Skip to main content

OPS - EPS க்கு உற்சாகம் கொடுத்த உயர்நீதிமன்ற உத்தரவு! என்ன செய்ய போகிறார் சசிகலா?

Published on 05/10/2021 | Edited on 05/10/2021

 

court order on a case about admk internal law change

 

அதிமுகவுக்கான உரிமைப்போரில் அண்மையில் வெளியாகியிருக்கும் உயர்நீதிமன்ற உத்தரவு சசிகலாவை அப்செட்டாக்கி, ஓ.பி.எஸ்.-இ.பி.எஸ். இருவருக்கும் உற்சாகம் தந்திருப்பதாக தெரிகிறது. 

 

ஜெயலலிதா மறைவிற்கு பிறகு அ.தி.மு.க.வின் பொதுச் செயலாளராக கட்சியின் பொதுக்குழுவால் அங்கீகரிக்கப்பட்டார் சசிகலா. இது தற்காலிக ஏற்பாடு எனச் சொல்லப்பட்டாலும், அ.தி.மு.க.வின் சட்ட விதிகளின்படி, சசிகலாவின் நியமனம் செல்லாது என்பதைச் சுட்டிக்காட்டி தலைமைத் தேர்தல் ஆணையத்தில் மனு செய்திருந்தார் அ.தி.மு.க.வின் முன்னாள் எம்.பி.யான கே.சி. பழனிச்சாமி. ஆனாலும், அ.தி.மு.க. எம்.எல்.ஏ.க்கள் ஆதரவுடன் முதலமைச்சராவதற்காக அப்போதைய கவர்னர் வித்யசாகர்ராவை சந்தித்து உரிமையும் கோரினார் சசி. அதனை ஏற்பதில் வித்யாசாகர் காலதாமதம் செய்ய, சொத்துக் குவிப்பு வழக்கின் தீர்ப்பு அவரை 4 ஆண்டுகாலம் சிறையில் தள்ளியது. அப்போது ஓ.பி.எஸ். தர்மயுத்தம் நடத்திக்கொண்டிருந்த காரணத்தால், எடப்பாடி பழனிச்சாமியை முதல்வராக்கிவிட்டு சிறைக்குச் சென்றார் சசிகலா.

 

அதன்பிறகான சில அரசியல் மாற்றங்களுக்கு பிறகு, 2017, செப்டம்பர் 12-ந் தேதி நடந்த அ.தி.மு.க. பொதுக்குழுவில், பொதுச்செயலாளர் என்ற பதவி ஒழிக்கப்பட்டு ஒருங்கிணைப்பாளர், இணை ஒருங்கிணைப்பாளர் என்கிற 2 புதிய பதவிகளை உருவாக்கி, பொதுச்செயலாளருக்குரிய அனைத்து அதிகாரங்களும் இந்த பதவிகளுக்கு மாற்றப்பட்டன. இதற்காக அ.தி.மு.க.வின் சட்ட விதிகளில் திருத்தம் செய்யப்பட்டு பொதுக்குழுவின் ஒப்புதலும் பெறப்பட்டது. ஒருங்கிணைப்பாளராக ஓ.பி.எஸ்.சும், இணை ஒருங்கிணைப்பாளராக இ.பி.எஸ்.சும் நியமிக்கப்பட்டார்கள். அ.தி.மு.க.விலிருந்து சசிகலாவும், தினகரனும் நீக்கப்பட்டனர்.

 

இதனை எதிர்த்து தலைமைத் தேர்தல் ஆணையத்தில் வழக்குத் தொடர்ந்தார் சசிகலா. கே.சி.பழனிச்சாமியும் சட்டத்திருத்தங்களுக்கு எதிராக மனு செய்தார். இந்த நிலையில், ஆர்.கே.நகர் தொகுதி இடைத்தேர்தல் குறுக்கிட்டதால், ஓ.பி.எஸ்.-இ.பி.எஸ். தலைமைக்கே கட்சியின் பெயரையும், பயன்படுத்தும் உரிமையை கொடுத்தது தலைமைத் தேர்தல் ஆணையம். அதேசமயம், சசிகலாவால் தொடரப்பட்ட வழக்குகள் இப்போதுவரை நிலுவையில்தான் உள்ளன.

