Skip to main content

"தொண்டனாவே இருந்து பழகிருச்சு, தலைவரானது மறந்துருச்சு" - சிவாஜியின் அரசியல் மேடை...

 

sivaji ganesan political speech in salem

 

நடிகர் திலகம் பட்டத்துடன் திரைத்துறையிலும் மக்கள் மனதிலும் அசைக்கமுடியாதவராய் சிம்மாசனமிட்டு அமர்ந்திருந்தவர் சிவாஜி கணேசன். திரைத்துறை கொடுத்த வெற்றியையும், மக்கள் கொடுத்த அன்பையும் நம்பி அரசியலில் குதித்த சிவாஜி, காங்கிரஸ் கட்சியில் மிகமுக்கிய தலைவராகக் குறுகிய காலத்தில் உருவெடுத்தார். ஆனால், 1989 ஆம் ஆண்டு நடைபெற்ற சட்டமன்றத் தேர்தலில் காங்கிரஸ் கட்சி அதிமுகவின் ஜெ அணிக்கு ஆதரவு கொடுப்பதா அல்லது ஜா அணிக்கு ஆதரவு கொடுப்பதா என்ற பிரச்சனை ஏற்பட்டபோது மனஸ்தாபம் காரணமாகக் காங்கிரஸ் கட்சியிலிருந்து வெளியேறினார் சிவாஜி. அதன்பின்னர், தமிழக முன்னேற்ற முன்னணி கட்சியைத் தொடக்கி ஜா அணியை ஆதரித்த அவர், அந்த தேர்தலில் ஜா அணியுடன் இணைந்து தேர்தலை எதிர்கொண்டு படுதோல்வி அடைந்தார். இந்த தோல்விக்குப் பிறகு கட்சியைக் கலைத்துவிட்டு ஜனதா தளம் கட்சியில் தன் ஆதரவாளர்களுடன் இணைந்தார். இப்படிப்பட்ட சூழலில், 1991 ஆம் ஆண்டு மார்ச் மாதம் சேலத்தில் நடைபெற்ற ஜனதா தளம் கட்சி கூட்டத்தின் போது நடைபெற்ற சம்பவங்கள் குறித்து 23.3.1991 ல் வெளியான நக்கீரனில் இடம்பெற்ற கட்டுரை.

 

ஜனதாதள மாநாடு!

 

9-ஆம் தேதி நடைபெறப் போகும் ஜனதாதள மாநாட்டுக்கு 7-ஆம் தேதி இரவே சென்னையில் இருந்து கிளம்பி, அதிகாலை 2 மணிக்கு சேலம் ஜங்ஷனுக்கு வந்து சேர்ந்தார் சிவாஜி. இரவு 8 மணியில் இருந்தே தொண்டர்கள் கூட்டம் சேலம் ஜங்ஷனில் கூட ஆரம்பித்தது. எல்லா பக்கம் இருந்தும் சிவாஜி பாடல்களே ஒலித்துக் கொண்டிருந்தன.

 

2 மணிக்கு இரயிலை விட்டு இறங்கிய சிவாஜியுடன் வழக்கமான சிவந்த கண்களுடன் ராஜசேகரன், ஜனதாதள நிர்வாகிகள், இவர்களுடன் ஆளைப் பயமுறுத்தும் கடா மீசையுடன் சிவாஜியை அணைத்தவாறு ஒருவர், (சிவாஜிக்கு எஸ்கார்டாம்) என ஒரு பெரிய பட்டாளம். 

 

உடல்நலக் குறைவுக்கு பின் மிகவும் இளைத்துப்போய், ஆனால் 'ட்ரிம்' மாக வந்த சிவாஜியை கண்டதும், ''முப்பிறவி கண்ட நடிகர் திலகம் வாழ்க'' என்ற கோஷம் புதிதாக முளைத்தது. ஜங்ஷனை விட்டு சிவாஜி வெளியே வந்ததும் சுமார் கால்மணி நேரத்துக்கு அதிர்வேட்டுகள் முழங்கின. தாரைதப்பட்டை முழங்க சிவாஜியே எதிர்பாராத அளவுக்கு வரவேற்பு சிறப்பாக அமைந்தது. சிவாஜியின் முகத்தில் பிரகாசம். 

 

காரில் ஏறப்போன சிவாஜியிடம், கூட்டத்தை மீறிக் கொண்டு ஓடி வந்த தொண்டர் ஒருவர், 'அண்ணே நல்லா இருக்கீங்களா? உங்களுக்கு என்னவோ ஆகிடுச்சுன்னு கிளப்பி விட்டுட்டானுங்க!' என்றார் அழுதபடி.

 

'நீங்கல்லாம் இருக்கறப்ப எனக்கு என்னய்யா ஆகும்? இன்னும் ரொம்ப காலம் உங்களோட இருப்பேன்' என்று தலையை சாய்த்தபடி ஆறுதல் கூறினார் சிவாஜி. பின்பு நேஷனல் ஓட்டலில் ஓய்வெடுக்க கிளம்பிவிட்டார்.

