Skip to main content

இளையராஜாவுடன் மனக்கசப்பு ஏற்பட்டது ஏன்? - மனம் திறக்கும் இயக்குநர் கே. பாக்யராஜ் 

Published on 11/01/2022 | Edited on 11/01/2022

 

K Bhagyaraj

 

நடிகரும் இயக்குநருமான கே.பாக்யராஜ், நக்கீரன் ஸ்டூடியோவுடனான நேர்காணலில் கலந்துகொண்டு பல்வேறு விஷயங்கள் குறித்துப் பேசினார். அந்த நேர்காணலில், இளையராஜாவுடன் ஏற்பட்ட மனக்கசப்பு குறித்து அவர் பகிர்ந்து கொண்டவை பின்வருமாறு...

 

"என்னுடைய சின்ன வீடு படம் வரைக்கும் இளையராஜா இசையமைத்தார். ஒவ்வொரு படத்தின்போதும் அடுத்து என்ன படம் என்று கொஞ்சம் முன்னதாகவே சொல்லுங்கள் என்பார். கதை தயார் ஆனவுடன் நானும் அவரிடம் சொல்வேன். அந்த வகையில், அடுத்த படத்தின் கதை தயார் ஆனவுடன் அவர் ஸ்டூடியோவிற்கு சென்றேன். அவர் ரெக்கார்டிங்கில் இருந்ததால் நான் தயார், சார் எப்போது சொன்னாலும் கம்போஸிங் வச்சுக்கலாம் என்று அவர் உதவியாளரிடம் கூறினேன். அவர், சாரை வீட்டில் சென்று சந்தியுங்கள் என்றார். நான் எதற்கு எனக் கேட்க, இல்லை நீங்கள் வீட்டில் சென்று சந்தியுங்கள் என்றார். எப்போதும் ஸ்டூடியோவில்தான் இருப்பார். இங்கு வந்துதான் நான் சந்திப்பேன். திடீரென வீட்டில் சென்று ஏன் சந்திக்க வேண்டும் எனக் கேட்க, இல்லை எல்லாரும் வந்து சந்திக்கிறார்கள் என்றார். வீட்டில் ஏதாவது விசேஷம் என்றால் நேரில் சென்று சந்திக்கலாம், இல்லை உடல்நிலை சரியில்லை என்றால் சந்திக்கலாம். தொழில்ரீதியான சந்திப்பிற்கு எதற்கு வீட்டில் சென்று சந்திக்க வேண்டும் எனக் கேட்டு, நான் வந்த விஷயத்தை அவரிடம் கூறுங்கள். அவசியம் என்றால் சென்று சந்திக்கிறேன் எனக் கூறிவிட்டு வந்துவிட்டேன். 

 

அதன்பிறகு என்ன நடந்தது என்று தெரியவில்லை. அவரிடம் இருந்து எனக்கு எந்த ஃபோன் காலும் வரவில்லை. எனக்கு அது கொஞ்சம் வருத்தமாக இருந்தது. பின், ஆரம்பக்காலங்களில் என்னுடைய நாடகங்களுக்கு இசையமைத்த சுதாகர் என்பவரிடம் இசையை கற்றுக்கொள்ள ஆரம்பித்தேன். என்னால் இசையமைக்க முடியுமா என்று சிறு தயக்கம் இருந்தது. விஸ்வநாதன் சாரிடம் சில ட்யூன்களை வாசித்து பாடிக்காட்டினேன். அவர் அதைக் கேட்டுவிட்டு நல்லா இருக்கு தம்பி, கண்டிப்பா இந்த டியூன் ஹிட்டாகும் என்றார். அந்த நம்பிக்கையில்தான் இது நம்ம ஆளு படத்திற்கு இசையமைத்தேன். கதை, திரைக்கதை, வசனம், இயக்கம், நடிப்பு என எல்லாமே பண்ணினார். இப்ப திடீர்னு இசையமைக்கிறார் என்று பெரும் எதிர்பார்ப்போடு பலர் பார்த்தார்கள், அதே நேரத்தில் இவர் எப்படி இசையமைப்பார் என்று சிலர் சந்தேகப் பார்வையிலும் பார்த்தார்கள்" என்றார். 

