Skip to main content

ஓபிஎஸ் -ன் துஷ்பிரயோகம்! திமுக வழக்கின் முழு விபரம்!

Published on 16/07/2018 | Edited on 16/07/2018
pannerselvam

 

பொது ஊழியர் என்ற அமைச்சர் பதவியை துஷ்பிரயோகப்படுத்தி வருமானத்திற்கு அதிகமாக சொத்துக்கள் குவித்த துணை முதலமைச்சர் ஓ.பன்னீர்செல்வம்மீது சட்டபூர்வ குற்ற நடவடிக்கை எடுக்க ஊழல் தடுப்பு மற்றும் கண்காணிப்பு துறை இயக்குனருக்கு உத்திரவிடக்கோரி உயர் நீதிமன்றத்தில் திமுக அமைப்புச் செயலாளர் ஆர்.எஸ்.பாரதி எம்.பி. வழக்கு தாக்கல் செய்துள்ளார்.

 

இவழக்கு மனுவில் ஆர்.எஸ்.பாரதி கூறியிருப்பதாவது:
ஊழல்தடுப்பு சட்டத்தின் கீழ் தண்டனை வழங்கப்பட்டதை தொடர்ந்து  ஜெயலலிதா தனது முதலமைச்சர் பதவியில் இருந்து விலகியதால், அதனையடுத்து ஓ.பன்னீர்செல்வம்   29.09.2001 முதல் ௦1.03.2002 வரை தமிழக முதலமைச்சராக பதவி வகித்தார் அதன் பின்பு பொதுப்பணித்துறை அமைச்சராகவும், நிதி அமைச்சராகவும் பதவி வகித்தார். சொத்து குவிப்பு வழக்கில்  ஜெயலலிதாவிற்கு தண்டனை வழங்கப்பட்டதை தொடர்ந்து 28.09.2014 முதல் 22.05.2015 மீண்டும் தமிழக முதலமைச்சராக பதவி வகித்தார். 2016 ஆம் ஆண்டு போடிநாயக்கனூர் தொகுதியிலிருந்து அ.தி.மு.க. சட்ட மன்ற உறுப்பினராக தேர்ந்தெடுக்கப்பட்டு நிதியமைச்சராக பதவி வகித்த நிலையில், செல்வி. ஜெயலலிதாவின் இறப்பை தொடர்ந்து 06.12.2016 முதல் தான் ராஜினாமா செய்த நாளான 05.02.2017 வரை மீண்டும் தமிழக முதலமைச்சராக ஓ.பன்னீர்செல்வம் பதவி வகித்தார். 21.08.2017ஆம் தேதி எடப்பாடி பழனிசாமி தலைமையிலான அமைச்சரவையில் அமைச்சராக பதவி ஏற்று தற்பொழுது துணை முதலமைச்சராக பதவி வகித்து வருகிறார்.  

 

இந்திய தண்டனைச் சட்டம், ஊழல் தடுப்புச் சட்டம் ஆகியவற்றின் கீழ் “பொது ஊழியர்” (PUBLIC SERVANT) என்ற விளக்கத்திற்குள் வருகின்ற துணை முதலமைச்சர் பதவியை வகித்து வருகிறார்.

 

     ஓ.பன்னீர்செல்வம் மாநில அமைச்சர் என்ற அதிகாரத்தை துஷ்பிரயோகப் படுத்தி சட்ட விரோதமாக சொத்துக்களை குவித்து தனது மனைவி, பிள்ளைகள், சகோதரர்கள் அவர்களது குடும்ப உறுப்பினர்கள், சுப்புராஜ் என்கிற தனது நண்பர் உள்ளிட்ட பல்வேறு நபர்களின் பேரில் அதிக அளவிலான சொத்துக்களை வாங்கியும் கோடிக்கணக்கான பணத்தை முதலீடு செய்தும் உள்ளார்.

 

     சட்டமன்ற உறுப்பினராக தனக்கு கிடைக்கும் சம்பளத்தை விட குறைவான தொகையை தனது வருமானமாக வேட்புமனுவுடன் தாக்கல் செய்த உறுதிமொழி ஆவணத்தில் கூறியுள்ளார். குறைவான வருமானத்தை காட்டிய அதே நேரத்தில் அதைவிட மூன்று மடங்கு அதிகமுள்ள விலையுயர்ந்த கார் ஒன்றை வாங்கியுள்ளதாக தெரிவித்து உள்ளார்.

