Skip to main content

’2025- ஆம் ஆண்டுக்குள் என்.எல்.சி மூலம் 2,10,16,000 யூனிட் மின்சக்தி தயாரிக்க வேண்டும்’ - என்எல்சி மேலாண் இயக்குனர் ராகேஷ்குமார்! 

Published on 27/01/2019 | Edited on 27/01/2019
n

 

கடலூர் மாவட்டம் நெய்வேலியில் உள்ள என்எல்சி இந்தியா நிறுவனத்தில், 70 வது குடியரசு தினத்தை முன்னிட்டு, தேசியக்கொடியை மேலாண் இயக்குனர் ராகேஷ் குமார் ஏற்றி வைத்தார்.  மேலும் மத்திய தொழிலக பாதுகாப்பு படை, பள்ளி கல்லூரி மாணவ மாணவிகள் கலந்து கொண்ட அணிவகுப்பை ஏற்றுக்கொண்டார். 

 

பின்னர் அவர் பேசுகையில், " 2025-ஆம் ஆண்டிற்குள் என்எல்சி நிறுவனம் தனது சுரங்கத்திலிருந்து பழுப்பு நிலக்கரி மற்றும் நிலக்கரி வெட்டி எடுத்து அதனை பயன்படுத்தி, மணிக்கு 2 கோடியே 10 லட்சத்து 16 ஆயிரம் யூனிட் மின்சக்தி தயாரிக்க வேண்டும் என்று மிகப்பெரிய இலக்கு நிர்ணயித்துள்ளோம்.  2 X 660 மெகாவாட் திறன் கொண்ட நெய்வேலி இரண்டாம் அனல் மின் நிலையத்தின், இரண்டாம் விரிவாக்கத் திட்டத்திற்கு மத்திய சுற்றுச்சூழல், வனம் மற்றும் பருவநிலை மாற்றத்துக்கான அமைச்சகம் அனுமதி வழங்கியுள்ளது.  

n2

 

விரிவாக்க திட்டங்களின் ஒரு பகுதியாக,  தமிழகத்தின் பல்வேறு பகுதிகளில் ஐந்தாண்டு காலத்தில் ரூபாய் 23 ஆயிரத்து 800 கோடி மதிப்பிலான சுரங்கம், அனல்மின் நிலையம், மற்றும் புதுப்பிக்கவல்ல ஆற்றல் திட்டங்களை தொடங்க சென்னையில் நடந்த உலக முதலீட்டாளர் மாநாட்டில் தமிழக அரசுடன் புரிந்துணர்வு ஒப்பந்தம் செய்துள்ளோம்.

 

என் எல் சி நிறுவனம் நிலைத்து நிற்கவும்,  லாபத்தை ஈட்டவும் நமது அனைத்து செயல்பாடுகளிலும் செலவை கட்டுப்படுத்த முழு வீச்சில் ஈடுபடவேண்டும்.  நெய்வேலி நகரத்தை பசுமை நகரமாக மாற்றும் வகையில் என்எல்சி நிர்வாகம் 'தூய்மை மிக்க நெய்வேலி' என்ற ஒரு புதிய திட்டத்தை அறிமுகப்படுத்தி, குடியிருப்புகளில் இருந்து பெறப்படும் கழிவுப்பொருட்களை விஞ்ஞான முறையிலான திடக்கழிவு மேலாண்மை திட்டத்தின் மூலம் பிரித்தெடுத்து அவற்றை மறுசுழற்சி செய்வதற்கான பணிகளை மேற்கொண்டு வருவதை பொதுமக்களுக்கு விழிப்புணர்வு ஏற்படுத்தும் வகையில் கூறிக் கொள்கிறேன்" என்றார்  .

 

அதேபோல் விளையாட்டுத்துறையில், மாணவ மாணவிகள் பல்வேறு வெற்றிகளை குவிக்க, நிறுவனம் ஊக்குவிக்கும் என்று கூறி, இறுதியாக தெய்வப்புலவர் திருவள்ளுவர் தனது அதிகாரத்தில் உள்ள வினைத்திட்பம் அதிகாரத்தில் வழங்கியுள்ள, 666 குரலுடன் உரையை நிறைவு செய்தார்.

 

சார்ந்த செய்திகள்

Next Story

ரூ. 2000 கோடிக்கு என்.எல்.சி. நிறுவனப் பங்குகளை விற்க மத்திய அரசு ஆலோசனை!

Published on 06/03/2024 | Edited on 06/03/2024
Central government advises to sell shares of NLC company for Rs.2000 crore

இந்திய அரசு நிறுவனமான என்.எல்.சி நிறுவனத்தினுடைய 7 சதவீத பங்குகள் விற்பனைக்கு வர இருப்பதாகச் சொல்லப்படுகிறது. இது தற்போது பெரும் சர்ச்சையை உண்டாக்கியுள்ளது.

2013 ஆம் ஆண்டு ஜெயலலிதா தலைமையிலான அதிமுக ஆட்சியில் இருந்தபோது, மத்திய அரசு இதேபோல் என்.எல்.சி இந்தியா லிமிடெட் நிறுவனத்தின் 5 சதவீத பங்குகளைத் தனியாருக்கு விற்பதாக அறிவிப்பு வெளியிட்டது. இதற்கு அன்றைய ஆளும் கட்சியான அதிமுக மற்றும் திமுக உள்ளிட்ட கட்சிகளும் கடும் எதிர்ப்பு தெரிவித்து கண்டன ஆர்ப்பாட்டங்களும் நடத்தின. பிறகு தனியாருக்கு விற்கப்படுவதாக இருந்த 5 சதவீத என்.எல்.சி பங்குகளையும் ஜெயலலிதா தலைமையிலான அதிமுக அரசு வாங்குவதாக முடிவெடுத்தது. 

