Skip to main content

மூர்த்தியை ஒருமுறை வழிபட்டாலே போதும்

Published on 20/02/2019 | Edited on 20/02/2019

வரலாற்றுப் புகழ்மிக்க வள்ளல் பாரி ஆட்சிசெய்த இடம் பிரான்மலை. பறம்பு மலை என்பதே பிரான்மலை என்று மருவியது. வள்ளல் பாரியின் மனம் கவர்ந்த உயர் பண்பாளர் புலவர் கபிலர். அவர் பறம்பு மலையில் பலகாலம் பாரியோடு வாழ்ந்ததால் பறம்புமலை தமிழ்ப்பதியாகவும் சிறந்தது.வெள்ளை எருக்கு மலரையும் தனக்குரியதாக ஏற்றுக்கொண்ட பேரருளாளன் சிவபெருமான் எழுந்தருளியிருக்கும் மலை.இத்தகைய பெருமை வாய்ந்த பிரான்மலை ஏழாம் நூற்றாண்டில் "திருக்கொடுங்குன்றம்' என்று அழைக்கப்பட்டிருப்பதை திருஞானசம்பந்தர் பதிகத்தால் அறிய முடிகிறது. திருநாவுக்கரசு சுவாமிகள் "கொடுங்குன்றன் காண், கொல்லை ஏற்றினான் காண்' என திருவாரூர் திருத்தாண்டகத்தில், இத்தல சிவபெருமானை வந்தனை செய்துள்ளார். சுந்தரமூர்த்தி நாயனார் "கொடுக்கிலாதானைப் பாரியே கூறினும் கொப்பாரில்லை' என வள்ளல் பாரியைப் புகழ்வதன்மூலம் இத்தலத்தை நினைவுகூர்கிறார். இங்கு வருகை புரிந்த அருணகிரிநாதருக்கு இங்கு எழுந்தருளியுள்ள முருகப்பெருமான் திருநடனம் செய்து காட்சி தந்தருளியதாக வரலாறு.
 

pranmalai temple

இங்கு எழுந்தருளியுள்ள சிவபெருமானை திருக்கொடுங்குன்றநாதர் என்று அழைக் கின்றனர். 2,500 அடி உயரமுள்ள இந்த மலையை சங்கப்புலவர் கபிலரும் போற்றி யுள்ளார்.பாதாளம், பூமி, கயிலை என மூன்று பகுதிகளாக விளங்குகிறது ஆலயம். அதாவது மலையின் அடிவாரத்தை பாதாளமாகவும், அதற்கு மேல்பகுதியை பூமியாகவும், அதற்கும் மேலான உச்சிப் பகுதியை கயிலையாகவும் கொண்டுள்ள அமைப்பு வித்தியாசமானது. இம்மூன்று பகுதி திருக்கோவில்களையும் உள்ளடக்கிய மிகப்பெரிய திருச்சுற்று மதில் எழுப்பப்பட்டுள்ளது. அதற்கு சுந்தர பாண்டியன் திருமதில் என்று பெயர். இங்குள்ள மூன்று கல்வெட்டுகளில் "பாரீசுவரம்' என்ற பெயர் குறிப்பிடப்பட்டுள்ளது. பாரீசுவரர் என்னும் பெயர் 12 மற்றும் 13-ஆம் நூற் றாண்டுகளில் ஆட்சி செய்த பாண்டிய மன்னர்களின் கல்வெட்டுகளில்தான் இடம்பெற்றுள்ளது.மலையின் அடிவாரத்தில் தென்மேற்கு மூலையில் துவங்குகிறது பாதை. வழியில் மேற்கு முகமாகக் கட்டப்பட்டுள்ள துரைராஜா மண்டபத்தை அடைந்ததும், வடக்குப் பகுதி மதிலுக்குரிய திருக்கோவிலின் பிரம்மாண்டமான பிரதான வாசல் உள்ளது. அதைக் கடந்ததும், கோவிலின் தெற்கு மதிலுக்கும், வடக்குப் பகுதி மலையின் அடிவாரப் பாறைக்குமிடையே, கல்தளம் கொண்ட கிழக்குக் கோடியில் மது புஷ்கரணி தீர்த்தம் உள்ளது. இது தேனடி தீர்த்தம் என்றும் அழைக்கப்படுகிறது.முக மண்டபத்தில் நந்தி கம்பீரமாய் காட்சி தருகிறது. மகா மண்டபத்திற்குள் நந்தி, பலிபீடம், சூரிய பிரபை ஆகியவை உள்ளன.