 

இந்தநிலையில்தான், திருச்செந்தூரை சேர்ந்த வழக்கறிஞர் ராம் குமார் ஆதித்தன் தாக்கல் செய்த மனுவில், "அ.தி. மு.க.வின் சட்ட விதிகளின்படி பொதுச்செயலாளர் பதவியையும் அதற்குரிய அதிகாரங்களையும் மாற்றவோ, புதிய பதவிகளை உருவாக்கவோ பொதுக் குழுவுக்கு அதிகாரமில்லை. ஆனால், கட்சியின் சட்டவிதிகளில் செய்யப்பட்ட திருத்தங்களை தேர்தல் ஆணையம் ஏற்றுக்கொண்டிருக்கிறது. பொதுச் செயலாளராக இருந்த ஜெயலலிதாவால் அளிக்கப்பட்டிருந்த கட்சி விதிகளின்படி இந்த திருத்தம் மேற்கொள்ளப்பட்டதா என்பதை தேர்தல் ஆணையம் பரிசீலிக்கவில்லை. அதனால், ஓ.பன்னீர்செல்வம் மற்றும் எடப்பாடி பழனிச்சாமிக்கு அதிகாரங்கள் அளித்து திருத்தம் செய்யப்பட்ட விதிகளை தேர்தல் ஆணையம் ஏற்றுக்கொண்டது தவறானது. ஆணையத்தின் உத்தரவை ரத்து செய்வதுடன் 2016, டிசம்பர் 5-ல் (ஜெயலலிதா மறைவின்போது) இருந்த அ.தி.மு.க.வின் சட்டவிதிகளை கட்சியினர் கடைப்பிடிக்க உத்தரவிட வேண்டும்' என்று கோரியிருந்தார்.

 

இந்த மனு மீது கடந்த 22-ந் தேதி விசாரணை நடத்திய சென்னை உயர்நீதிமன்ற தலைமை நீதிபதி சஞ்சீப் பானர்ஜி தலைமையிலான முதல் அமர்வு, "அ.தி.மு.க. தரப்பில் தாக்கல் செய்யப்பட்ட ஆவணங்களை தேர்தல் ஆணையம் ஏற்றுக் கொண்டதை எதிர்த்து இந்த வழக்கு தொடரப்பட்டிருக்கிறது. சில மாதங்களுக்கு முன்புவரை அ.தி.மு.க. கட்சிதான் ஆட்சியில் இருந்துள்ளது. 2018-க்கு பிறகு நடந்த அனைத்து தேர்தல்களிலும் அந்த கட்சி போட்டியிட்டிருக்கிறது. பதிவு செய்யப்பட்ட ஒரு அரசியல் கட்சியின் அங்கீகரிக்கப்பட்ட பிரதிநிதியால் அளிக்கப்படும் ஆவணங்களை தேர்தல் ஆணையம் ஏற்பதில் தவறில்லை. இதில் ஆட்சேபனை இருந்தால் சிவில் நீதிமன்றத்தை மனுதாரர் அணுகலாம்''‘என்று உத்தரவு பிறப்பித்திருக்கிறது.

 

சசிகலாவுக்கு எதிராக அரசியல் செய்துவரும் எடப்பாடி பழனிச்சாமிக்கு இந்த உத்தரவு பெரிய பூஸ்ட் என்கிற எடப்பாடி ஆதரவு சீனியர்கள், "கட்சியின் சட்ட விதிகளை முன் வைத்துதான் இந்த விவகாரத்தை பூதாகரமாக்கி வந்தார் சசிகலா. அவரால் தொடரப்பட்ட வழக்கு எதிர்காலத்தில் ஓ.பி.எஸ்.- இ.பி.எஸ்.சிடமுள்ள அதிகாரத்தை பறித்துவிடுமோ என எங்களுக்குக்கூட சந்தேகம் இருந்தது. ஆனால், ஓ.பி.எஸ்., இ.பி.எஸ். சார்பில் மதுசூதனன் தாக்கல் செய்த ஆவணங்களை தேர்தல் ஆணையம் ஏற்றுக்கொண்டதில் முரண்பாடுகளோ, தவறுகளோ இல்லையென்று தற்போது சென்னை உயர்நீதிமன்றமே தீர்ப்பளித்திருக்கும் நிலையில், எதிர்காலத்திலும் எங்களுக்கு சாதகமான தீர்ப்பு தான் கிடைக்கும்' என்கிறார்கள் அழுத்தமான நம்பிக்கையுடன்.

