என் மனைவியையும் சேர்த்து அணியில் 17 பேர்! - மனம் திறக்கும் ரோகித் சர்மா

Published on 01/01/2018 | Edited on 01/01/2018

என் மனைவியையும் சேர்த்து அணியில் 17 பேர்! - மனம் திறக்கும் ரோகித் சர்மா

இந்திய அணியின் தொடக்க வீரரான ரோகித் சர்மா, சமீப காலமாக தனது அனல்பறக்கும் ஆட்டங்களால் அனைவரது மனங்களையும் கவர்ந்து வருகிறார். காயம் காரணமாக ஓய்வு பெற்றிருந்த அவர், மீண்டும் அணிக்குத் திரும்பிய நிலையில், இலங்கை உடனான ஒருநாள் தொடரில் இரட்டை சதம் அடித்தார். அதே இலங்கை அணியுடனான டி20 தொடரிலும் சதம் அடித்தார். நடந்து முடிந்த தொடரில் அவரது தனித்துவமான ஆட்டங்களால் பல சாதனைகளையும் அவர் படைத்தார்.

என்னதான் அவர் தன் சொந்தத் திறமையின் மூலம் தன்னை நிரூபித்தாலும், அவரது தொடர் வளர்ச்சிக்கு அவரது மனைவி ரித்திக்கா மைதானத்து வருவதே காரணம் என சிலர் வேடிக்கையாக சொல்வதுண்டு. ரோகித் தனது திருமண தினத்தன்று இரட்டைச் சதமும், தனது மனைவியின் பிறந்ததினத்தன்று சதமடித்தும் தூள் கிளப்பினார். கண்ணீர் மல்க அந்த ஆட்டத்தை கைத்தட்டியபடி ரசித்துக் கொண்டிருந்தார் அவரது மனைவி ரித்திக்கா.

இதுகுறித்து கேள்வியெழுப்பிய ஆங்கில ஊடக செய்தியாளரிடம் ரோகித் சர்மா, ‘ரித்திக்காவையும் சேர்த்து அணியில் 17 பேர் என்று சிலர் சொல்வதைக் கேட்டிருக்கிறேன். இதுபோன்றவற்றைக் கேட்கும்போது மிகவும் வேடிக்கையாக இருக்கும். நானும் ரித்திக்காவும் இணைந்து மிகச்சிறந்த அணியாக செயல்படுகிறோம். அவர் மனைவி, தோழி, மேலாளர் என எல்லாமுமாக இருந்து எனக்கான சுதந்திரத்தைத் தருகிறார். அதன்மூலமாக நான் களத்தில் இன்னும் சிறப்பாக விளையாடுகிறேன்’ என பதிலளித்துள்ளார்.