பாரிவள்ளல் முல்லைக்கொடிக்குத் தேரளித்த காட்சி சுதைச்சிற்பமாக உள்ளது.மேற்கே லட்சுமி மண்டபமும், கிழக்கே மங்கைபாகர் ஆறுகால் மண்டபமும் உள்ளன. மங்கைபாகரின் திருக்கோலத்தைக் காண வருகைதந்த தேவர்கள் கூடியமர்ந்த இடம் தேவசபா மண்டபம் என்று அழைக் கப்படுகிறது. பாறையைக் குடைந்து நீண்ட சதுர வடிவில் தூண்களே இல்லாத வகையில் கருவறை அமைக்கப்பட்டுள்ளது. இந்த குடைவரையில், பாறையிலேயே செதுக்கி உருவாக்கிய அம்மையப்பர் திருமணக் கோலத்துடன் காட்சி தருவதால் தென் கயிலாயம் என்று அழைக்கப்படுகிறது. இது காய்ச்சல் போக்கும் தலமாகவும், மகப்பேறு அருளும் பரிகாரத் தலமாகவும் விளங்குகிறது. பரிகாரம் மகா மண்டபத்தின் மேற்கே மூன்று திருமுகங்கள், நான்கு கரங்கள், மூன்று பாதங்கள் கொண்ட சிறப்புமிக்க சிலாரூபத்தை ஜ்வரபக்த மூர்த்தி என்று கூறுகிறார்கள். கொடுமையான, தீராத காய்ச்சல் உள்ளவர்கள் இம்மூர்த்தியை ஒரே ஒருமுறை வழிபட்டாலே போதும்; எத்தகைய காய்ச்சலும் குணமாகும் என்று நம்பப்படுகிறது. மேலும் தேனடி தீர்த்தத்தில் நீராடி கொடுங்குன்றநாதரை தரிசித்தால் மகப்பேறு வாய்க்கும்; தீராத நோய்கள் உடனடியாக அகலும்; செல்வமும் செல்வாக்கும் சேரும் என்பது ஐதீகம்.மதுரை- சிங்கம்புணரியிலிருந்து ஏழு கிலோமீட்டர் தொலைவில் உள்ளது பிரான்மலை. பேருந்து வசதி உண்டு.
 

Next Story

மதுரை வைகை ஆற்றில் எழுந்தருளினார் கள்ளழகர்! 

Published on 23/04/2024 | Edited on 23/04/2024
Madurai Vaigai River woke up Kallazhakar

உலகப்புகழ் பெற்ற மதுரை சித்திரை விழாவின் முக்கிய நிகழ்வான கள்ளழகர் வைகை ஆற்றில் இறங்கும் நிகழ்வு பெரும் விமரிசையாக ஆண்டு தோறும் நடைபெற்று வருகிறது. இதனை லட்சக்கணக்கான மக்கள், பக்தர்கள் நேரில் கண்டு களிப்பர். தகதகக்கும் தங்கக் குதிரையில் கம்பீரமாக வலம்வரும் கள்ளழகர் வைகை ஆற்றில் இறங்கும் வைபவம் மிகவும் பிரசித்தி பெற்றது.

இந்த சித்திரை விழாவின் ஒரு பகுதியான மீனாட்சி - சுந்தரேசுவரர் திருக்கல்யாணம் நேற்று முன்தினம் (21.04.2024)  நடைபெற்றது. அதாவது சித்திரைத் திருவிழாவின் 10ஆம் நாளில் முக்கிய நிகழ்வான மீனாட்சி, சுந்தரேசுவரர் திருக்கல்யாணம் திரளான பக்தர்கள் முன்னிலையில் கோலாகலமாக நடைபெற்றது. அதனைத் தொடர்ந்து மீனாட்சி - சுந்தரேஸ்வரர் தேரோட்டம் நேற்று (22.04.224) கோலாகலமாகத் தொடங்கியது. இதனையொட்டி பல்லாயிரக்கணக்கான பக்தர்கள் தேரை  உற்சாகத்துடன் வடம் பிடித்து இழுத்து பரவசம் அடைந்தனர். இதற்காக அதிகாலை முதல் பல்லாயிரக்கணக்கான பக்தர்கள் குவிந்த வண்ணம் இருந்தனர். அதே சமயம் வைகை ஆற்றில் இறங்கும் நிகழ்வுக்காக கள்ளழகர் மதுரை வந்தடைந்தார். கள்ளழகர் உடன் பாரம்பரியமாகக் கொண்டு வரப்படுகின்ற அழகர் கோயிலின் உண்டியல்கள் 3 மாட்டு வண்டிகளில் எடுத்து வரப்பட்டது.

