விபத்தில் சிக்கி படுகாயமடைந்த புகழேந்தி!

Published on 07/12/2017 | Edited on 07/12/2017

விபத்தில் சிக்கி படுகாயமடைந்த புகழேந்தி!

திண்டுக்கல் மாவட்டத்தில் உள்ள ஒட்டன்சத்திரம் முன்னாள் ஒன்றிய செயலாளரும், முன்னாள் பெரும் தலைவருமான நல்லசாமி டிடிவி தினகரனின் தீவிர ஆதரவாளராக இருந்து வருகிறார். இவரது மகன் தமிழ் ஆனந்தனுக்கு இன்று ஒட்டன்சத்திரத்தில் திருமணம் நடைபெற்றது.

இந்த திருமணத்திற்கு டிடிவி தினகரன் கலந்துகொண்டு நடந்தி வைக்க இருந்தார். ஆனால், தவிர்க்க ஆர்.கே.நகர் தேர்தல் பணிகளில் இருப்பதால், அவரால் இந்த திருமணத்திற்கு செல்ல முடியவில்லை. இந்த நிலையில்தான் டிடிவி ஆதரவாளரும் கர்நாடக மாநில அதிமுக பொதுச்செயலாளரும் வக்கீலுமான புகழேந்தி இந்த திருமணத்திற்கு பெங்களூரில் இருந்து திண்டுக்கல் வழியாக வந்து கொண்டிருந்தார்.

புகழேந்தியின் கார் திண்டுக்கல் பைபாஸ் ரோட்டில் அதிவேகமாக திரும்பும்போது தீடீரென கட்டுப்பாட்டை இழந்து விபத்துக்குள்ளானது. இதைக்கண்டு அப்பகுதியில் இருந்தவர்கள் விபத்தில் சிக்கியவ புகழேந்தியை திண்டுக்கல்லில் உள்ள தனியார் மருத்துவமனையில் சிகிச்சைக்காக சேர்த்தனர்.

இதில் புகழேந்தியின் தோள்ப்பட்டைப் பகுதியில் உள்ள எலும்புகளில் லேசாக முறிவு ஏற்பட்டிருப்பதாக டாக்டர்கள் கூறி முதலுதவி சிகிச்சை செய்து கோவைக்கு அனுப்பியுள்ளனர்.

- சக்தி