 

சசிகலாவின் வழக்கறிஞர் ராஜாசெந்தூர் பாண்டியனிடம் கேட்டபோது, "இந்த வழக்கில் தீர்ப்பளித்துள்ள சென்னை உயர்நீதிமன்றம், நிர்வாக ரீதியிலான பணிகளை மட்டும்தான் தேர்தல் ஆணையம் செய்யும். ஒரு கட்சியின் முக்கிய பிரதிநிதியாக இருக்கும் ஒருவர் கொடுக்கும் ஆவணங்களைப் பெற்றுக்கொள்வது ஆணையத்தின் பணி. அதைத்தான் அ.தி.மு.க. வழக்கில் செய்திருக்கிறது. உள்கட்சி விவகாரங்களில் தேர்தல் ஆணையம் தலையிடுவதில்லை. மனுதாரர் விரும்பினால் சிவில் நீதிமன்றத்தை அணுகலாம் என சொல்லியிருக்கிறது. சிவில் நீதிமன்றத்துக்கு வழக்கு வந்தால் அதில் சரியான பரிகாரம் கிடைக்கலாம். அதனால் எங்களுக்கு இது ஆரோக்கியமான தீர்ப்புதான்''‘என்கிறார் உறுதியாக.

 

சசிகலாவை பொதுச்செயலாளராக நியமித்ததை எதிர்த்து தேர்தல் ஆணையத்திலும் டெல்லி உயர்நீதிமன்றத்திலும் வழக்கு தொடர்ந்துள்ள கே.சி.பழனிச்சாமியிடம் இது குறித்து விவாதித்தபோது, "ஒரு கட்சியின் பிரதிநிதி கொடுத்த ஆவணங்களைப் பதிவு செய்துகொள்கிறது ஆணையம். ஆனால், கொடுக்கப்பட்ட ஆவணங்கள், கட்சியின் விதிகளின்படி தவறானது என ஆதாரப்பூர்வமாக ஆணையத்தில் முறையிட்டாலும் அதனை ஆய்வு செய்கிற வேலை அதற்கு கிடையாது. கட்சியின் சின்னம் யாருக்கு என்பதை மட்டும்தான் ஆணையம் முடிவு பண்ணுகிறது. அதேசமயம், கட்சியின் சட்டவிதிகளுக்கு முரணாக ஆவணங்கள் இருந்தால் சிவில் கோர்ட்டில் முறையிட்டு பரிகாரம் தேடுங்கள் என சொல்கிறது நீதிமன்றம்.

 

என்னுடைய வழக்கு டெல்லி உயர்நீதிமன்றத்தில் நிலுவையில் இருக்கிறது. நான் கேட்டது கட்சிக்கு டைரக்ஷன் கொடுங்கள் என்பதுதான். அது சிவில் சூட்டில்தான் வருகிறது. அதாவது, சசிகலா -தினகரனுக்கும், இ.பி.எஸ்.- ஓ.பி.எஸ்.சுக்கும் இடையிலான இரட்டை இலை சின்னம் தொடர்பான வழக்கில், டெல்லி உயர்நீதிமன்ற நீதிபதி சிஸ்தானி தலைமையிலான டிவிஷன் பெஞ்ச் சில உத்தரவை பிறப்பித்திருக்கிறது. குறிப்பாக, 52 முதல் 55 வரையிலான பத்தியில், பொதுச்செயலாளர் என்றோ, ஒருங்கிணைப்பாளர் என்றோ எப்படி வேண்டுமானாலும் வைத்துக் கொள்ளுங்கள். ஆனால், அடிப்படை உறுப்பினர்களால்தான் கட்சியின் பொதுச் செயலாளர் தேர்ந்தெடுக்கப்பட வேண்டும் என்கிற சட்ட விதியை திருத்தியது தவறு. கட்சியின் தலைமையை தேர்ந்தெடுக்கும் அதிகாரம் பொதுக்குழுவுக்கு இல்லை. தொண்டர்களுக்கு கொடுக்கப்பட்ட உரிமையை பறித்தது தவறு என்று டிவிஷன் பெஞ்ச் தனது உத்தரவில் சொல்லியிருக்கிறது.