 

 

சார்ந்த செய்திகள்

Next Story

“அப்போதான் இளையராசான்னு பேரை கேக்கிறேன்” - நினைவலைகளைப் பகிர்ந்த சேரன்

Published on 21/03/2024 | Edited on 21/03/2024
Cheran shared his memories about ilayaraja

இசையமைப்பாளர் இளையராஜாவின் வாழ்க்கை வரலாறு திரைப்படமாக உருவாகிறது. கனெக்ட் மீடியா, பி.கே. ப்ரைம் புரடக்‌ஷன் மற்றும் மெர்குரி மூவிஸ் என மூன்று நிறுவனங்கள் இணைந்து பிரம்மாண்ட பொருட்செலவில் தயாரிக்கும் இப்படத்தில், இளையராஜா கதாபாத்திரத்தில் தனுஷ் நடிக்கவுள்ளார். இளையராஜா எனத் தலைப்பு வைக்கப்பட்டுள்ள இப்படம் தமிழ், மலையாளம், தெலுங்கு உள்ளிட்ட 5 மொழிகளில் வெளியாகவுள்ளது. அறிவிப்பு போஸ்டர் வெளியாகி பலரது கவனத்தை ஈர்த்து வருகிறது.

ராக்கி, சாணிக் காயிதம், கேப்டன் மில்லர் ஆகிய படங்களை இயக்கிய இயக்குநர் அருண் மாதேஷ்வரன் இயக்கும் இப்படத்தின் தொடக்க விழா நேற்று சென்னையில் நடைபெற்றது. இந்த விழாவில், கமல்ஹாசன், தனுஷ், இளையராஜா, பாரதிராஜா, வெற்றிமாறன், அருண் மாதேஷ்வரன் உள்ளிட்டோர் கலந்துகொண்டனர். இளையராஜா கதாபாத்திரத்தில் நடிக்கவிருக்கும் தனுஷ் புகைப்படம் கொண்ட போஸ்டரை கமல்ஹாசன் வெளியிட்டு வாழ்த்து தெரிவித்தார். 

இளையராஜாவின் வாழ்க்கை வரலாற்றை திரைப்படமாக உருவாக்குவதற்கு பலரும் தங்களது மகிழ்ச்சியை தெரிவித்து வருகின்றனர். அந்த வகையில் இயக்குநர் சேரன், தன்னுடைய நினைவலைகளைப் பகிரிந்து வாழ்த்துகளைத் தெரிவித்துள்ளார். இது குறித்து அவர் தனது எக்ஸ் தளத்தில் கூறியதாவது, “சின்ன வயசுல ஊர்ல நாடகம் போட்டா முதல்ல போடுற பாட்டு மச்சானை பாத்தீங்களா தான்.. படம் அன்னக்கிளி. அப்போதான் இளையராசான்னு பேரை கேக்கிறேன். புதுப்பய பாட்டு போட்டிருக்கான்னு எங்க ஊரு பெரியவங்க சொல்றாங்க.

அப்பறம் கறுப்பு வெள்ளைல போட்டோ பாக்குறேன். ஒருத்தர் மீசை இல்லாம ஹிப்பி ஸ்டைல், பாபி காலர் சட்டைல அழகா சிரிக்கிறார். அவர் மேல பிரியம் வருது. (அவர்கூட பின்னாளில் பணிபுரிய போறேன்னு அப்போ தெரியாது). எனக்கு பிடிச்ச சிவாஜிக்கு பாட்டு போடுறாரு. தியாகம் படம். தேன் மல்லிப்பூவேன்னு... படம் வெறித்தனமா ஓடுது. ராசா பாட்டுத்தான் காரணம்னு சொல்றாக. அந்த ராசா அப்போ எப்படிலாம் இருந்திருப்பார்னு 2025ல பாக்க போறோம். சினிமா மட்டுமே பார்வையாளனுக்கு நினைக்க முடியாத ஆச்சரியங்களை தரும். இளையராஜா அவர்களின் வாழ்க்கை சிறப்பை படமாக்க முயன்றிருக்கும் தனுஷ் மற்றும் படக்குழுவினருக்கு வாழ்த்துகள். ஒரு சாமானியனின் வெற்றியாய் வளரட்டும். இளையராஜா வரலாறு...” என்று பதிவிட்டுள்ளார். 

