தனுஷ் - செல்வராகவன் கூட்டணியில் உருவான ‘துள்ளுவதோ இளமை’, ‘காதல் கொண்டேன்’, ‘புதுப்பேட்டை’, ‘மயக்கம் என்ன’ ஆகிய படங்கள் மாபெரும் வெற்றிபெற்றன. இதையடுத்து இவர்கள் கூட்டணி படத்துக்கென்றே தனி ரசிகர் பட்டாளம் உருவானது. இந்நிலையில் செல்வராகவன் அடுத்ததாக இயக்கவுள்ள படத்தில் மீண்டும் தனுஷ் நாயகனாக நடிக்கவுள்ளார். கலைப்புலி எஸ். தாணு தயாரிப்பில் செல்வராகவனின் 12வது படமாக உருவாகும் இப்படத்திற்கு 'நானே வருவேன்' பெயரிடப்பட்டுள்ளது.
ஆக்ஷன் த்ரில்லர் ஜானரில் உருவாகும் இப்படத்தில் தனுஷுக்கு ஜோடியாக இரண்டு கதாநாயகிகள் நடிக்கவுள்ளதாகக் கூறப்படுகிறது. அதில் ஒரு கதாநாயகியாக நடிகை தமன்னா நடிக்கவுள்ளதாகவும் சமீபத்தில் தகவல் வெளியானது. இப்படத்தின் ஆரம்பகட்ட பணிகள் தற்போது விறுவிறுப்பாக நடைபெற்று வரும் நிலையில், இப்படத்தின் பாடல் குறித்து ஒளிப்பதிவாளர் அரவிந்த் கிருஷ்ணா ட்வீட் செய்துள்ளார். அதில்...
”‘நானே வருவேன்' பட பாடல் தயாரிப்பதைப் பார்ப்பதற்கே மேஜிக்காக இருக்கிறது. எனது நண்பர்கள் யுவன் மற்றும் செல்வராகவன் ஆகியோரை மீண்டும் இணைத்து பார்ப்பதற்கு நன்றாக இருக்கிறது. சினிமா மீது இந்த இரண்டு மனிதர்களிடமும் உள்ள ஆர்வம் போற்றப்பட வேண்டிய மற்றும் கற்றுக்கொள்ள வேண்டிய ஒன்று." எனப் பதிவிட்டுள்ளார்.
