Skip to main content

கிரிக்கெட் தந்த நட்பு! : இந்தியா - பாகிஸ்தான் ரசிகர்கள் பெருமிதம்

Published on 27/09/2018 | Edited on 27/09/2018
Sudhir

 

 

 

இந்தியா - பாகிஸ்தான் அணிகள் மோதும் போட்டி என்றாலே, உலக அளவில் மிகப்பெரிய எதிர்பார்ப்புகள் நிலவுவது வழக்கம். இரண்டு நாடுகளுக்கு இடையிலான பிரச்சனைகள், அதன் ஊடான விவாதங்கள் என அனைத்தையும் முடிச்சுப் போட்டு, விளையாட்டைத் தாண்டியும் உணர்வு சார்ந்த விஷயமாகவே பார்க்கப்படுகிறது. 
 

 

 

இந்நிலையில், சாம்பியன்ஸ் கோப்பைத் தொடருக்குப் பிறகு, இந்திய அணி ஆசியக் கோப்பை தொடரில்தான் மீண்டும் எதிர்கொண்டன. இந்தத் தொடரில் இரு அணிகளும் மோதிய இரண்டு போட்டிகளிலுமே வென்றது. இந்திய அணியில் சச்சின் தெண்டுல்கரின் ரசிகரான சுதிர் குமார், இந்தியா விளையாடும் எல்லா போட்டிகளிலும் கலந்துகொள்வார். சச்சின் அவருக்கான செலவுகளை ஏற்றுக்கொள்வார். ஆனால், தற்போது சச்சின் லண்டனில் இருப்பதால், இந்தமுறை நடக்கும் ஆசியக் கோப்பை தொடரைக் காணமுடியாதோ என்ற ஏக்கத்தில் இருந்தார் சுதிர். 
 

பீகார் மாநிலத்தைச் சேர்ந்த சுதிருக்கு, திடீரென அழைப்பு வந்தது. பாகிஸ்தானில் இருந்து அழைத்திருந்த அவரது நண்பர் முகமது பஷீர் ஆசிய கோப்பை தொடரைக் காண வரவில்லையா என்று கேட்டிருக்கிறார். சுதீர் நிலைமை விளக்க, அவரது முழுச் செலவையும் தாமே ஏற்றுக்கொள்வதாக பஷீர் தெரிவித்திருக்கிறார். தற்போது இருவரும் ஒரே அறையில் தங்கியிருந்து முழு தொடரையும் கண்டுகளித்து வருகின்றனர். 
 

என்னதான் நண்பர்களாக இருந்தாலும், போட்டி தொடங்கிவிட்டால் அவரவர் சொந்த நாடுகளுக்கு ஆதரவளிப்பதும், போட்டி முடிந்த பின்னர் மீண்டும் நட்பு பாராட்டிக் கொள்வதுமாக இவர்கள் பழகிவருகிறார்கள். என்னதான் இரு நாடுகளையும் ஏராளமான காரணங்களைச் சொல்லி பிரித்திருந்தாலும், கிரிக்கெட் அந்த எல்லையைச் சுருக்கி எங்களை நண்பர்களாக்கி இருக்கிறது என்கிறார் பஷீர். 2011-ம் ஆண்டு உலகக்கோப்பையின் போது இந்த இருவரும் சந்தித்து நண்பர்களாகி உள்ளனர். அந்த நட்பு இன்றும் தொடர கிரிக்கெட் காரணமாகி உள்ளது. 
 

Next Story

“மீண்டு வர சிறிது காலம் ஆகும்” - மருத்துவமனையில் முகமது ஷமி

Published on 28/02/2024 | Edited on 28/02/2024
Mohammed Shami tweet after surgery

இந்திய கிரிக்கெட் அணியின் முன்னணி பந்து வீச்சாளர் முகமது ஷமி. கடந்த ஆண்டு நடைபெற்ற உலகக் கோப்பை கிரிக்கெட் தொடர்களில் அதிக விக்கெட் வீழ்த்திய வீரராக சாதனை படைத்தார். அந்த போட்டிகளில் விளையாடிய போதே, முகமது ஷமியின் இடது கணுக்காலில் காயம் ஏற்பட்டது. அதனால், ஒவ்வொரு போட்டியிலும் அவர், காயத்திற்கான ஊசி செலுத்திக்கொண்டு விளையாடி வந்தார் என்று கூறப்படுகிறது. 

இதனையடுத்து, ஆஸ்திரேலியாவுக்கு எதிரான இறுதிப் போட்டியில் கடைசியாக இந்தியாவுக்காக விளையாடி வந்த முகமது ஷமி, அதன் பின் லண்டனுக்கு சென்று கணுக்கால் காயத்துக்கு சிகிச்சை பெற்று வந்தார். ஆனால், அவருக்கு அளிக்கப்பட்ட சிகிச்சை பலன் அளிக்காத காரணத்தினால், அறுவை சிகிச்சை செய்ய வேண்டிய கட்டாயம் ஏற்பட்டது. இதனால், இங்கிலாந்து அணிக்கு எதிரான தொடரிலும் முகமது ஷமி தேர்வு செய்யப்படவில்லை. 

