Published on 21/06/2018 | Edited on 21/06/2018
ஏ.ஆர்.முருகதாஸ் - விஜய் கூட்டணியில் உருவாகும் படத்தின் இறுதிக்கட்ட படப்பிடிப்பு விறுவிறுப்பாக நடைபெற்று வரும் நிலையில் இப்படத்தின் தலைப்பு மற்றும் பர்ஸ்ட் லுக் போஸ்டர் வெளியீடு இன்று மாலை 6 மணிக்கு சன் டிவியில் ஒளிபரப்பாக உள்ளது. இந்நிலையில் பர்ஸ்ட் லுக்குகாக ரசிகர்கள் ஆரவாரத்துடன் காத்துக்கொண்டிருக்கும் வேளையில் தற்போது விஜய் படத்திற்கு 'வேறலெவல்' என்று தலைப்பு வைத்திருப்பதாக சமூக வலைத்தளத்தில் நேற்று பரவியது.
பின்னர் சிறிது நேரத்தில் மீண்டும் 'அல்லு', 'ஷார்ப்' என்ற பெயர்கள் கொண்ட தலைப்பு வைத்திருப்பதாக போஸ்டர்கள் வெளியாகின. இவை அனைத்தும் போலியானவை என அந்த டிசைன்களிலும் எழுத்துகளிலிருந்தும் எளிதாகத் தெரிந்தது. தொடர்ந்து வெளிவந்த போலி டைட்டில்களைப் பார்த்த விஜய் ரசிகர்கள் சிலர் 'இது டைட்டில் இல்லடா' என்றே ஒரு வடிவமைப்பை உருவாக்கி பரப்பினர். மாலை 6 மணிக்கு படத்தின் தலைப்பு வெளிவருவதற்குள் சமூக ஊடங்களில் இத்தனை கலாட்டா. இப்பொழுதெல்லாம் இத்தகைய விளம்பரங்களுக்காகவும் ரசிகர்களிடையே ஆர்வத்தை ஏற்படுத்தவும் பெரிய நடிகர்களின் படங்களுக்கு தலைப்பை ஆரம்பத்திலேயே வெளியிடாமல் காப்பது வழக்கமாகியுள்ளது.