இந்நிலையில் மதுரை சித்திரை திருவிழாவின் முக்கிய நிகழ்வான கள்ளழகர் வைகையாற்றில் எழுந்தருளும் நிகழ்வு இன்று (23.04.2024) நடைபெற்றது. கள்ளழகரை தரிசிக்க ஆயிரக்கணக்கான மக்கள் வைகை ஆற்றில் குவிந்தனர். இதனையடுத்து பச்சைப் பட்டு உடுத்தி தங்கக் குதிரையில் கள்ளழகர் வைகை ஆற்றின் கரைக்கு வருகை புரிந்தார். கள்ளழகர் வைகையாற்றில் இறங்குவதற்கு முன்பு ஆற்றங்கரையில் மாலை அணிவித்து அகழருக்கு மரியாதை செலுத்தப்பட்டது. அதனைத் தொடர்ந்து பக்தர்களின் கோஷம் விண்ணை முட்ட, தங்கக்குதிரையில் பச்சைப்பட்டு உடுத்தி வைகையாற்றில் கள்ளழகர் இறங்கினார். கள்ளழகர் வைகையாற்றில் எழுந்தருளும் நிகழ்வைக் காண சென்னை உயர்நீதிமன்றத்தின் மதுரைக்கிளை நீதிபதிகள் ஆர். சுரேஷ்குமார், புகழேந்தி, ஆதி கேசவலு மற்றும் அருள் முருகன் உள்ளிட்டோர் வருகை புரிந்திருந்தது குறிப்பிடத்தக்கது. 

Next Story

மீனாட்சி - சுந்தரேஸ்வரர் தேரோட்டம்; பக்தர்கள் உற்சாகம்!

Published on 22/04/2024 | Edited on 22/04/2024
Meenakshi - Sundareswarar Chariot; Devotees excited

உலகப் பிரசித்தி பெற்ற மதுரை சித்திரை விழாவின் ஒரு பகுதியான மீனாட்சி - சுந்தரேசுவரர் திருக்கல்யாணம் நேற்று (21.04.2024)  நடைபெற்றது. அதாவது சித்திரை திருவிழாவின் 10ஆம் நாளில் முக்கிய நிகழ்வான மீனாட்சி, சுந்தரேசுவரர் திருக்கல்யாணம் திரளான பக்தர்கள் முன்னிலையில் கோலாகலமாக நடைபெற்றது.

இந்நிலையில் சித்திரை திருவிழாவின் முக்கிய நிகழ்வான மதுரை மீனாட்சியம்மன் கோயிலின் மீனாட்சி - சுந்தரேஸ்வரர் தேரோட்டம் கோலாகலமாகத் தொடங்கியது. இதனையொட்டி பல்லாயிரக்கணக்கான பக்தர்கள் தேரை  உற்சாகத்துடன் வடம் பிடித்து இழுத்து வருகின்றனர். இதற்காக அதிகாலை முதல் பல்லாயிரக்கணக்கான பக்தர்கள் குவிந்த வண்ணம் இருந்தனர்.

மேலும், மதுரை வைகை ஆற்றில் கள்ளழகர் இறங்கும் நிகழ்வுக்காக மதுரை வந்தடைந்தார். கள்ளழகர். உடன் பாரம்பரியமாக கொண்டு வரப்படுகின்ற அழகர் கோயிலின் உண்டியல்கள் 3 மாட்டு வண்டிகளில் எடுத்து வரப்பட்டுள்ளது குறிப்பிடத்தக்கது.