Skip to main content

வாக்குகள் பாதுகாப்பாக இருக்குமா? - அமைதிக் களத்தில் அடாவடி!

Published on 12/04/2021 | Edited on 12/04/2021

 

dddd


 
வேளச்சேரி தொகுதியில் வி.வி.பேட் இயந்திரத்துடன் மூன்று இ.வி.எம் இயந்திரங்களைத் தூக்கிச் சென்றது தொடர்பான வீடியோ வைரலாகி பெரும் பரபரப்பை ஏற்படுத்தியிருக்கும் நிலையில், வாக்கு எண்ணும் மையத்தில் ஓட்டு மெஷின்கள் பாதுகாப்பாக இருக்குமா என்ற அச்சம் அரசியல் கட்சிகளுக்கு மட்டுமின்றி, பொதுமக்களுக்கும் ஏற்பட்டுள்ளது.

 

திருப்பூர் தொகுதிக்குட்பட்ட அவிநாசியில் கனியாம்பூண்டி கிராமத்தில் நடந்த வாக்குப் பதிவில்... "உதயசூரியன் சின்னத்துக்கான பொத்தானை அழுத்தினால் அந்த ஓட்டு இரட்டை இலைக்கே பதிவானது' என தி.மு.க.வினர் தேர்தல் அதிகாரிகளிடம் முறையிட்டதுடன் சாலை மறியலிலும் இறங்கினர். தி.மு.க. வேட்பாளர் அதியமான் அவசர அவசரமாக ஸ்பாட்டுக்கு வந்தார்.

 

dddd

 

"இயந்திரக் கோளாறு' என்ற விளக்கத்துடன் அந்த மிஷின் அகற்றப்பட்டு, 1 மணி நேரத்திற்கு வாக்குப்பதிவு நிறுத்தப்பட்டு, மீண்டும் வாக்குப் பதிவு தொடங்கியது. இந்தத் தொகுதியில் அதியமானை எதிர்த்து நிற்பவர் பணபலம் பொருந்திய அ.தி.மு.க. சபாநாயகர் தனபால்.

 

'தொண்டாமுத்தூர் தொகுதியிலுள்ள வாக்குச் சாவடிகளில் சரியான முறையில் வாக்குப்பதிவு நடக்கிறதா?' என தி.மு.க. வேட்பாளர் கார்த்திகேய சிவசேனாதிபதி 127, 127-ஆ சாவடிகளை ஆராய்ந்து விட்டுத் திரும்பிக்கொண்டிருந்தார்.

 

dd

 

அப்போது அமைச்சர் எஸ்.பி. வேலுமணியின் அடியாட்களும், வேறுசில நபர்களும், வேலுமணியின் சகோதரர் அன்புவும், சிவசேனாதிபதியை கெட்ட வார்த்தையில் திட்டினர். நன்கு முகமறிந்த நபர் ஒருவர்... "மினிஸ்டரை எதிர்த்தா நிற்கிறாய்? உன் தலையை வெட்டாமல் விடமாட்டேன்' எனச் சொல்லி ஆக்ரோஷமாய் சிவசேனாதிபதியை அடிக்க முற்பட, தி.மு.க.வினர் அவரை பத்திரமாய் வாகனத்தில் ஏற்றியனுப்பினர்.

 

காரை அங்கிருந்து கிளப்பும்போதும்... போலீஸ் லத்தியை வைத்து காரின் பின்புறத்தில் கொலைவெறியோடு தாக்கினர். "தோல்வி பயத்தில் அ.தி.மு.க.வினரும், பி.ஜே.பி.யினரும் தன் மீதும் தன் காரின் மீதும் கொலைவெறித் தாக்குதல் நடத்தியதாகவும் இதையெல்லாம் காவல் அதிகாரிகள் சிலம்பரசன், ஜெயக்குமார் வேடிக்கை பார்த்ததாகவும், அவர்கள் மீது உரிய நடவடிக்கை எடுக்கவேண்டும்...' என்று மாவட்ட ஆட்சியரிடம் மனு கொடுத்திருக்கிறார் சிவசேனாதிபதி.

 

கோவை தெற்குத் தொகுதியில் பி.ஜே.பி.யினர் டோக்கன் சிஸ்டம் மூலம் பண வினியோகம் செய்துகொண்டிருப்பதாய், காங்கிரசின் வேட்பாளர் மயூரா ஜெயக்குமாருக்கு தகவல் வந்தது. உடனே அங்கே விரைந்த மயூரா ஜெயக்குமார், டோக்கன் வழங்கிக்கொண்டிருந்த 3 பேரை விரட்டிப் பிடித்து தேர்தல் அதிகாரிகளிடம் ஒப்படைத்தார். அவர்களை வண்டியிலேற்றிய தேர்தல் அதிகாரிகள், அவர்கள் மீது எந்த நடவடிக்கையும் எடுக்காமல்... அந்த மூன்று பேரையும் இறக்கிவிட்டுப் போய்விட்டனர்.

 


 

சார்ந்த செய்திகள்

Next Story

'என் அனுபவத்தில் இவிஎம் நம்பிக்கையானது'- கார்த்தி சிதம்பரம் கருத்து

Published on 26/02/2024 | Edited on 26/02/2024
nn

நாடாளுமன்ற மக்களவைப் பொதுத் தேர்தல் விரைவில் நடைபெற உள்ளது. இதனை முன்னிட்டு அரசியல் கட்சிகள் சார்பில் தேர்தல் பணிகளை மேற்கொள்வதற்காக பல்வேறு குழுக்கள் அமைக்கப்பட்டு தீவிர ஆலோசனைகள் நடத்தப்பட்டு வருகின்றன. மேலும் நாடாளுமன்றத் தேர்தலுக்கான பணிகளை அரசியல் கட்சிகள் தற்போதே தீவிரப்படுத்தி வருகின்றன. இத்தகைய சூழலில் இந்தியத் தேர்தல் ஆணையமும் மக்களவைத் தேர்தல் முன்னேற்பாடுகள் குறித்து தொடர்ந்து ஆய்வு நடத்தி வருகிறது.

