தமிழ் சினிமாவில் வித்தியாசமான கதைக்களத்தை கொண்டு படம் இயக்கி வருபவர் வசந்தபாலன். அந்த வகையில் 'ஜெயில்' படத்தை தொடர்ந்து அர்ஜுன் தாஸை கதாநாயகனாக வைத்து 'அநீதி' படத்தை இயக்குகிறார். இப்படத்தில் அர்ஜுன் தாஸிற்கு ஜோடியாக 'சார்பட்டா பரம்பரை' புகழ் துஷாரா விஜயன் நடிக்கிறார். இயக்குநர் வசந்தபாலன் தன்னுடைய பள்ளிக்கால நண்பர்களுடன் இணைந்து உருவாக்கியுள்ள 'அர்பன் பாய்ஸ் ஸ்டூடியோஸ்' நிறுவனம் இப்படத்தைத் தயாரிக்கிறது. இப்படத்தின் மூலம் வசந்த பாலன் தயாரிப்பாளராக அறிமுகமாகிறார். வசந்த பாலனின் ஆஸ்தான இசையமைப்பாளரான ஜி.வி பிரகாஷ் குமார் இப்படத்திற்கு இசையமைக்கிறார்.
இந்நிலையில் 'அநீதி' படத்தின் படப்பிடிப்பு முழுவதையும் படக்குழு முடித்துள்ளது. இது தொடர்பான புகைப்படங்கள் சமூக வலைத்தளங்களில் படக்குழு பகிர்ந்துள்ளது. இப்படத்தில் வசந்தபாலன், நா.முத்துக்குமாரின் நட்பின் நினைவாக அவரின் கவிதைகளிலிருந்து வரிகளை தொகுத்து ஒரு பாடலுக்கு பயன்படுத்தியுள்ளதாக கூறப்படுகிறது.
