Skip to main content

அப்துல்கலாம் பாதையில் பணியாற்றும் இளைஞர்

Published on 11/05/2018 | Edited on 11/05/2018

தூக்கத்தில் வருவதல்ல கனவு உன்னை தூங்க விடாமல் செய்வது எதுவோ அதுவே லட்சியக்கனவு என்று கூறி இளைஞர்களின் மனதில் ஆழமான நம்பிக்கை விதையை விதைத்து மறைந்தவர் முன்னாள் குடியரசுத் தலைவர் டாக்டர் ஏ.பி.ஜெ. அப்துல்கலாம். அவரின்  மறைவுக்குப் பின்னர், அவரது கனவை, அவரது வழியிலேயே நிறைவேற்றவேண்டும் என்ற எண்ணத்தில், அவரது பெயரிலேயே டாக்டர் அப்துல் கலாம் கல்வி மற்றும் பசுமை அறக்கட்டளை என்ற  தொண்டு நிறுவனம் ஒன்றை ஏற்படுத்தி பெயரளவிலவோடு நிறுத்திக்கொள்ளாமல் அதை அரசு அனுமதி பெற்று செயல்படும் அமைப்பாக மாற்றி, தமிழ்நாடு மற்றும் புதுவையில் சிறப்பாக செயல்படுத்தி வருபவர்தான் செங்கல்பட்டு அண்ணா நகர் பகுதியை சேர்ந்த  இளைஞர் ஜெயராஜ். 

jayaraj

 

 

 

இவரது அமைப்பில் தமிழ்நாடு, புதுவை மாநிலம் முழுவதும் 15000 க்கும் மேற்பட்ட இளைஞர்கள் உறுப்பினர்களாக இணைந்துள்ளார்கள். இந்த அமைப்பின் மூலம் கல்வி மற்றும் பசுமை உட்பட பல்வேறு நிகழ்வுகளை தொடர்ந்து செய்து வருகின்றனர்.  கடந்த 2015இல் வெள்ளத்தினால் பாதிக்கப்பட்ட சென்னை, காஞ்சிபுரம், கடலூர் மாவட்ட மக்களுக்கு  உணவு, உடை போன்ற அத்தியாவசிய உதவிகளை இவர் தன் குழுவினரோடு சேர்ந்து நேரில் சென்று வழங்கினார்கள். அதோடு நிறுத்திக்கொள்ளாமல் வெள்ளத்தினால் குடிசை வீடுகளை இழந்த 20 ஏழை குடும்பங்களுக்கு சவுதி அரேபியா ஜெத்தா தமிழ்சங்கத்தின் உதவியோடு பல லட்சம் ரூபாய் மதிப்பீட்டில் இலவசமாக வீடுகளையும் கட்டி வழங்கினார்கள். 

 

jayaraj

 

பாதிக்கப்பட்ட இடங்களில் மட்டும் உதவி செய்யாமல், இனி பாதிப்புகள் ஏற்படாமல் இருக்கவும் பல முயற்சிகளை செய்துள்ளனர். அதில் ஒன்று, பூமி வெப்பமடைதலை தடுக்கும் முயற்சியாக பள்ளி மற்றும் கல்லூரி மாணவர்களின் உதவியோடு பல ஆயிரக்கணக்கான மரக்கன்றுகளை இலவசமாக  வழங்கி அவற்றை மாணவர்கள் பாதுகாப்பாக வளர்பதையும் தொடர்ந்து கவனித்து வருகிறார்கள். படிக்க வசதியற்ற 100க்கும் மேற்பட்ட ஏழை மாணவர்களுக்கு கல்வி உதவித்தொகையை வழங்கி மேற்படிப்பு படிக்கவும் வழி செய்துவருகிறார்கள். 'கலாமின் கனவு மாணவன்' என்ற பெயரில் நடப்பாண்டிலும் (2018-2019) 50 சிறந்த மாணவர்களை தேர்வு செய்து அவர்களுக்கு கல்லூரி கட்டணம் செலுத்த ஏற்பாடு செய்துள்ளார்கள். கடந்த இரண்டு ஆண்டுகளில் தமிழகம் மற்றும்  புதுவை  முழுவதும் மின்சார சிக்கனம், குடிநீர் சிக்கனம், புகையிலை குறித்த விழிப்புணர்வு, பாலித்தீன் விழிப்புணர்வு, கண்தானம் குறித்த விழிப்புணர்வு,  இரத்ததானம்,  போக்குவரத்து   விழிப்புணர்வு, நீர்நிலைகளை பாதுகாப்பது போன்று 500க்கும் அதிகமான சேவைகளை செய்துவருகிறார்கள். கடந்த ஆண்டு தமிழகம் முழுவதும் சிறப்பான முறையில் சேவைகளை செய்து வரும் 100க்கும் மேற்பட்ட தொண்டு நிறுவனங்களை ஊக்கப்படுத்தும் விதமாக 'கலாமின் சிறந்த சேவகர் 2017' என்ற விருது வழங்கி  கவுரவப்படுத்தியுள்ளார்கள்.