Next Story

பண்ணைபுரம் கொண்டுசெல்லப்படும் பவதாரிணியின் உடல்

Published on 26/01/2024 | Edited on 26/01/2024
Bhavatharini's body being taken to pannaipuram

பிரபல பாடகியும் இசைஞானி இளையராஜாவின் மகளுமான பவதாரிணி கடந்த சில மாதங்களாகப் புற்றுநோய் பாதிப்பால் அவதிப்பட்டு வந்தார். இதற்காக அவர் தொடர் சிகிச்சை மேற்கொண்டு வந்தார். இந்நிலையில், இலங்கையில் உள்ள மருத்துவமனை ஒன்றில் சிகிச்சை பெற்றுவந்த அவர், சிகிச்சை பலனின்றி ஜனவரி 25 ஆம் தேதி மாலை உயிரிழந்துள்ளார். கடந்த 1984 ஆம் ஆண்டு மலையாளத்தில் வெளியான மை டியர் குட்டிச்சாத்தான் என்ற திரைப்படம் மூலம் பாடகியாக அறிமுகமானவர் பவதாரிணி.

இசைஞானி இளையராஜாவின் செல்ல மகளான இவருக்கு கடந்த சில மாதங்களுக்கு முன்பு திடீரென உடல் நலக்கோலாறு ஏற்பட்டது. இது தொடர்பாக மருத்துமனைக்கு சென்றபோது அவருக்கு புற்றுநோய் வந்திருப்பதாகக் கூறி மருத்துவர்கள் அதிர்ச்சியை ஏற்படுத்தியுள்ளனர். இதனால், அதிர்ச்சியில் உறைந்த இளையராஜா மற்றும் அவரது குடும்பத்தார், அவரை எப்படியாவது காப்பாற்றி விட வேண்டுமென்று தீவிர முயற்சி எடுத்துள்ளனர். அதன்படி, இந்த நோய்க்கு இலங்கையில் சிறந்த மருத்துவம் அளிப்பதாகத் தெரிந்துள்ளது. இதனையடுத்து, பவதாரிணிக்கு ஆயுர்வேத சிகிச்சை மேற்கொள்வதற்காக அவரது குடும்பத்தினர் இலங்கை கொண்டு சென்றனர். அங்கு தீவிர சிகிச்சைப் பெற்று வந்த பவதாரிணி சிகிச்சை பலனின்றி கடந்த 26 ஆம் தேதி மாலை 5.20 மணியளவில் உயிரிழந்துள்ளார். இந்தச் செய்தியைக் கேட்டு அவரது குடும்பத்தார் சோகத்தில் மூழ்கியுள்ளனர்.

விமான மூலம் சென்னை விமான நிலையம் கொண்டுவரப்பட்ட பவதாரணியின் உடலானது அவரது இல்லம் உள்ள அமைந்துள்ள தி நகர் பகுதிக்கு கொண்டுவரப்பட்டது. இதனால் அந்த பகுதியில் ஏராளமான பொதுமக்கள் குவிந்து வருகின்றனர். பிரபலங்களும் அஞ்சலி செலுத்த அங்கு வந்த வண்ணம் உள்ளனர். இதனால் அங்கு பாதுகாப்புப் பணிக்கு போலீசார் குவிக்கப்பட்டுள்ளனர்.

தொடர்ந்து அவரது உடலுக்கு பல்வேறு பிரபலங்களும் அஞ்சலி செலுத்தி வரும் நிலையில் பவதாரணியின் உடலுக்கு அமைச்சர் உதயநிதி ஸ்டாலின், தேமுதிக பொருளாளர் பிரேமலதா விஜயகாந்த் ஆகியோர் அஞ்சலி செலுத்தினர். அதனைத் தொடர்ந்து அவரது உடலானது இன்று தேனி எடுத்துச் செல்லப்பட இருப்பதாக தகவல்கள் வெளியாகி உள்ளது. தேனியில் உள்ள இளையராஜாவின் சொந்த ஊரான பண்ணைபுரத்தில் அவரது தாயார் மற்றும் மனைவி ஆகியோரின் நினைவிடத்திற்கு இடையே பவதாரணியின் உடல் நல்லடக்கம் செய்யப்பட இருப்பதாக தகவல்கள் வெளியாகி உள்ளது. இதன் காரணமாக பண்ணைபுரத்தில் ஏற்பாடுகள் செய்யப்பட்டு வருகிறது.