 

அந்த வகையில், "இந்த டிவிஷன் பெஞ்ச் சொன்ன தீர்ப்பை அ.தி.மு.க. கட்சி அமல்படுத்த தேர்தல் ஆணையத்துக்கு உத்தரவிடுங்கள்' என்று டெல்லி ஹை-கோர்ட்டில் நான் போட்டுள்ள வழக்கு இன்னும் நிலுவையில் இருக்கிறது. நான் இந்த வழக்கை 2019-ல் தாக்கல் செய்தபோது, டிவிஷன் பெஞ்ச் உத்தரவை எதிர்த்து சுப்ரீம் கோர்ட்டுக்கு இ.பி.எஸ்.-ஓ.பி.எஸ். சென்றிருப்பதால் அதன் முடிவு தெரியாமல் நான் போட்ட வழக்கை விசாரிக்கக்கூடாது என சசிகலா தரப்பில் மனு போடப்பட்டது. அதனால் விசாரணை நிலுவையில் இருந்தது. அதேசமயம், "டிவிஷன் பெஞ்ச் கொடுத்துள்ள தீர்ப்பு செல்லும்' என உறுதி செய்தது உச்சநீதிமன்றம். இதனையடுத்து எனது வழக்கின் விசாரணையும் நடந்தது. ஆனால், கொரோனா விவகாரத்தால் பலமுறை வழக்கு ஒத்தி வைக்கப்பட்டது. அக்டோபரில் வழக்கு விசாரணைக்கு வரும் என எதிர்பார்க்கிறேன்.

 

சென்னை உயர்நீதிமன்றம் சிவில் கோர்ட்டில் பரிகாரம் தேடுங்கள் என சொல்லப்பட்டிருக்கும் நிலையில், எனது வழக்கு முக்கியத்துவம் பெறுகிறது. அ.தி.மு.க.வின் சட்ட விதிகளை திருத்தம் செய்ததும், பொதுச்செயலாளராக சசிகலாவை பொதுக்குழு தேர்ந்தெடுத்ததும் கட்சியின் சட்டவிதிகளுக்கு முரணானது. அதனால், இரண்டு விசயங்களுமே செல்லாது என சிவில் கோர்ட்டில் தீர்ப்பு வரத்தான் போகிறது. சென்னை உயர்நீதிமன்றத்தின் தற்போதைய தீர்ப்பு அதற்கு வழிவகுத்துள்ளது. இ.பி.எஸ்., ஓ.பி.எஸ்., சசிகலா ஆகிய மூவருக்குமே சென்னை உயர்நீதிமன்றத்தின் உத்தரவு மிக பின்னடைவைத் தந்திருப்பதுதான் நிஜம். இந்த மூவரிடமிருந்து கட்சியைப் பாதுகாக்கும் உயரிய தீர்ப்பு எனது வழக்கில் மிக விரைவில் கிடைக்கும்'' என்கிறார் கே.சி.பழனிச்சாமி.

 

 

Next Story

ட்ரோல் செய்ய வந்த இடத்தில் ட்ரோலில் சிக்கிய அ.தி.மு.க. சரவணன்

Published on 29/03/2024 | Edited on 29/03/2024
ADMK Saravanan got trolled where he came to troll

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

அதிமுக சார்பாக மதுரையில் டாக்டர் சரவணன் வேட்பாளராக அறிவிக்கப்பட்டு பரப்புரைகள் தொடங்கப்பட்டுள்ளது. முன்னாள் அமைச்சர் செல்லூர் ராஜு அவரை ஆதரித்து பிரச்சாரம் மேற்கொண்ட நிலையில், பிரேமலதா விஜயகாந்த் அதிமுக வேட்பாளர் சரவணனை ஆதரித்து பிரச்சாரம் மேற்கொண்டார்.

இந்நிலையில், மதுரையில் நடைபெற்ற பரப்புரை கூட்டத்தில் பேசிய வேட்பாளர் சரவணன், “இங்கிருந்த பாராளுமன்ற உறுப்பினரை சு.வெ என்று சொல்வார்கள். சும்மாவே இருந்தார்; இருக்கப் போறாரு என்று தெரிந்ததால் அவருக்கு அப்படி பெயர் வந்ததா என தெரியல. அவர் ஒரு ட்விட்டர் அரசியல்வாதி. ஆன்லைனில்  மட்டும் தான் இருப்பார். அவருடைய செயல் ஆன்லைனில் மட்டும் தான் இருக்கும். மக்களை சந்தித்ததே கிடையாது. அவர் கதை எழுதிக் கொண்டிருந்தார். இப்பொழுது கதை விட்டுக் கொண்டிருக்கிறார். கடைசியாக மூன்று மாதம் வந்து ஒன்று இரண்டு திட்டங்களை செய்து கொண்டிருக்கிறார். அவர் இவ்வளவு திட்டங்களை சொல்லி இருக்கிறாரே அந்த திட்டங்கள் எல்லாம் நடந்து இருக்கா என்று பார்ப்பதற்காக பைனாகுலரோடு நான் வந்திருக்கிறேன். எங்காவது கடந்த பாராளுமன்ற உறுப்பினர் வெங்கடேசன் செஞ்ச திட்டம் கண்ணுல படுதா என்று பார்க்கிறேன்'' என கூறியவாறே கையில் இருந்த பைனாகுலரில் பார்த்தார். ஆனால் இறுதி வரை சரவணன் பைனாகுலரில் முன்பக்கம் இருந்த லென்ஸ் கவரை திறக்காமல் பார்த்துக் கொண்டிருந்தார். இந்த காட்சிகள் சமூக வலைத்தளங்களில் ட்ரோல் செய்யப்பட்டு வருகிறது.

Next Story

“திருச்சி அதிமுக வேட்பாளர் வெற்றிக்கு ஒற்றுமையுடன் பாடுபட வேண்டும்” - தங்கமணி

Published on 29/03/2024 | Edited on 29/03/2024
 Trichy AIADMK candidate must work together for victory says Thangamani

திருச்சி மாவட்டம் முசிறி தா.பேட்டை ரோட்டில் அமைந்துள்ள தனியார் மண்டபத்தில் பெரம்பலூர் பாராளுமன்றத் தொகுதி அதிமுக வேட்பாளர் சந்திரமோகன் அறிமுகம் மற்றும் செயல் வீரர்கள் ஆலோசனைக் கூட்டம் நடைபெற்றது. கூட்டத்திற்கு திருச்சி புறநகர் மாவட்டச் செயலாளர் பரஞ்சோதி தலைமை வகித்தார். முன்னாள் எம்எல்ஏக்கள் செல்வராசு, மல்லிகா, இந்திரா காந்தி, பரமேஸ்வரி, முருகன் ஆகியோர் முன்னிலை வகித்தனர். முன்னாள் அமைச்சர்கள் மோகன், எம்.ஆர். விஜயபாஸ்கர், நாமக்கல் மாவட்டச் செயலாளரும் பெரம்பலூர் பாராளுமன்றத் தொகுதி பொறுப்பாளருமான தங்கமணி ஆகியோர் அதிமுக வேட்பாளரை ஆதரித்துப் பேசினார்.

அப்போது முன்னாள் அமைச்சர் தங்கமணி பேசியதாவது: பண பலமா? அதிகார பலமா? என்று நிரூபிக்கின்ற இந்த தேர்தலை பொறுத்தவரை நாம் வீடு வீடாகச் சென்று திண்ணைப் பிரச்சாரம் மேற்கொண்டு வாக்குகள் சேகரிக்க வேண்டும் எனவும்,  பூத்துக்கு 500 வாக்குகள் பெற்றால் கூட நாம் வெற்றி பெற முடியும். 15 நாள் உழைப்பு அடுத்த ஐந்து வருடத்திற்கான மக்கள் பலனை தரும். திருச்சி மாவட்டம் அதிமுகவின் கோட்டை என்பதை நாம் மீண்டும் நிரூபிக்க வேண்டும். ஒவ்வொரு வீட்டிற்கும் ஐந்து முறை சென்று கழக தொண்டர்கள் வாக்குகள் சேகரிக்க வேண்டும். இறந்து போனவர்கள், வெளிநாட்டில் இருப்பவர்கள் வாக்குகளை கண்டறிந்து கள்ள வாக்குகளை நாம் தடுக்க வேண்டும். அதிமுக ஆட்சியில் விலைவாசி கட்டுக்குள் இருந்தது. திமுக ஆட்சியில் விலைவாசி மற்றும் அனைத்து கட்டணங்களும் உயர்ந்துள்ளது.

