அருண் விஜய் தற்போது வணங்கான் மற்றும் ரெட்ட தல ஆகிய படங்களை கைவசம் வைத்துள்ளார். இதில் வணங்கான் படத்தை பாலா இயக்கியுள்ளார். இப்படம் 2025 பொங்கலுக்கு வெளியாகும் என இன்று படக்குழு அறிவித்துள்ளது. அதே பொங்லை முன்னிட்டு அஜித் நடிப்பில் ஆதிக் ரவிச்சந்திரன் இயக்கத்தில் உருவாகி வரும் குட்-பேட்-அக்லி படமும் வெளியாகவுள்ளதாக அப்படக்குழு அறிவித்திருந்தனர் என்பது குறிப்பிடத்தக்கது.
இதனிடையே ரெட்ட தல படத்தை திருக்குமரன் இயக்கி வருகிறார். படத்தின் படப்பிடிப்பு முழுவதும் முடிந்து தற்போது போஸ்ட் புரொடைக்ஷன் பணிகள் நடைபெற்று வருகிறது. இந்த நிலையில் அருண் விஜய் தனது பிறந்தநாளை இன்று கொண்டாடுகிறார். இதையொட்டி, அவரது ரசிகர் மன்றம் சார்பில் இரத்த தான முகாம் ஏற்பாடு செய்யப்பட்டது. அதில் அருண் விஜய் கலந்து கொண்டு இரத்த தானம் வழங்கினார். பின்பு செய்தியாளர்களிடம் பேசிய அவர், “தமிழகம் முழுவதும் நிறைய இடங்களில் எனது ரசிகர்கள் இரத்த தானம் நடத்துகிறார்கள். ஆரோக்கியமாக இருப்பவர்கள் இரத்த தானம் கொடுக்க முன்வர வேண்டும். எனது ரசிகர்கள் தொடர்ச்சியாக இதை செய்ய வேண்டும் என்பது ஆசை” என்றார்.
பின்பு அஜித்தின் குட் பேட் அக்லி படத்துடன் வணங்கான் வருவது குறித்து கேள்வி கேட்டகப்பட்டது. அதற்கு பதிலளித்த அவர், “அஜித் சார் உச்சத்தில் இருக்கிறார். அவருக்கு போட்டி யாரும் கிடையாது. அவர்களுடைய ரசிகர்கள் என்னையும் நேசிக்கிறார்கள்” என்றார்.