 

     தனது குடும்ப பாகப்பிரிவினையின் மூலம் கிடைத்த சொத்துக்கள் குறித்து வேட்புமனுவுடன் தாக்கல் செய்த உறுதிமொழி ஆவணத்தில் குறிப்பிடவில்லை. தனது மனைவியின் பெயரில் வாங்கப்பட்ட சொத்துக்கள் குறித்து விவரங்கள் தெரிவிக்கப்படவில்லை. 2016 - ஆம் ஆண்டு பொது தேர்தலில் தான் போட்டியிட்டபோது தாக்கல் செய்த வேட்பு மனுவுடனான  உறுதிமொழி ஆவணத்தில் தனது பெயரில் உள்ள சொத்துக்களை அவர் முழுமையாக குறிப்பிடவில்லை.

 

     தனது மகன்களான ரவீந்திரநாத் குமார், ஜெயப்ரதீப் மற்றும் மகள் கவிதாபானு ஆகியோர் இந்தியாவில் மட்டுமல்லாது அமெரிக்கா, துருக்கி, இந்தோனேஷியா மற்றும் மலேஷியா ஆகிய நாடுகளில் உள்ள நிறுவனங்களில் ரூபாய் 200 கோடிக்கும் மேல் முதலீடு செய்துள்ளனர். 25 வயது கூட நிரம்பாத அவரது மகன் 3 நிறுவனங்களில் இயக்குனராக செயல்பட்டு வருகிறார்.

 

     அவரது மகன்கள் இயக்குனர்களாக உள்ள நிறுவனங்களில் மற்ற இயக்குனர்களுக்கு கொடுக்கப்படும் சம்பளத்தை விட மூன்று மடங்கு சம்பளம் இவர்களுக்கு வழங்கப்பட்டுளது. இவரது குடும்ப உறுப்பினர்கள் இயக்குனர்களாக உள்ள பல்வேறு நிறுவனங்கள் சட்டத்திற்கு உட்பட்டு செயல்படவில்லை, ஓ.பன்னீர்செல்வம் மற்றும் அவரை சார்ந்தவர்களுக்கு சொத்துக்களை சட்ட விரோதமாக சேர்க்கும் விதத்திலேயே செயல்பட்டு வருகின்றன.

 

     எஸ்.ஆர்.எஸ். நிறுவனம் என்கிற பெயரில் நிறுவனம் நடத்தி வரும் சேகர் ரெட்டி மூலம் சட்ட விரோதமாக பலன் அடைந்த நபர்களின் பட்டியலில் ஓ.பன்னீர்செல்வத்தின் பெயரும் இடம் பெற்றுள்ளது. 2016 ஆம் ஆண்டு ஜூன் மாதத்திலிருந்து நவம்பர் மாதத்திற்குள் சுமார் நான்கு கோடிரூபாய் சட்ட விரோதமாக பெற்றுள்ளது அவர்களது டைரியில் குறிப்பிடப்பட்டுள்ளது. தனது மகன்கள் இயக்குனர்களாக உள்ள நிறுவனங்களுக்கு கூடுதல் மதிப்பீட்டு வரியில் சலுகை அளிக்கும் விதமாக முதலமைச்சராக இருந்த 2015 ஆம் ஆண்டு ஓர் அரசாணை வெளியிடப்பட்டு அதன் மூலம் அந்த நிறுவனம் சட்ட விரோதமாக பலன் அடைந்து உள்ளது.

 

     இது சம்பந்தமாக ஊழல் தடுப்பு மற்றும் கண்காணிப்பு இயக்குனரிடம் கடந்த மார்ச் மாதம் அனைத்து விபரங்களும் அடங்கிய புகார் கொடுக்கப்பட்டு, அமைச்சர் பதவியை துஷ்பிரயோகப்படுத்தி, சட்டவிரோதமான முறையில் வருமானத்திற்கு அதிகமாக சொத்துக்களை குவித்த  ஓ.பன்னீர்செல்வம் மீதும் அவரது பினாமிகள் மீதும் ஊழல் தடுப்புச் சட்டம், வருமான வரிச் சட்டம், இந்திய தண்டனைச் சட்டம் உள்ளிட்ட சட்டங்களின் படி குற்ற நடவடிக்கை எடுக்க கோரியிருந்தோம் ஆனால் இதுவரை எந்த நடவடிக்கையும் எடுக்கவில்லை ஆகவே அவர்கள் மீது நடவடிக்கை எடுக்க ஊழல் தடுப்பு மற்றும் கண்காணிப்பு துறை இயக்குனருக்கு உத்திரவிடக்கோரி சென்னை உயர் நீதிமன்றத்தில்  மனு தாக்கல் செய்யப்பட்டுள்ளது. இந்த மனு விரைவில் விசாரணைக்கு வரவுள்ளது .

