, நேற்று (15ம் தேதி) குஜராத் மாநிலம், ராஜ்கோட் மைதானத்தில் மூன்றாவது டெஸ்ட் போட்டி துவங்கியது. இந்த போட்டியின் முதல் இன்னிங்ஸில் இங்கிலாந்து வீரர் ஜாக் கிராலியின் விக்கெட்டை இந்திய அணி வீரர் அஸ்வின் வீழ்த்தினார். 

இந்த விக்கெட்டை வீழ்த்தியதன் மூலம் டெஸ்ட் போட்டியில் 500 விக்கெட்களை வீழ்த்திய வீரர் என்ற வரலாற்றுச் சாதனையை அஸ்வின் படைத்துள்ளார். 87 இன்னிங்ஸ்களில் ஸ்ரீலங்கா வீரர் முரளிதரன் 500 விக்கெட்களை வீழ்த்தி சாதனை படைத்த நிலையில், தற்போது 98 இன்னிங்ஸ்களில் இந்திய வீரர் அஸ்வின் 500 விக்கெட்களை வீழ்த்தியுள்ளார். அஸ்வினின் இந்த சாதனைக்கு பலரும் தங்கள் வாழ்த்துகளைத் தெரிவித்து வருகின்றனர். 

அந்த வகையில் தமிழக முதல்வர் மு.க. ஸ்டாலின், இந்திய கிரிக்கெட் அணி வீரர் அஸ்வினுக்கு வாழ்த்துகளைத் தெரிவித்துள்ளார். இது குறித்து முதல்வர் மு.க. ஸ்டாலின் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “டெஸ்ட் கிரிக்கெட் வரலாற்றில் தனது 500வது விக்கெட்டை பெற்ற அஸ்வினுக்கு வாழ்த்துகள். சாதனைகளை முறியடித்து கனவுகளை நனவாக்கியவர் சென்னையின் மைந்தன் அஸ்வின். அவரின் பந்துவீச்சில் திறமை, தீர்க்கமான இலக்கு வெளிப்படுகிறது. இது உண்மையான மைல்கல்லைக் குறிக்கிறது. அவரது மாயாஜால பந்துவீச்சு, 500வது விக்கெட்டை கைப்பற்ற உதவியுள்ளது. அவர் மேலும் ஏராளமான விக்கெட்டுகளை வீழ்த்தி வெற்றிகளைக் குவிக்க வாழ்த்துகள்’ என்று குறிப்பிட்டுள்ளார்.