'குக்கு வித் கோமாளி' நிகழ்ச்சி மூலம் பிரபலமடைந்த பவித்ரா, தற்போது ஏ.ஜி.எஸ் நிறுவனம் தயாரிக்கும் படத்தில் கதாநாயகியாக நடித்து வருகிறார். தெறி படத்தில் நடிகை சமந்தாவின் கதாபாத்திரமான மித்ரா கதாபாத்திரத்தை மறுவுருவாக்கம் செய்யும் வகையில் உடையணிந்து எடுத்த புகைப்படத்தை, பவித்ரா சில தினங்களுக்கு முன்பு சமூக வலைதளங்களில் பதிவிட்டிருந்தார். நடிகை சமந்தாவின் தோற்றத்தை அப்படியே ஒத்து இருந்த அந்தப் புகைப்படம் ரசிகர்களால் அதிகம் பகிரப்பட்டு, இணையத்தில் வைரலானது.
இந்த நிலையில், சமூக வலைதளத்தில் பவித்ராவின் பெயரில் போலி முகவரியை பயன்படுத்தும் மர்ம நபர் அப்புகைப்படத்தை பகிர்ந்து, நான் உண்மையிலேயே உங்களைப் போல இருக்கிறேனா மேம் என சமந்தாவிடம் கேள்வியெழுப்பினார். அது, போலி முகவரியில் இருந்து பகிரப்பட்டது என்பதை கவனிக்காத சமந்தா, "நீங்கள் மிகவும் அழகாக உள்ளீர்கள்" எனப் பதிலளித்தார். சமந்தாவின் இந்தப் பதில் பவித்ராவின் கவனத்திற்கு வர, அவர் இது குறித்து விளக்கம் அளித்துள்ளார்.
இது குறித்து அவர் வெளியிட்டுள்ள பதிவில், "முதலில் உங்கள் பதிலுக்கு நன்றி மேம். அந்த ஐடி எனக்கு சொந்தமானது அல்ல. இந்த ஃபோட்டோஷூட் "மித்ரா" கதாபாத்திரத்தை மீண்டும் மறுஉருவாக்கம் செய்யவேண்டும் என்பதற்காக செய்தோம். நாங்கள் அனைவரும் உங்களுடைய மிகப்பெரிய ரசிகர் என்பதை மறந்துவிடக் கூடாது. நான் உங்களைப்போல 1% கூட இல்லை. மீண்டும் ஒருமுறை நன்றி மேம்" எனக் குறிப்பிட்டுள்ளார்.