நகை கடன் அனைவருக்கும் தள்ளுபடி என்று கூறிவிட்டு 45 லட்சம் பேரில் 12 லட்சம் பேருக்கு மட்டுமே தள்ளுபடி செய்துள்ளனர். 10 ஆண்டுகளில் தாலிக்கு தங்கம், லேப்டாப், இலவச சைக்கிள், மகளிர் திருமண உதவித் திட்டம் உள்ளிட்ட பல்வேறு மக்கள் திட்டங்களை நாம் நிறைவேற்றியுள்ளோம். 2026 ஆம் ஆண்டு எடப்பாடி பழனிசாமி தான் மீண்டும் முதலமைச்சர் என உறுதிமொழி ஏற்போம். உள்ளாட்சி தேர்தலுக்கும், வரும் 2026 ஆம் ஆண்டு நடைபெற உள்ள சட்டமன்றத் தேர்தலுக்கும் இந்த நாடாளுமன்றத் தேர்தல் அடித்தளமாக அமையும். பெரம்பலூர் நாடாளுமன்ற தொகுதி வேட்பாளர் சந்திரமோகனுக்கு இரட்டை இலை சின்னத்தில் பெருவாரியான வாக்குகள் பெற்று வெற்றி பெற செய்ய வேண்டுமாய் கழக தொண்டர்கள் அனைவரையும் கேட்டுக்கொள்கிறேன் என்று பேசினார்.

வேட்பாளர் சந்திரமோகனை அறிமுகப்படுத்தி விஜயபாஸ்கர் பேசியதாவது: தேர்தல் வாக்குறுதிகளை நிறைவேற்றியவர் முன்னாள் முதலமைச்சர் ஜெயலலிதா. ஏழைகளுக்கு 20 கிலோ அரிசி, தாலிக்கு தங்கம், மாணவர்களுக்கு லேப்டாப் கொடுத்தார். ஆனால் இந்த திமுக ஆட்சியில் அந்த திட்டத்தை எல்லாம் நீக்கி விட்டனர். நீட் ஒழிக்கிறேன் என்று சொல்லி இப்போது மத்தியில் காங்கிரஸ் ஆட்சி வந்த உடன் நீக்குகிறோம் என்று சொல்லி பொய் பிரச்சாரம் செய்து வாக்கு கேட்டு செல்வார்கள். அந்த பொய் பிரச்சாரத்தை முறியடிக்கும் வகையில் நமது திண்ணை பிரச்சாரம் இருக்க வேண்டும் என செயல் வீரர்களுக்கு ஆலோசனைகள் வழங்கினார்.

இதனை அடுத்து வேட்பாளர் சந்திரமோகன் பேசியதாவது:  என்னை எந்த நேரத்திலும் பொதுமக்கள் தொடர்பு கொள்ளலாம். நான் வெற்றி பெற்றவுடன்  இப்பகுதிகளுக்குரிய தேவைகளை கவனத்தில் கொண்டு நிறைவேற்ற பாடுபடுவேன் எனப் பேசினார்.

முன்னதாக முன்னாள் எம்எல்ஏ செல்வராஜ் அனைவரையும் வரவேற்றுப் பேசினார். கூட்டத்தில் தேமுதிக மாவட்டச் செயலாளர் குமார், புதிய தமிழகம் கட்சி மாவட்டச் செயலாளர் சின்னையன் , வளரும் தமிழகம் கட்சி மாவட்ட செயலாளர் தமிழன் துரைராஜ், எஸ்டிபிஐ கட்சி மாவட்டச் செயலாளர் அசாருதீன் உட்பட கூட்டணிக் கட்சி நிர்வாகிகள் தொண்டர்கள் பலர் கலந்து கொண்டனர். நிறைவில் நகரச் செயலாளர் எம்.கே. சுப்ரமணியன் நன்றி கூறினார்.