Skip to main content

ஊர்ச்சுற்றியே 1கோடியே 70லட்சம் சம்பாதிக்கும் நபர்!!!

Published on 31/07/2018 | Edited on 01/08/2018

 

nas

 

மெஷினாக ஓடிக்கொண்டிருக்கும் ஒவ்வொருவரின் வாழ்க்கையிலும், புதிதாக ஏதேனும் ஒரு ஊரைச் சுற்றி பார்த்திட மாட்டோமா என்கிற ஆசை இருக்கத்தான் செய்கிறது. என்னதான் ஆசை இருந்தாலும் அது பெரும்பாலும் கனவாகவே முடிந்துவிடுகிறது சிலருக்கு. கனவை நினைவாக்க முயன்ற வரையில் உழைத்து, கடைசியில் அழுத்து ஓய்ந்துவிடுவதும் வழக்கமாகிறது. இப்படியெல்லாம் இல்லாமல் ஒருவரின் வேலையே ஊர் ஊராகச்சுற்றி, அந்த ஊரின் கலாச்சாரம், பழக்கவழக்கம், ஊரைப் பற்றிய தன்னுடைய கருத்தை சமூக வலைதளங்களில் பதிவிடுவது என்றால் நம்புவீர்களா? நம்பித்தான் ஆக வேண்டும், சமூக வலைதளத்தில் நாஸ் டெய்லி என்று அறியப்பட்டவரின் வேலையே இதுதான். நாடு நாடாகச் சென்று அங்கிருக்கும் பழக்கவழக்கம், கலாச்சாரம், பார்ப்பவர்களுக்கு புதிதாக அல்லது அரிதாக இருப்பதை தன்னுடைய வீடியோவில் பதிவிட்டு சமூக வலைதளத்தில் பதிவிடுவதுதான் இவரின் வேலை. 

 

 

நுஸீர் யாஷின், இஸ்ரேலில் உள்ள விவசாய நகரமான அரபாவில் வளர்ந்த மிடில் கிளாஸ் குடும்பக்காரர். இவரது அம்மா ஆசிரியர், அப்பா உளவியலாளர். நான்கு பிள்ளைகளில் இவர் நடுபிள்ளை. தன்னுடைய 19 வயதில் ஏதேனும் பெரிய கல்லூரியில் படிக்கவேண்டும் என்கிற ஆசையில் இருந்தவர், ஹார்வேர்டு பல்கலைக்கழத்தில் அப்ளிகேஷன் போட்டு, பின்னர் அங்கேயே படித்தார். படித்து முடித்ததும் அமெரிக்காவிலுள்ள நியூயார்க் நகரிலேயே நல்ல வேலை வருடத்திற்கு நூறாயிரம் டாலர் சம்பளம் பெறுகிறார். வாழ்க்கை ஓடிக்கொண்டே இருந்திருக்கிறது, அவருக்கு தான் ஒரு மெஷினோ என்கிற எண்ணம் தோணுகிறது, அலுப்பு தட்டுகிறது. அவர் இதிலிருந்து விடுபட என்ன செய்யலாம் என்று யோசிக்கிறார். ஒருவருடம் வேலை பார்த்து தன்னுடைய சம்பளப்பணத்தில் பாதிக்கு மேல் 60,000 டாலர் சேர்த்துவைத்து 2016ஆம் ஆண்டு வேலையிலிருந்து விடுபடுகிறார். வேலையை விட்டவுடன் சேர்த்துவைத்த பணத்திலிருந்து கேமரா, விமான டிக்கெட் வாங்குகிறார். முழுநேரமாக உலகைச் சுற்ற திட்டமிடுகிறார் நுஸீர் யாஷின் என்கிற நாஸ் டெய்லி. 

 

nas director

 