இந்த நிலையில், தற்போது மீண்டும் என்.எல்.சியின் 7 சதவீத பங்குகள் விற்பனைக்கு வருவதாகத் தகவல் வெளியாகியுள்ளன. இது தொடர்பாக மத்திய அரசு ஆலோசனை நடத்தி வருவதாகவும் சொல்லப்படுகிறது. 2013ல் என்.எல்.சியின் ஒரு பங்கின் விலை ரூ.75 ஆக இருந்தது. தற்போது ஒரு பங்கின் விலை ரூ. 200க்கும் மேல் உள்ளதாகச் சொல்லப்படுகிறது. இதன்படி, 7 சதவீதம் பங்குகள் என்பது ரூ. 2000 கோடிக்கும் மேலாக வரும் எனச் சொல்லப்படுகிறது. 

தமிழ்நாடு அரசின் நிதி நிலை சூழ்நிலையில், 2000 கோடி மதிப்புள்ள பங்குகளை வாங்க இயலுமா என்ற கேள்வி எழுவதாகச் சொல்லப்படுகிறது. என்.எல்.சி. இந்தியா லிமிடெட் அரசு நிறுவனத்திற்காகத் தமிழ்நாட்டில் நிலம் கையகப்படுத்தப்பட்டது. தற்போது வரை நிலம் கையகப்படுத்தியவர்களுக்கு உரிய நிவாரணமும், பணியும் வழங்கவில்லை என்ற குற்றச்சாட்டு நிலவி வருகிறது. இதனைக் கண்டித்து பாஜகவை தவிர ஏனைய கட்சிகள் அனைத்தும் போராடும் நிலையில், மத்திய பாஜக அரசு தற்போது என்.எல்.சி. பங்குகளை விற்பனை செய்ய முடிவெடுத்திருப்பதாக வெளியாகியுள்ள தகவல் மேலும் பிரச்சனையைத் தீவிரப்படுத்துவதாக அரசியல் நோக்கர்கள் கருதுகின்றனர்.

Next Story

'சிறிய அணு உலைகள்'; என்.எல்.சியின் திட்டத்தால் அதிர்ச்சி

Published on 03/03/2024 | Edited on 03/03/2024
'small nuclear reactors'; Shocked by NLC's plan

என்எல்சியில் சிறிய அளவிலான அணு உலைகளை அமைக்க திட்டம்தீட்டி வருவதாக தகவல்கள் வெளியாகி உள்ளது. இதற்கான தகவலை என்.எல்.சி தலைவர் பிரசன்ன குமார் தெரிவித்துள்ளார்.

இதுதொடர்பாக இந்திய அணுசக்தி கழகத்துடன் பேச்சுவார்த்தை நடத்தி வருவதாக தகவல்கள் வெளியாகி உள்ளது. சிறிய வகை அணு உலைகள் மூலம் 300 மெகாவாட்டுக்கும் குறைவான மின்சாரம் உற்பத்தி செய்ய திட்டமிடப் பட்டுள்ளதாகவும், 2070 ஆம் ஆண்டுக்குள் ஜீரோ உமிழ்வு இலக்கை  எட்ட சிறிய அளவிலான அணு உலைகள் முக்கிய பங்கு வகிக்கும் எனவும் என்எல்சி-ன் தலைவர் பிரசன்ன குமார் தெரிவித்துள்ளார்.

nn

நெய்வேலி கடலூர் பகுதியில் என்எல்சிக்கு நிலம் எடுத்துக் கொடுக்கப்பட்டது  பழுப்பு நிலக்கரி எடுப்பதற்காக தான். ஆனால் அந்த பகுதியில் 300 மெகாவாட் மின்சாரம் தயாரிப்பதற்கான சிறு அணு உலைகளை அமைப்போம் என்று சொல்வது மக்களுக்கு விரோதமானது. அணு உலையில் இருந்து வரக்கூடிய அணுக்கழிவுகளை கையாளக்கூடிய தொழில்நுட்பம் எந்த நாட்டிலும் கிடையாது. அப்படி சிறிய அணு உலைகள் அமைக்கப்பட்டால் அதன் கழிவுகளை என்ன செய்யப் போகிறார்கள். அதில் இருந்து வரும் கதிர்வீச்சுகள் எப்படி தடுக்கப்படும் என்பது போன்ற கேள்விகள் எழுந்துள்ளது. தமிழக அரசு மக்களின் நிலங்களை கையகப்படுத்தி கொடுத்தது எதற்காகவோ அந்த பயன்பாட்டிற்கு மட்டும் அதனை பயன்படுத்த வேண்டும். நினைத்தபடி எல்லாம் மாற்றிக் கொள்ளும் எந்த உரிமையும் என்எல்சி நிர்வாகத்திற்கு கிடையாது என பூவுலகின் நண்பர்கள் அமைப்பின் சுந்தர் ராஜன் கருத்து தெரிவித்துள்ளார்.

என்.எல்.சி சிறிய அளவிலான அணு உலைகளை அமைக்க இருப்பதாக வெளியான தகவல் சுற்றுச்சூழல் ஆர்வலர்கள் மத்தியில் அதிர்ச்சியை ஏற்படுத்தியுள்ளது.