 

 

 

இவர்களின் செயல்களை பாராட்டும்  விதமாக அமைப்பின் நிறுவனர் ஜெயராஜ்க்கு அமெரிக்காவில் உள்ள SEEEDS மற்றும் சவூதி அரேபியாவில் உள்ள ஜெத்தா தமிழ்சங்கம் போன்ற தொண்டு நிறுவனங்கள் பாரட்டி விருதுககளையும் வழங்கி உள்ளது. கடந்த மாதம் தமிழ் தேசிய பல்கலைக்கழகம் இவரின் சமூக சேவையை பாராட்டி மதிப்புறு முனைவர் பட்டம் வழங்கி கவரப்படுத்தியது குறிப்பிடத்தக்கது. இவரது இலக்கு ஆண்டுக்கு ஒரு லட்சம் மரக்கன்றுகளை நடுவது, ஐம்பது மாணவர்களை படிக்க வைப்பது. தற்போது கூடுதலாக வீடு, வீடாக சென்று வீட்டிற்கு ஒரு மரக்கன்றுகள் வழங்கவும் திட்டமிட்டுள்ளனர். இதுபோன்ற இளைஞர்கள்தான் கலாம் கண்ட கனவு நாயகர்கள் என்பதில் ஐயமுமில்லை...

Next Story

'உயிருக்கும் ரிஸ்க்; நீர் நிலைக்கும் கேடு' - எல்லை மீறும் இன்ஸ்டா ரீல் அடிக்டர்ஸ்

Published on 16/03/2024 | Edited on 16/03/2024
'Living Risk; Insta-reels that defy water levels

அண்மைக்காலமாகவே 'மாஸ்' என்ற பெயரில் ஆயுதங்களுடன் இளைஞர்கள், மாணவர்கள் நடந்து வருவது, தாக்குவது, ஆபத்தான முறையில் வாகனங்களில் பயணம் செய்வது போன்ற ரீல்ஸ் வீடியோக்கள் வெளியாகி நடவடிக்கைகளுக்கு உள்ளாகி வருகிறது.

காவல்நிலையத்தின் வாயில்களில் பட்டாக்கத்தி உள்ளிட்ட ஆயுதங்களுடன் காவல்நிலையத்திலிருந்து வெளியே வருவதுபோல ரீல்ஸ் வீடியோ வெளியிட்ட இளைஞர்கள் பலர் கைது செய்யப்பட்ட சம்பவங்கள் நடந்துள்ளது. இவ்வாறு விதிமீறலில் ஈடுபட்ட இன்ஸ்டா ரீல் வெளியிடும் இளைஞர்கள் அவ்வப்போது கைதாகும் சம்பவங்கள் நடைபெற்றுக் கொண்டிருக்கிறது.

இந்நிலையில் மதுரையில் இளைஞர் ஒருவர் நீர் நிலையில் மிகவும் ஆபத்தான முறையில் இன்ஸ்டா வீடியோ எடுத்த சம்பவம் பரபரப்பை ஏற்படுத்திய நிலையில் அந்த இளைஞரையும் அதற்கு உதவியவர்களையும் கைது செய்ய வேண்டும் என கோரிக்கைகள் எழுந்துள்ளது. மதுரை வைகை ஆற்றில் தண்ணீரில் பெட்ரோலை ஊற்றி தீ வைத்து அந்த நெருப்புக்குள் குதித்து வீடியோ எடுத்து அதனை தன்னுடைய சமூக வலைத்தள பக்கத்தில் இளைஞர் ரீல்ஸாக வெளியிட்டுள்ளார். இதுதொடர்பான அந்த காட்சிகள் இணையத்தில் வைரலாகி வருகிறது.

அதில் நண்பர்கள் உதவியுடன் வைகை ஆற்றில் பெட்ரோலை ஊற்றி தீ வைத்துவிட்டு அந்த நெருப்பிற்கு நடுவில் அந்த இளைஞர் குதிக்கும் காட்சிகள் இடம் பெற்றுள்ளது. ரீல்ஸ் மோகத்தால் இது போன்ற சம்பவங்கள் ஆங்காங்கே அரங்கேறி வரும் நிலையில், இது ரீல்ஸ் எடுப்பவர்களின் உயிருக்கு கேடு விளைவிப்பதோடு மட்டுமல்லாது, நீர்நிலைகளில் பெட்ரோல் போன்ற பொருட்களை ஊற்றுவதால் நீர்நிலைகளும் மாசு அடையும். எனவே இதுபோன்ற நபர்கள் மீது உடனடியாக காவல்துறை நடவடிக்கை எடுக்க வேண்டும் என கோரிக்கை எழுந்துள்ளது.

Next Story

ஐஸ்கிரீம் டப்பாவில் சிக்கிய தலை; எலிக்கும் பிளாஸ்டிக் கேடு

Published on 13/12/2023 | Edited on 13/12/2023
 head stuck in an ice cream can; Plastic is bad for rats

மனிதர்களின் தேவைகளுக்காகப் பயன்படுத்தப்படும் பாலிதீன் கவர்கள், பிளாஸ்டிக் பாட்டில்கள் மற்ற விலங்குகளுக்கும் எவ்வளவு பாதிப்பை ஏற்படுத்தும் என்பது தொடர்பான செய்திகள் அவ்வப்போது வெளியாவது வழக்கம். குறிப்பாக வனத்துறை பகுதிகளில் பிளாஸ்டிக் பாட்டில்களை வீசக்கூடாது என கட்டுப்பாடுகள் விதிக்கப்படுவதும், கடல் பகுதிகளில் குப்பை கூளமாக தேங்கி நிற்கும் பிளாஸ்டிக் பொருட்களால் கடல் உயிரினங்கள் பாதிக்கப்படுவதும் குறிப்பிடத்தக்கது.

இந்தநிலையில் புதுச்சேரியில் சாப்பிட்டு விட்டு தூக்கி எறிந்த ஐஸ்கிரீம் டப்பாவில் தெரியாமல் தலையை மாட்டிக் கொண்ட எலி அவதிப்பட்டதும் அதை அங்கிருந்த காவலர்கள் மீட்டதும் தொடர்பான  வீடியோ காட்சிகள் இணையத்தில் வெளியாகியுள்ளது.

 head stuck in an ice cream can; Plastic is bad for rats

புதுச்சேரி கடற்கரை சாலையில் எலி ஒன்று தலையில் ஐஸ்கிரீம் டப்பாவில் தலை சிக்கியபடி அங்கும் இங்கும் ஓடிக் கொண்டிருந்தது. அப்போது அங்கு பாதுகாப்புப் பணியில் ஈடுபட்டிருந்த காவலர்கள் லாவகமாக பிடித்து எலியின் தலையில் சிக்கி இருந்த பிளாஸ்டிக் ஐஸ்கிரீம் டப்பாவை அகற்றி மீண்டும் விட்டனர். இந்த  காட்சிகள் இணையத்தில் வைரலாகி வருகிறது.