அரேபிய மொழியில் நாஸ் என்றால் மக்கள். இவர் பேஸ்புக்கில் நாஸ் டெய்லி என்கிற பக்கத்தை தொடர்ந்து, ஒவ்வொரு நாளும் ஒரு நிமிடத்திற்கு ஏதாவது ஒரு இடத்தின் சிறப்பம்சங்களைப்பற்றி வீடியோ பதிவிடுவது, அதுவும் ஆயிரம் நாட்களுக்கு என்று நோக்கத்தை திட்டமிடுகிறார். முதல் பயணமாக நைஜீரியாவுக்கு பயணித்தார், பின்னர் ஒவ்வொரு நாடாக பயணிக்க ரஷ்ய ஊடகம் ஒன்று இவரை நாடி, இவருடைய கண்டண்டிற்கு மாதம் 3000 டாலர் என்று விலை பேசியது. மேலும், இதனை வைத்து சில விஷயங்களை முடிந்தளவிற்கு வியாபாரமாக்கினார். இந்த வீடியோ பதிவிடுவதன் மூலம் இவர் 250,000 டாலர்(இந்திய மதிப்பில் 1கோடியே 70லட்சம்) சம்பாதிக்கிறார். "இது மற்ற டிராவல் டாக்குமெண்டரி வீடியோக்கள் மூலம் சம்பாதிப்பவர்களை விட குறைவே, ஆனால் பிடித்திருக்கிறது" என்கிறார் நாஸ். தற்போது இவரின் பேஸ்புக் பக்கத்தை 7.3 மில்லியன் பேர் பின்தொடர்கின்றனர். பல மில்லியன் பார்வையாளர்கள் இவர் தினசரி போடும் ஒரு நிமிட வீடியோவுக்காக காத்திருக்கிறார்கள். இவரின் வீடியோக்கள் எல்லோரையும் கவர்வதற்கு முக்கிய காரணம், யாரும் செல்லாத நாடுகளுக்கு செல்வதும், புதிதான விஷயங்களைப்பற்றி அதில் குறிப்பிடுவதும் தான். வீடியோ ஒரு நிமிடம் என்பது இன்னுமொரு முக்கிய காரணம். இந்த வேகமாக ஓடும் காலத்தில் டி20 கிரிக்கெட்தான் சக்கைபோடு போடுகிறது என்பதை நாஸ் டெய்லி புரிந்துகொண்டார் போல.

 

Next Story

“என்னை அதிபராக தேர்ந்தெடுக்காவிட்டால்...” - எச்சரிக்கும் டொனால்ட் டிரம்ப்

Published on 19/03/2024 | Edited on 19/03/2024
warns Donald Trump If I'm not elected president

குடியரசு கட்சியைச் சேர்ந்த டொனால்ட்  ட்ரம்ப், அமெரிக்க அதிபராக கடந்த 2016 ஆம் ஆண்டு வெற்றி பெற்றார். அதனைத் தொடர்ந்து நடந்த 2020 ஆம் ஆண்டு அதிபர் தேர்தலில் ஜனநாயகக் கட்சியைச் சேர்ந்த ஜோ பைடனை எதிர்த்துப் போட்டியிட்டார். அந்த தேர்தலில் ஜோ பைடன் வெற்றி பெற்று அமெரிக்க அதிபராகப் பொறுப்பேற்றார். நான்கு ஆண்டுகள் கொண்ட அமெரிக்க அதிபரின் பதவிக்காலம் இந்த ஆண்டுடன் முடிவடைகிறது. 

இந்தாண்டு நவம்பர் மாதத்தில் அமெரிக்க அதிபர் தேர்தல் நடைபெற உள்ள நிலையில், இந்தத் தேர்தலில் ஜனநாயகக் கட்சியைச் சேர்ந்த தற்போதைய அதிபர் ஜோ பைடன் மீண்டும் போட்டியிட உள்ளார். அவரை எதிர்த்து குடியரசுக் கட்சியைச் சேர்ந்தவரும், முன்னாள் அதிபருமான டொனால்ட் டிரம்ப் போட்டியிடுவார் எனக் கடந்த சில தினங்களுக்கு முன் கூறப்பட்டு வந்தது. இதற்கான ஆதரவுகளையும் டிரம்ப் தீவிரமாகத் திரட்டி வருகிறார்.

இதற்கிடையே, குடியரசு கட்சி சார்பில் வேட்பாளராக நிற்கப்போவது யார் என்பதற்கான தேர்தல், அந்த கட்சி சார்பில் நடத்தப்பட்டது. அதில், ஒவ்வொரு மாகாணத்திலும் தேர்தல் நடத்தப்பட்டு அதில் அதிக வாக்கு செல்வாக்கு பெரும் நபர் தான், அதிபர் தேர்தலில் குடியரசு கட்சியின் அதிகாரப்பூர்வ வேட்பாளராக அறிவிக்கப்படுவார் என்று கூறப்பட்டது. அந்த வகையில், முன்னாள் அதிபர் டொனால்ட் டிரம்ப்பை எதிர்த்து, அந்த கட்சியைச் சேர்ந்தவரான நிக்கி ஹாலே போட்டியிட்டார். இவர்கள் இருவருக்கும் கடும் போட்டி நிலவி வந்தது. 

இதனையடுத்து, கடந்த 3 ஆம் தேதியும் 5 ஆம் தேதியும் வேட்பாளர் தேர்தல் நடைபெற்றது. ஆனால், தேர்தல் முடிவுகள் வருவதற்கு முன்பாகவே, நிக்கி ஹாலே போட்டியில் இருந்து விலகினார். இதன் மூலம் குடியரசு கட்சி சார்பில் அதிபர் வேட்பாளராக டொனால்ட் டிரம்ப் நியமிக்கப்பட்டார். அதேபோல், ஜனநாயகக் கட்சி சார்பில் ஜோ பைடன் அதிபர் வேட்பாளராக நியமிக்கப்பட்டுள்ளார். இருவரும் தங்களது தேர்தல் பிரச்சாரத்தை தீவிரமாக நடத்தி வருகின்றனர்.

அந்த வகையில், அமெரிக்காவின் ஓஹியோவில் நடைபெற்ற பிரச்சாரக் கூட்டத்தில் கலந்துகொண்டு பேசிய டொனால்ட் டிரம்ப், “என்னை அதிபராக தேர்வு செய்யாவிட்டால் அமெரிக்கா மிகவும் மோசமான நிலைக்கு தள்ளப்படும். மெக்சிகோவில் கார்களை உருவாக்கி அமெரிக்கர்களுக்கு விற்கும் சீன திட்டங்கள் நிறைவேற்றப்பட்டிருக்கிறது. நான் அதிபரானால், கார்களை அமெரிக்காவில் விற்க முடியாது. இந்த முறை நான் அதிபராக தேர்ந்தெடுக்காவிட்டால், ஜோ பைடனால் நாட்டில் வன்முறை வெடிக்கும். இதனால், மக்கள் என்னை ஆதரிக்க வேண்டும்” என்று கூறினார். 

Next Story

‘புரிதல் இல்லாதவர்கள் பேசாமல் இருப்பது நல்லது’ - அமெரிக்காவுக்கு இந்தியா பதிலடி

Published on 15/03/2024 | Edited on 15/03/2024
India's response to America for CAA

பா.ஜ.க. தலைமையிலான மத்திய அரசால் கடந்த 2019 ஆம் ஆண்டு குடியுரிமை திருத்தச் சட்டம் (C.A.A.) கொண்டுவரப்பட்டது. அதில் கடந்த 2014 ஆம் ஆண்டு டிசம்பர் 31 ஆம் தேதிக்கு முன்னர் இந்தியா வந்தடைந்த வங்கதேசம், பாகிஸ்தான், ஆப்கானிஸ்தான் ஆகிய நாடுகளைச் சேர்ந்த இஸ்லாமியர் அல்லாதோருக்கு இந்தியக் குடியுரிமை வழங்கும் வகையில் மத்திய அரசு புதிய சட்டத் திருத்தத்தைக் கொண்டு வந்தது. இந்தக் குடியுரிமை திருத்தச் சட்டத்திற்கு எதிராக நாடு முழுவதும் கடுமையான எதிர்ப்பு கிளம்பியது. பெரிய அளவில் போராட்டங்களும் நடைபெற்றன.

அதாவது இந்த சட்டத்தில் வெளிநாடுகளில் இருந்து இந்தியாவில் குடியேறிய இந்துக்கள், சீக்கியர்கள் மற்றும் கிறிஸ்தவர்களுக்கு இந்திய குடியுரிமை வழங்க சி.ஏ.ஏ. வகை செய்கிறது. அதே சமயம் வெளிநாடுகளில் இருந்து இந்தியாவில் குடியேறும் இஸ்லாமிய மக்களுக்கு குடியுரிமை வழங்க வழிவகை செய்யப்படவில்லை. மேலும் தமிழகத்தில் உள்ள இலங்கைத் தமிழர்களுக்கு இந்திய குடியுரிமை வழங்கவும் சிஏஏ சட்டத்தில் வழிவகை செய்யப்படாததும் குறிப்பிடத்தக்கது. இதற்கிடையே கடந்த 2019 ஆம் ஆண்டு டிசம்பர் மாதம் நாடாளுமன்றத்தில் இச்சட்டம் நிறைவேற்றப்பட்டது. அதனைத் தொடர்ந்து குடியரசுத் தலைவர் இந்த சட்டத்திற்கு ஒப்புதல் வழங்கி இருந்தார். இந்நிலையில், குடியுரிமை திருத்தச் சட்டம் நேற்று முன்தினம் முதல் (11.03.2024) அமலுக்கு வந்ததாக மத்திய அரசு அறிவித்துள்ளது. இதற்கான அறிவிக்கையை மத்திய அரசு வெளியிட்டது. 

மத்திய அரசு கொண்டு வந்திருக்கும் குடியுரிமை திருத்தச் சட்டத்திற்கு, பல்வேறு எதிர்க்கட்சிகள், தங்களது எதிர்ப்பை தெரிவித்து வருகின்றன. அந்த வகையில், கேரளா மாநில முதல்வர் பினராயி விஜயனும், தமிழக முதல்வர் மு.க.ஸ்டாலினும் தங்கள் மாநிலத்தில் சி.ஏ.ஏ சட்டம் அமல்படுத்தப்பட மாட்டாது என்று கூறி மத்திய அரசுக்கு கண்டனம் தெரிவித்தனர். இதற்கிடையில், சி.ஏ.ஏ சட்டத்தை ரத்து செய்வதில் சாத்தியம் இல்லை எனவும், அந்த சட்டத்தை நிறுத்தும் அதிகாரம் மாநில அரசுகளுக்கு இல்லை என மத்திய உள்துறை அமைச்சர் அமித்ஷா திட்டவட்டமாக கூறியிருந்தார். 
 

India's response to America for CAA

இதனைத் தொடர்ந்து, மத்திய அரசு கொண்டு வந்திருக்கும் சி.ஏ.ஏ சட்டத்திற்கு கவலை தெரிவிப்பதாக அமெரிக்கா கூறியது. இது குறித்து அமெரிக்காவின் வெளியுறவுத்துறை செய்தி தொடர்பாளர் மேத்யூ மில்லர் கூறுகையில், “குடியுரிமை திருத்தச் சட்டத்தின் அறிவிப்பு குறித்து விவரங்களை கடந்த 11 ஆம்  தேதி இந்தியா வெளியிட்டுள்ளது. இந்த அறிவிப்பு எங்களுக்கு கவலையளிக்கிறது. இந்த சட்டம் எவ்வாறு செயல்படுத்தப்படும் என்பதை நாங்கள் உன்னிப்பாகக் கண்காணித்து வருகிறோம். மத சுதந்திரத்திற்கான மரியாதை அளித்தல் மற்றும் அனைத்து சமூகங்களையும் சட்டத்தின் கீழ் சமமாக நடத்தப்படுவது தான் அடிப்படை ஜனநாயகக் கோட்பாடுகள்” என்று தெரிவித்தார்.

இந்த நிலையில், இந்த விமர்சனத்துக்கு இந்திய வெளியுறவுத்துறை அமைச்சகம் பதில் அளித்துள்ளது. இது குறித்து வெளியுறவுத்துறை செய்தி தொடர்பாளர் ரந்தீர் ஜெய்ஸ்வால், “குடியுரிமை திருத்தச் சட்டம் என்பது இந்தியாவின் உள்விவகாரம். சி.ஏ.ஏ என்பது குடியுரிமை வழங்குவது; குடியுரிமையைப் பறிப்பது அல்ல. எனவே இது அடிக்கோடிட்டுக் காட்டப்பட வேண்டும். இந்த சட்டம் நாடற்ற தன்மையின் பிரச்சினையைக் குறிக்கிறது. மனித கண்ணியத்தை வழங்குகிறது மற்றும் மனித உரிமைகளை ஆதரிக்கிறது. சி.ஏ.ஏ சட்டம் குறித்த அமெரிக்க வெளியுறவுத்துறையின் கருத்துக்கள் தவறானவை மற்றும் தேவையற்றவை என்று நாங்கள் கருதுகிறோம். டிசம்பர் 31, 2014 அன்று அல்லது அதற்கு முன் இந்தியாவுக்குள் நுழைந்த ஆப்கானிஸ்தான், பாகிஸ்தான் மற்றும் வங்காளதேசத்தைச் சேர்ந்த இந்து, சீக்கிய, புத்த, பார்சி மற்றும் கிறிஸ்தவ சமூகங்களைச் சேர்ந்த துன்புறுத்தப்பட்ட சிறுபான்மையினருக்கு இந்த சட்டம் பாதுகாப்பான புகலிடத்தை வழங்குகிறது.

India's response to America for CAA

துன்பத்தில் இருப்பவர்களுக்கு உதவும் ஒரு பாராட்டத்தக்க முயற்சியை வாக்கு வங்கி அரசியல் நோக்கில் மட்டும் பார்க்கக் கூடாது. இந்தியாவின் பன்மைத்துவ மரபுகள் மற்றும் பிராந்தியத்தின் பிரிவினைக்குப் பிந்தைய வரலாறு ஆகியவை குறித்து சரியான புரிதல் இல்லாதவர்கள் பேசாமல் இருப்பது நல்லது. இந்தியாவின் நலம் விரும்பிகள் இந்த நடவடிக்கை எடுக்கப்பட்ட நோக்கத்தை வரவேற்க வேண்டும்” என்று தெரிவித்தார்.