 

மறுநாள் காலை 9 மணிக்கு நேரு கலையரங்கில் மாநாடு என்று அறிவித்தாலும், 10.30மணிக்குதான் ஆரம்பித்தது. ரூமில் இருந்துகொண்டே சிவாஜி வரலாமா? வரலாமா? என்று கேட்டுக்கொண்டிருக்க, 'அண்ணே, இன்னும் கொஞ்சம் கூட்டம் சேரட்டும், ஹால் நிரம்பியவுடன் போகலாம்' என்று மாவட்ட நிர்வாகிகள் கட்டை போட்டுக் கொண்டிருந்தார்கள்.

 

10.30க்கு கிளம்பி 10.35-க்கு மாநாட்டு திடலுக்கு வந்து சேர்ந்தார் சிவாஜி.  

 

சிவாஜியுடன் செங்காளியப்பன், கர்நாடக முன்னாள் அமைச்சர் ரகுபதி,சேலம் மாவட்ட வடக்கு தலைவரும் மாவட்ட அமைப்பாளருமான சிவப்பிரகாசம் மற்றும் பலர் ஏகப்பட்ட கார்களில் வந்திறங்கினர்.

 

சிவாஜி வந்ததும் ''வாழ்க'' கோஷம் தூள் கிளப்பியது. இடையே செங்காளியப்பன் வாழ்க என்னும் கோஷமும் ஈனஸ்வரத்தில் ஒரு வேனில் இருந்து கேட்க, சிவாஜி திரும்பி பார்த்தார். சிரித்துக்கொண்டே செங்காளியப்பன் மாநாட்டை திறந்து வைத்தார்.

 

சிவாஜி மேடைக்கு வந்ததும் படு பவ்யமாக கூட்டத்தை பார்த்து குனிந்து ஒரு வணக்கம் போட்டார். சந்தன கலர் பேண்ட் ஜிப்பாவில் சிவாஜியை பார்த்ததும், நேரு கலையரங்கில் கூடி இருந்த சுமார் 5000 பேர் எழுந்து நின்று கைதட்டி ஆரவாரக் கூச்சலிட்டனர். விசில் சத்தம் காதை பிளந்தது. பெண்கள் கூட்டத்துக்கும் பஞ்சமில்லை.

 

ஒவ்வொருத்தராய் பேச ஆரம்பித்தார்கள். பேச்சாளர்கள் கன்னடம், தெலுங்கு, ஆங்கிலம் என எந்த மொழியில் பேசினாலும், சிவாஜி பெயரை உச்சரித்தாலும்,விசில்தான். இரண்டு நாட்களாக இல்லாத போலீஸ், இப்போது மெஷின்கன், ஸ்டென் கன்.. என டிசைன் டிசைனாக துப்பாக்கிகளுடன் நின்று கொண்டிருந்தார்கள். 

 

பந்தோபஸ்து கேட்டால் தரமாட்டார்கள் என்று இவர்களே மொட்டைக் கடிதம் போட்டு பந்தோபஸ்து பெற்று விட்டார்கள் என்று ஒரு கதர்சட்டை நம்மிடம் கிசுகிசுத்தது. 'மொட்டை பெட்டிஷன் போடுபவன் சேலம் போலீஸுக்குதானே போட வேண்டும்! திருச்சிக்கு ஏன் போடவேண்டும்'.

 

மேடையிலே இருந்த சிவாஜி மிகவும் சோர்வுடன் காணப்பட்டார். அடிக்கடி எழுந்து சென்று முகத்தைக் கழுவி கொண்டும், இளநீர் குடித்துக் கொண்டும் இருந்தார். நாம் முன்பே குறிப்பிட்ட, சிவாஜியின் மீசைக்கார 'எஸ்கார்ட்' ஜிப்பாவேஷ்டியில் கால்களை கட்டிக்கொண்டு சிவாஜியின் சேருக்கு பின் தரையில் உட்கார்ந்து கொண்டு, சிவாஜியின் ஒவ்வொரு அசைவையும் கவனித்துக் கொண்டிருந்தார்.

 

மண்டல் கமிஷனை கொண்டு வந்த வி.பி.சிங்குக்கு பாராட்டு, சந்திரசேகருக்கு திட்டு, திமுக அரசு கலைக்கப்பட்டதற்கு கண்டனம் உட்பட ஏழு தீர்மானங்களை தஞ்சை ராமமூர்த்தி, ராஜசேகரன், தளபதி சண்முகம், வி.ஜி.செல்லப்பா, ஆறுமுகசாமி, டைரக்டர் நேதாஜி முதலானோர் முன்மொழிந்தனர். 

 

சரியாக 12.15 மணிக்கு பெங்களூரில் இருந்து கார் மூலம் வி.பி.சிங் சேலம் வந்தார்.அவருடன் இரா.செழியன், இராமகிருஷ்ண ