காஞ்சிபுரம் அருகே இரு சமூகத்தினர் இடையே மோதல்: வீடுகளுக்கு தீ வைப்பு!

Published on 26/08/2017 | Edited on 26/08/2017

காஞ்சிபுரம் அருகே இரு சமூகத்தினர் இடையே மோதல்:

வீடுகளுக்கு தீ வைப்பு!

காஞ்சிபுரம் மாவட்டம் திருக்கழுக்குன்றம் அருகே இருசக்கர வாகனத்தில் வேகமாகச் சென்றவர்களை தட்டிக் கேட்டதால், தலித் மக்களின் வீடுகள் தீக்கிரையாக்கப்பட்டுள்ளன.

திருக்கழுக்குன்றம் அடுத்த நெல்லூர் கிராமத்தில் விநாயகர் சதுர்த்தியை முன்னிட்டு தலித் சமூகத்தை சேர்ந்தவர்கள் தங்கள் பகுதியில் விநாயகர் சிலையை வைத்து வழிபாடு நடத்திக் கொண்டிருந்தனர். அப்போது, அதே ஊரைச் சேர்ந்த வேறு சமூகத்தைச் சேர்ந்த இளைஞர்கள் சிலர் இருசக்கர வாகனத்தில் குடியிருப்பு பகுதியில் அதி வேகமாகச் சென்றுள்ளனர்.

அவர்களை தடுத்து நிறுத்திய தலித் சமூகத்தை சேர்ந்த சிலர், குடியிருப்பு பகுதியில் குழந்தைகள் இருப்பதால் மெதுவாக செல்லுமாறு கூறியுள்ளனர். இதனால் அவர்களுக்கு இடையே வாக்குவாதமும் ஏற்பட்டுள்ளது. பின்னர் அங்கிருந்து புறப்பட்ட இளைஞர்கள் தங்கள் பகுதிக்கு சென்று, ஆதரவாளர்களை அழைத்துக் கொண்டு தலித் குடியிருப்பு பகுதிக்குள் வந்து தாக்குதல் நடத்தியுள்ளனர்.

இந்த தாக்குதலில் தலித் மக்களின் இருசக்கர வாகனங்கள் அடித்து நொறுக்கப்பட்டன. அவர்களின் வீடுகளுக்குள் புகுந்து தொலைக்காட்சி பெட்டிகள் உள்ளிட்டவை சேதப்படுத்தப்பட்டுள்ளன. ஒரு கட்டத்தில் வீடுகளுக்கு தீ வைத்துவிட்டு சென்றுள்ளனர்.