இலங்கை கிரிக்கெட் வீரரான முத்தையா முரளிதரனின் வாழ்க்கை வரலாறு '800' என்ற தலைப்பில் படமாக்கப்பட்டு வருகிறது. ஸ்ரீபதி ரங்கசாமி இயக்கும் இந்த படத்தை பெரும் பொருட்செலவில் மூவி ட்ரெயின் மோஷன் பிக்சர்ஸ் மற்றும் தர்மோஷன் பிக்சர்ஸ் இணைந்து தயாரித்துள்ளது. முத்தையா முரளிதரனின் கதாபாத்திரத்தில் ஆஸ்கர் வென்ற ‘ஸ்லம்டாக் மில்லியனர்’ படப்புகழ் நடிகர் மதுர் மிட்டல் நடித்துள்ளார். மேலும் மகிமா நம்பியார், நரேன், நாசர், வேல ராமமூர்த்தி உள்ளிட்ட பலர் நடித்துள்ளனர்.
இலங்கை, சென்னை, கொச்சி, இங்கிலாந்து மற்றும் ஆஸ்திரேலியாவில் படமாக்கப்பட்டு இதன் படப்பிடிப்பு தற்போது முடிவடைந்துள்ளது. தமிழ், தெலுங்கு, இந்தி, ஆங்கிலம் ஆகிய மொழிகளில் இப்படம் வெளியாகவுள்ளது. இந்த நிலையில் இன்று, முத்தையா முரளிதரன் தனது 51வது வயதில் அடியெடுத்து வைக்கிறார். இதனை முன்னிட்டு பலரும் அவருக்கு வாழ்த்துகள் தெரிவித்து வருகின்றனர். அந்த வகையில் 800 படக்குழு அவருக்கு வாழ்த்தும் விதமாக படத்தின் ஃபர்ஸ்ட் லுக் மற்றும் மோஷன் போஸ்டரை வெளியிட்டுள்ளது. இது ரசிகர்களின் கவனத்தை ஈர்த்து வருகிறது.
முன்னதாக முரளிதரன் கதாபாத்திரத்தில் விஜய் சேதுபதி நடிக்க கமிட்டானார். கடந்த 2020 ஆம் ஆண்டு ஃபர்ஸ்ட் லுக் போஸ்டரும் வெளியானது. அப்போது விஜய் சேதுபதி நடிப்பதற்கு விடுதலைச் சிறுத்தைகள் கட்சி உட்பட பல்வேறு தரப்பில் இருந்து எதிர்ப்புகள் கிளம்பியது. இதுமட்டுமல்லாமல், ஈழத் தமிழர்கள் பலரும் முத்தையா முரளிதரனின் படத்தில் விஜய் சேதுபதி நடிக்கக்கூடாது என்று கருத்து தெரிவித்து வந்தனர். பின்பு விஜய் சேதுபதி இப்படத்திலிருந்து விலகி விட்டார் என்பது குறிப்பிடத்தக்கது.