 

`     இதே போன்று தமிழக முதலமைச்சர் எடப்பாடி பழனிச்சாமி தனது பதவியை துஷ்பிரயோகப்படுத்தி தனது உறவினர்கள் நடத்தி வரும் நிறுவனங்களுக்கு சுமார் 1000 கோடி ரூபாய்க்கு  மேல்   மதிப்புள்ள  நெடுஞ்சாலை துறை ஒப்பந்தங்களை  சட்ட விரோதமாக வழங்கியது குறித்தும் விசாரணை நடத்தி உரிய நடவடிக்கை எடுக்கக்கோரி ஊழல் தடுப்பு மற்றும் கண்காணிப்பு துறை இயக்குனருக்கு புகாரளித்தும் அதன் மீதும் இதுவரை எந்தவித நடவடிக்கை எடுக்கவில்லை என்பதும் குறிப்பிடத்தக்கது.


 

சார்ந்த செய்திகள்

Next Story

ட்ரோல் செய்ய வந்த இடத்தில் ட்ரோலில் சிக்கிய அ.தி.மு.க. சரவணன்

Published on 29/03/2024 | Edited on 29/03/2024
ADMK Saravanan got trolled where he came to troll

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

அதிமுக சார்பாக மதுரையில் டாக்டர் சரவணன் வேட்பாளராக அறிவிக்கப்பட்டு பரப்புரைகள் தொடங்கப்பட்டுள்ளது. முன்னாள் அமைச்சர் செல்லூர் ராஜு அவரை ஆதரித்து பிரச்சாரம் மேற்கொண்ட நிலையில், பிரேமலதா விஜயகாந்த் அதிமுக வேட்பாளர் சரவணனை ஆதரித்து பிரச்சாரம் மேற்கொண்டார்.

இந்நிலையில், மதுரையில் நடைபெற்ற பரப்புரை கூட்டத்தில் பேசிய வேட்பாளர் சரவணன், “இங்கிருந்த பாராளுமன்ற உறுப்பினரை சு.வெ என்று சொல்வார்கள். சும்மாவே இருந்தார்; இருக்கப் போறாரு என்று தெரிந்ததால் அவருக்கு அப்படி பெயர் வந்ததா என தெரியல. அவர் ஒரு ட்விட்டர் அரசியல்வாதி. ஆன்லைனில்  மட்டும் தான் இருப்பார். அவருடைய செயல் ஆன்லைனில் மட்டும் தான் இருக்கும். மக்களை சந்தித்ததே கிடையாது. அவர் கதை எழுதிக் கொண்டிருந்தார். இப்பொழுது கதை விட்டுக் கொண்டிருக்கிறார். கடைசியாக மூன்று மாதம் வந்து ஒன்று இரண்டு திட்டங்களை செய்து கொண்டிருக்கிறார். அவர் இவ்வளவு திட்டங்களை சொல்லி இருக்கிறாரே அந்த திட்டங்கள் எல்லாம் நடந்து இருக்கா என்று பார்ப்பதற்காக பைனாகுலரோடு நான் வந்திருக்கிறேன். எங்காவது கடந்த பாராளுமன்ற உறுப்பினர் வெங்கடேசன் செஞ்ச திட்டம் கண்ணுல படுதா என்று பார்க்கிறேன்'' என கூறியவாறே கையில் இருந்த பைனாகுலரில் பார்த்தார். ஆனால் இறுதி வரை சரவணன் பைனாகுலரில் முன்பக்கம் இருந்த லென்ஸ் கவரை திறக்காமல் பார்த்துக் கொண்டிருந்தார். இந்த காட்சிகள் சமூக வலைத்தளங்களில் ட்ரோல் செய்யப்பட்டு வருகிறது.

