'காதலில் சொதப்புவது எப்படி' படத்தின் மூலம் இயக்குநராக அறிமுகமான பாலாஜி மோகன் தனுஷை வைத்து 'மாரி' மற்றும் 'மாரி 2' படத்தை இயக்கி பிரபலமானார். இயக்கம் மட்டுமின்றி 'ஓபன் விண்டோ' என்ற தயாரிப்பு நிறுவனத்தையும் நடத்தி வருகிறார். இவர் தயாரிப்பில் வெளியான 'மண்டேலா' படம் ரசிகர்கள் மத்தியில் நல்ல வரவேற்பு பெற்றது.
இந்நிலையில் பாலாஜி மோகன் இயக்கும் அடுத்த படத்தை பற்றிய தகவல் தற்போது வெளியாகியுள்ளது. அதன் படி 'காதல் கொஞ்சம் தூக்கலா' என பெயரிடப்பட்டுள்ளதாகவும் இப்படத்தில் காளிதாஸ் ஜெயராம், துஷாரா விஜயன், அமலா பால் உள்ளிட்டோர் நடிக்கவுள்ளதாகவும் கூறப்படுகிறது. கன்னட நடிகை ஷர்மிலா மாண்ட்ரே தயாரிக்கவுள்ள இப்படத்தின் படப்பிடிப்பு லண்டனில் 30 நாள் நடத்த படக்குழு திட்டமிட்டுள்ளதாக சொல்லப்படுகிறது. மேலும் இப்படம் சாரதா சுப்ரமணியன் எழுதிய 'மேக் இட் 2' நாவலை அடிப்படையாகக் கொண்டு ஒரு காதல் காமெடி கதையாக உருவாகவுள்ளதாக திரை வட்டாரங்கள் தெரிவிக்கின்றனர்.
இதனிடையே பா.ரஞ்சித் இயக்கத்தில் சமீபத்தில் வெளியாகி நல்ல வரவேற்பை பெற்ற 'நட்சத்திரம் நகர்கிறது' படத்தில் காளிதாஸ் ஜெயராம், துஷாரா விஜயன் ஜோடியாக நடித்திருந்தார்கள் என்பது குறிப்பிடத்தக்கது.
