மாமனிதன் படத்தை தொடர்ந்து சீனு ராமசாமி இயக்கத்தில் உருவாகி இருக்கும் திரைப்படம் ‘கோழிப்பண்ணை செல்லதுரை’. இப்படத்தில் ஏகன், யோகி பாபு, பிரிகிடா, சத்யா, ‘குட்டி புலி’ தினேஷ், லியோ சிவகுமார், ஐஸ்வர்யா தத்தா, பவா செல்லதுரை, மானஸி கொட்டாச்சி உள்ளிட்ட பலர் நடித்திருக்கிறார்கள். விஷன் சினிமா ஹவுஸ் தயாரித்திருக்கும் இப்படத்திற்கு என் ஆர் ரகுநந்தன் இசையமைத்துள்ளார். இப்படம் செப்டம்பர் 20ஆம் தேதி வெளியாகவுள்ள நிலையில் படத்தின் இசை வெளியீட்டு விழா நடைபெற்றது. இதில் படக்குழுவினருடன் விஜய் சேதுபதியும் கலந்து கொண்டார்.
இந்நிகழ்ச்சியில் மேடையில் பேசிய யோகிபாபு, விஜய் சேதுபதி பற்றி பேசத் தொடங்கினார். உடனே விஜய் சேதுபதியையும் மேடைக்கு அழைத்து, “எனக்கு ரொம்ப புடிச்சவரு. ஆண்டவன் கட்டளை படத்திலிருந்து நடிச்சிட்டு வரேன்” என்றார். அருகில் இருந்த விஜய் சேதுபதி, யோகி பாபுவை பார்த்து, “விழாவை சிறப்பித்தற்கு ரொம்ப நன்றி சார். பத்திரமா ஊருக்கு போய்ட்டு வாங்க” என கலாய்த்தார்.
பின்பு யோகி பாபு, “நான் உடனே பெங்களூரு கிளம்புரேன். அதை அவரிடம் முன்னாடியே சொல்லிவிட்டேன்” என்றார். பிறகு பேசிய விஜய் சேதுபதி, “யோகி பாபுவின் கால்ஷீட் நடிக்க கிடைக்கிறதே கஷ்டம். அப்படி இருக்கும் போது இசை வெளியீட்டிற்கு வந்திருக்கிறார்” என மீண்டும் கலாய்த்து பேச, அவரை பேசவிடாமல் யோகி பாபு, “நன்றி சார், நன்றி சார்” என சிரித்துக் கொண்டே மேடையை விட்டு சென்றார். இருவரும் மாறி மாறி கலாய்த்துக் கொண்டது அந்நிகழ்வில் சிரிப்பலையை ஏற்படுத்தியது.