Next Story

“மக்களுக்காக குரல் கொடுப்பேன்” - தி.மு.க. வேட்பாளர் அருண் நேரு உறுதி

Published on 29/03/2024 | Edited on 29/03/2024
DMK candidate Arun Nehru promised to speak on behalf of the people

பெரம்பலூரை அடுத்த எளம்பலூர் ஊராட்சியில் பெரம்பலூர் பாராளுமன்றத் தொகுதி திமுக  வேட்பாளர் அருண் நேரு பெரம்பலூர் ஒன்றியத்தில் எளம்பலூர் கிராமத்தில் வாக்கு சேகரிப்பில் ஈடுபட்டார். திமுக வேட்பாளர் அருண் நேருவை ஆதரித்து போக்குவரத்துத் துறை அமைச்சர் சிவசங்கர் பொதுமக்கள் மத்தியில் ஆதரவு திரட்டினார்.

அப்போது வேட்பாளர் அருண் நேரு பேசியதாவது;- பெரம்பலூர் பாராளுமன்றத் தொகுதியில் கடந்த கால எம்.பி.க்கள் பல பேரை பார்த்திருப்பீர்கள். நிச்சயமாக நான் வெற்றி பெற்று அவர்களுக்கு வித்தியாசமாக பெரம்பலூர் பகுதியில் உள்ள அனைத்து பிரச்சனைகளையும் தீர்த்து கொடுப்பேன். மேலும் காவிரி  பெரம்பலூர் பகுதி குடிநீர் இன்னும் முழுமை அடையாமல் உள்ளது. நான் வெற்றி பெற்றவுடன் பெரம்பலூர் பகுதியில் உள்ள அனைத்து ஊர்களுக்கும் காவிரி குடிநீர் கிடைக்க ஆவண செய்வேன். இந்தப் பகுதியில் சின்ன வெங்காயம் மற்றும் முத்துச்சோளம் ஆகிய பயிர்களை விவசாயம் செய்து உரிய விலை மற்றும் வெங்காயம் பதப்படுத்தும் கிடங்கு இல்லாமல் பெரும் சிரமத்திற்கு உள்ளாகின்றனர். இதனை உடனே சரி செய்ய ஆவண செய்வேன் என்றார்.

பிரச்சாரத்தின் போது தமிழக போக்குவரத்துத் துறை அமைச்சர் சா.சி. சிவசங்கர், பெரம்பலூர் மாவட்டச் செயலாளர் ஜெகதீசன், பெரம்பலூர் சட்டமன்ற உறுப்பினர் எம். பிரபாகரன், கம்யூனிஸ்ட் கட்சியின் மாநிலச் செயலாளர் முத்தரசன், பெரம்பலூர் மாவட்ட துணைச் செயலாளர் டி.சி. பாஸ்கர், மாநில செயற்குழு உறுப்பினர் வக்கீல் ராஜேந்திரன், மதிமுக மாவட்டச் செயலாளர் ஜெயசீலன், பெரம்பலூர் திமுக ஒன்றிய செயலாளர் ராஜ்குமார், செயற்குழு உறுப்பினர்கள் ஜெகதீஸ்வரன், மாவட்ட இளைஞரணி துணை அமைப்பாளர் டி.ஆர். சிவசங்கர், ஓவியர் முகுந்தன், முன்னாள் பெரம்பலூர் சேர்மன் ராஜாராம், வேப்பந்தட்டை ஒன்றிய சேர்மன் ராமலிங்கம், துணை சேர்மன் ரெங்கராஜ், எளம்பலூர் ஊராட்சி மன்றத் தலைவர் சித்ராதேவி குமார், காங்கிரஸ், விடுதலைச் சிறுத்தைகள் மற்றும் கம்யூனிஸ்ட் கட்சி உள்ளிட்ட கூட்டணிக் கட்சியினர் வாக்கு சேகரிப்பின் போது உடன் சென்றனர்.

பெரம்பலூர் வட்டம் எளம்பலூர், செங்குணம், அருமடல் கவுல் பாளையம், நெடுவாசல் எறைய சமுத்திரம், கல்பாடி, சிறுவாச்சூர் ஆகிய ஊர்களில் தொடர்ந்து பெரம்பலூர் பாராளுமன்ற உறுப்பினர் அருண் நேரு வாக்கு சேகரிப்பில் ஈடுபட்டார்.