'வலிமை' படத்தைத் தொடர்ந்து எச்.வினோத் இயக்கத்தில் 'ஏகே 61' படத்தில் நடித்து வருகிறார் அஜித். போனி கபூர் தயாரிக்கும் இப்படத்தில் மஞ்சு வாரியர், சமுத்திரக்கனி உள்ளிட்ட பலர் முக்கிய கதாபாத்திரங்களில் நடித்து வருகின்றனர். இப்படத்தின் படப்பிடிப்பு தற்போது விசாகப்பட்டினத்தில் நடைபெற்று வருகிறது. இதனிடையே அஜித் சில நண்பர்களுடன் பைக்கில் லடாக் பயணம் மேற்கொண்டு வருகிறார். இது தொடர்பான புகைப்படங்கள் சமூக வலைத்தளத்தில் வெளியானது.
இந்நிலையில் 'ஏகே 61' படத்தின் அடுத்தகட்ட படப்பிடிப்பு தாய்லாந்தில் நடைபெறவுள்ளதாக தகவல் வெளியாகியுள்ளது. இந்த படப்பிடிப்பில் ஆக்ஷன் காட்சிகள் படமாக்கப்படவுள்ளதாகவும் 3 வாரம் இப்படப்பிடிப்பு நடைபெறவுள்ளதாகவும் கூறப்படுகிறது. இதனிடையே லடாக் பயணத்தில் இருக்கும் அஜித் தற்போது ஹெலிகாப்ட்டரில் பறப்பது போலவும் அதனை இயக்குவது போலவும் புகைப்படங்கள் மற்றும் வீடியோக்கள் வெளியாகியுள்ளது. இப்புகைப்படங்கள் தற்போது சமூக வலைத்தளத்தில் ட்ரெண்டாகி வருகிறது.
