லோகேஷ் கனகராஜ் இயக்கத்தில் விஜய் நடிப்பில் உருவாகி வரும் படம் 'லியோ'. இப்படத்தில் கதாநாயகியாக த்ரிஷா நடிக்க பிரபல பாலிவுட் நடிகர் சஞ்சய் தத், அர்ஜுன், மன்சூர் அலி கான், பிரியா ஆனந்த் மற்றும் இயக்குநர்கள் மிஷ்கின், கௌதம் மேனன் என ஒரு பெரிய நட்சத்திரப் பட்டாளமே நடிக்கின்றனர். இப்படம் வருகிற அக்டோபர் 19 ஆம் தேதி வெளியாகவுள்ளது. முதற்கட்ட படப்பிடிப்பு காஷ்மீரில் நடந்து முடிந்த நிலையில் அடுத்தகட்ட படப்பிடிப்பு சென்னையில் நடந்து வருகிறது.
இந்நிலையில் விஜய் நடிக்கும் அடுத்த படம் குறித்த தகவல் வெளியாகியுள்ளது. அதன்படி லியோ படத்தை முடித்துவிட்டு விஜய்யின் 68வது படத்தை வெங்கட் பிரபு இயக்கவுள்ளதாகவும் இப்படத்தை ஏஜிஎஸ் நிறுவனம் தயாரிப்பதாகவும் யுவன் ஷங்கர் ராஜா இசையமைப்பதாகவும் தகவல் வந்துள்ளது. முன்னதாக விஜய் 68வது படத்தை அட்லீ இயக்க சன் பிக்சர்ஸ் தயாரிப்பதாக தகவல் வெளியானது. இதைத் தொடர்ந்து அண்மையில் தெலுங்கு இயக்குநர் கோபிசந்த் மலினேனி இயக்கத்தில் விஜய் ஒரு படம் நடிக்க ஒப்புக்கொண்டதாகப் பேசப்பட்டது. இதைத் தொடர்ந்து தற்போது விஜய்யின் அடுத்த பட இயக்குநர் லிஸ்டில் வெங்கட் பிரபுவும் இணைந்துள்ளார்.
வெங்கட் பிரபு, நாகா சைதன்யாவை வைத்து இயக்கிய 'கஸ்டடி' படம் கடந்த 12 ஆம் தேதி வெளியாகி கலவையான விமர்சனத்தைப் பெற்றது. இதைத் தொடர்ந்து சிவகார்த்திகேயனை வைத்து ஒரு படமும் கிச்சா சுதீப்பை வைத்து ஒரு படமும் வெங்கட் பிரபு இயக்க ஒப்புக்கொண்டிருப்பது குறிப்பிடத்தக்கது. இந்நிலையில் இயக்குநர் வெங்கட் பிரபு நடிகர் விஜய்யை வைத்து இயக்க இருப்பதாக வந்த தகவல் உண்மையாகியுள்ளது. ஏஜிஎஸ் நிறுவனம் தயாரிக்க வெங்கட் பிரபு இயக்க உள்ளார். இசை அமைப்பாளராக யுவன் சங்கர் ராஜா இணைந்துள்ளார். இதற்கான அறிவிப்பு இன்று வெளியாகியுள்ளது.
இந்நிலையில் செய்தியாளர்களைச் சந்தித்த இயக்குநர் வெங்கட் பிரபு, “மிக சந்தோசமாக உள்ளது. படம் குறித்தான அனைத்து அப்டேட்டுகளும் லியோவிற்குப் பின் வரும்” என்றார். தொடர்ந்து, கொஞ்ச நாள் முன்னாடி கங்கை அமரன், விஜய் - அஜித் இருவரும் சேர்ந்து நடிப்பது போல் பேச்சுவார்த்தை சென்று கொண்டிருப்பதாகச் சொன்னார் எனச் செய்தியாளர்கள் கேள்வி கேட்டனர். அதற்கு பதில் அளித்த வெங்கட் பிரபு, “அது என் அப்பாவின் ஆசை” என்றார். இப்படத்தில் அஜித் கேமியோ ரோல் பண்ணலாமா என்ற கேள்விக்கு, “அதெல்லாம் ஒன்றும் இல்லை” என்றார்.
இது வெங்கட் பிரபு படமா விஜய் படமா என்ற கேள்விக்கு, “இப்போதே எல்லாம் சொல்லிவிட்டால் எப்படி. அனைத்தும் சஸ்பென்ஸ்தான். லியோ பற்றி எதாவது தெரியுமா உங்களுக்கு? அவர்கள் எவ்வளவு சீக்ரெட்டாக வைத்துள்ளார்கள்” எனக் கூறினார்.
