இயக்குநர் ஷங்கர் இயக்கத்தில் கமல்ஹாசன் நடிப்பில் உருவாகியிருக்கும் படம் இந்தியன் 2. இப்படம், இந்தியன் 3 அதாவது மூன்றாம் பாகமாகவும் வெளியாகவுள்ளது. லைகா நிறுவனம் தயாரித்திருக்கும் இப்படத்தில் காஜல் அகர்வால், விவேக், சித்தார்த், ரகுல் ப்ரீத் சிங், எஸ்.ஜே.சூர்யா, பாபி சிம்ஹா, பிரியா பவானி சங்கர், பிரம்மானந்தம், சமுத்திரக்கனி உள்ளிட்ட பலர் நடித்துள்ளனர். அனிருத் இசையமைத்திருக்கும் இந்தியன் 2 படம் தமிழ், தெலுங்கு, இந்தி உள்ளிட்ட மொழிகளில் வெளியாகவுள்ளது. கடந்த 1996ஆம் ஆண்டில் வெளியான இந்தியன் படத்தின் இரண்டாம் பாகமான இந்தியன் 2 படம், 28 ஆண்டுகளுக்குப் பிறகு, நாளை (12-07-24) திரைக்கு வரவிருக்கிறது.
இதற்கிடையில், இப்படத்தின் புரோமோஷன் வேலைகளில் படக்குழு வேகமாக செய்து வருகிறது. அந்த வகையில், சென்னை, மும்பை என சில இடங்களில் இந்தியன் 2 படக்குழு பத்திரிகையாளர் சந்திப்பில் கலந்துகொண்டு பல்வேறு கேள்விகளுக்கு பதிலளித்தனர்.
அந்த வகையில், இயக்குநர் ஷங்கர், கமல்ஹாசன், சித்தார்த் ஆகியோர் கொச்சிக்கு சென்று, பத்திரிகையாளர்களைச் சந்தித்து பேசினர். அப்போது பத்திரிகையாளர் ஒருவர், இந்தியன் 3 படம் எப்போது ரிலீஸ் செய்யப்படும் என்று கேள்வி எழுப்பினர். அதற்கு பதிலளித்த ஷங்கர், “எல்லாம் சரியாக நடந்தால், ஆறு மாதங்களுக்குள் இந்தியன் 3 படம் வெளிவரும். ஒருவேளை வி எஃப் எக்ஸ் வேலைகள் முடிந்தால், அது சாத்தியமாகும். நான் இன்னும் ஒரு தகவலை கொடுக்க விரும்புகிறேன். ‘இந்தியன் 2’ படத்தின் இறுதியில் ‘இந்தியன் 3’ படத்தின் ட்ரெய்லரைப் பார்க்கலாம்” என்று கூறினார்.