இந்த நிலையில், நேற்று முன்தினம் (26-02-24) லண்டனில் உள்ள மருத்துவமனை ஒன்றில் முகமது ஷமிக்கு வெற்றிகரமாக அறுவை சிகிச்சை மேற்கொள்ளப்பட்டது. சிகிச்சைக்கு பின்னர் தனது புகைப்படத்தை எக்ஸ் (ட்விட்டர்) பக்கத்தில் பகிர்ந்து, அறுவை சிகிச்சை வெற்றிகரமாக முடிந்துள்ளதாகத் தெரிவித்துள்ளார். இது தொடர்பாக அவர் வெளியிட்ட பதிவில், “வெற்றிகரமாக அறுவை சிகிச்சை முடிந்தது. குணமடைய சிறிது காலம் ஆகும். மீண்டு வருவதற்கு ஆவலோடு காத்திருக்கிறேன்” என்று பதிவிட்டுள்ளார்.

இதனையடுத்து, அறுவை சிகிச்சை செய்து கொண்ட முகமது ஷமிக்கு பிரதமர் மோடி வாழ்த்துகளைத் தெரிவித்துள்ளார். இது தொடர்பாக அவர் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “நீங்கள் விரைவில் குணமடைந்து நல்ல ஆரோக்கியத்துடன் இருக்க வாழ்த்துகிறேன் முகமது ஷமி. மிகவும் தைரியத்துடன் இந்த காயத்தை நீங்கள் சமாளிப்பீர்கள் என்று நான் நம்புகிறேன்” என்று தெரிவித்துள்ளார்.

முகமது ஷமி அறுவை சிகிச்சை மேற்கொண்டுள்ளதால், அடுத்த மாதம் நடைபெறும் ஐ.பி.எஸ் தொடரிலும் ஜூன் மாதம் அமெரிக்கா, மேற்கு இந்திய தீவுகளில் நடைபெற உள்ள ஐசிசி டி20 கிரிக்கெட் உலகக் கோப்பை தொடரிலும் அவர் விளையாட வாய்ப்பில்லை என்று கூறப்படுகிறது. இது அவரது ரசிகர்கள் மத்தியில் பெரும் சோகத்தை ஏற்படுத்தியுள்ளது.

Next Story

சாதனை படைத்த அஸ்வின்; “சென்னையின் மைந்தன்” - தமிழக முதல்வர் வாழ்த்து

Published on 16/02/2024 | Edited on 16/02/2024
Greetings from the Chief Minister of Tamil Nadu Accomplished by cricket player Ashwin

இங்கிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டு 5 டெஸ்ட் போட்டிகள் கொண்ட தொடரில் விளையாடி வருகிறது. இதில், முதல் இரு டெஸ்ட் போட்டிகளிலும், இந்திய அணியும் இங்கிலாந்து அணியும் தலா ஒரு வெற்றியைப் பதிவு செய்தன. இதனையடுத்து, நேற்று (15ம் தேதி) குஜராத் மாநிலம், ராஜ்கோட் மைதானத்தில் மூன்றாவது டெஸ்ட் போட்டி துவங்கியது. இந்த போட்டியின் முதல் இன்னிங்ஸில் இங்கிலாந்து வீரர் ஜாக் கிராலியின் விக்கெட்டை இந்திய அணி வீரர் அஸ்வின் வீழ்த்தினார். 

இந்த விக்கெட்டை வீழ்த்தியதன் மூலம் டெஸ்ட் போட்டியில் 500 விக்கெட்களை வீழ்த்திய வீரர் என்ற வரலாற்றுச் சாதனையை அஸ்வின் படைத்துள்ளார். 87 இன்னிங்ஸ்களில் ஸ்ரீலங்கா வீரர் முரளிதரன் 500 விக்கெட்களை வீழ்த்தி சாதனை படைத்த நிலையில், தற்போது 98 இன்னிங்ஸ்களில் இந்திய வீரர் அஸ்வின் 500 விக்கெட்களை வீழ்த்தியுள்ளார். அஸ்வினின் இந்த சாதனைக்கு பலரும் தங்கள் வாழ்த்துகளைத் தெரிவித்து வருகின்றனர். 

அந்த வகையில் தமிழக முதல்வர் மு.க. ஸ்டாலின், இந்திய கிரிக்கெட் அணி வீரர் அஸ்வினுக்கு வாழ்த்துகளைத் தெரிவித்துள்ளார். இது குறித்து முதல்வர் மு.க. ஸ்டாலின் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “டெஸ்ட் கிரிக்கெட் வரலாற்றில் தனது 500வது விக்கெட்டை பெற்ற அஸ்வினுக்கு வாழ்த்துகள். சாதனைகளை முறியடித்து கனவுகளை நனவாக்கியவர் சென்னையின் மைந்தன் அஸ்வின். அவரின் பந்துவீச்சில் திறமை, தீர்க்கமான இலக்கு வெளிப்படுகிறது. இது உண்மையான மைல்கல்லைக் குறிக்கிறது. அவரது மாயாஜால பந்துவீச்சு, 500வது விக்கெட்டை கைப்பற்ற உதவியுள்ளது. அவர் மேலும் ஏராளமான விக்கெட்டுகளை வீழ்த்தி வெற்றிகளைக் குவிக்க வாழ்த்துகள்’ என்று குறிப்பிட்டுள்ளார்.