இவிஎம் மெஷினுக்கு மாற்றாக வாக்குச்சீட்டு முறையை கொண்டு வர வேண்டும் என விடுதலை சிறுத்தைகள், நாம் தமிழர் உள்ளிட்ட சில கட்சிகள் கோரிக்கை வைத்து வருகின்றன. அண்மையில் தேர்தல் அதிகாரிகளுடன் நடைபெற்ற ஆலோசனை கூட்டத்தில் திமுக விவிபேட் குறித்து சந்தேகங்களை எழுப்பியதாகவும் கூறப்படுகிறது.

இந்நிலையில் இவிஎம் மெஷின் நம்பிக்கையானது தான் என சிவகங்கை நாடாளுமன்ற உறுப்பினர் கார்த்தி சிதம்பரம் தெரிவித்துள்ளார். செய்தியாளர்கள் சந்திப்பில் இது குறித்த கேள்விக்குப் பதிலளித்துப் பேசிய கார்த்தி சிதம்பரம், விவி பேடை எடுத்து விட்டால் இவிஎம் நம்பிக்கையானது. என்னை பொறுத்தவரை எலக்ட்ரானிக் ஓட்டிங் மெஷினில் இதுவரை என்னுடைய அனுபவத்தில் எந்த தவறும் நடந்ததாக தெரியவில்லை. ஆனால் மற்றவர்களுக்கு வேறு கருத்து இருக்கிறது என்பதை நான் முழுமையாக அறிகிறேன்'' என்றார்.

Next Story

டெல்லி சட்டசபையில் நம்பிக்கை வாக்கெடுப்பு; கெஜ்ரிவால் அரசின் நிலை?

Published on 17/02/2024 | Edited on 17/02/2024
Arvind Kejriwal government won on Trust vote in Delhi Assembly

டெல்லியில் முதல்வர் அரவிந்த் கெஜ்ரிவால் தலைமையில் ஆம் ஆத்மி ஆட்சி நடைபெற்று வருகிறது. மொத்தம் 70 சட்டசபை தொகுதிகளை கொண்ட டெல்லியில், 62 இடங்களில் ஆம் ஆத்மியும், 8 இடங்களில் பா.ஜ.கவும் கடந்த 2020ஆம் ஆண்டு சட்டசபை தேர்தலை வெற்றி பெற்றிருந்தது. இதனிடையே, ஆம் ஆத்மி கட்சிக்கும், பா.ஜ.க.வும் மோதல் போக்கு நடந்து வருகிறது.

இதனையடுத்து, தனது ஆட்சியை கவிழ்க்க பா.ஜ.க முயற்சி செய்து வருவதாக டெல்லி முதல்வர் அரவிந்த் கெஜ்ரிவால் குற்றஞ்சாட்டி வந்தார். மேலும், ஆம் ஆத்மி எம்.எல்.ஏ.க்களை இழுக்க பா.ஜ.க அரசு குதிரை பேரத்தில் ஈடுபடுவதாக சில தினங்களுக்கு முன் புகார் அளித்தார். 

இந்த நிலையில், டெல்லி சட்டசபையில், இன்று நம்பிக்கை வாக்கெடுப்பு நடைபெறும் என்று அரவிந்த் கெஜ்ரிவால் தனது எக்ஸ் (ட்விட்டர்) பக்கத்தில் நேற்று (16-02-24) தெரிவித்திருந்தார். அதன்படி, டெல்லி சட்டசபையில் இன்று (17-02-24) அவர் நம்பிக்கை வாக்கெடுப்பு நடத்தி அதன் மீதான தீர்மானத்தில் அரவிந்த் கெஜ்ரிவால் பேசினார். அதனைத் தொடர்ந்து, விவாதம் நடைபெற்றது.

இதனையடுத்து, வாக்கெடுப்பு நடத்தப்பட்டது. அதில், அரவிந்த் கெஜ்ரிவால் கலந்து கொண்டு நம்பிக்கை வாக்கெடுப்பிற்கு ஆதரவாக 54 உறுப்பினர்கள் வாக்களித்தனர். ஒரு உறுப்பினர் எதிர்த்து வாக்களித்தார். நம்பிக்கை வாக்கெடுப்பில் வெற்றி பெற்றதையடுத்து, டெல்லி முதல்வர் அரவிந்த் கெஜ்ரிவால் பேசுகையில், ‘ஆம் ஆத்மி கட்சியில் இருந்து ஒரு எம்.எல்.ஏ கூட பிரிந்து செல்லவில்லை. அதில் 2 உறுப்பினர்கள் உடல்நலம் சரியில்லாத காரணத்தினால் நம்பிக்கை வாக்கெடுப்பில் கலந்து கொள்ளவில்லை. 3 உறுப்பினர்கள் சொந்தப் பணி காரணமாக வெளியே சென்றுவிட்டனர். 2 பேர் சிறையில் உள்ளனர். ஒருவர் நிகழ்ச்சியில் கலந்து கொள்ள சென்றுவிட்டார்” என்று கூறினார்.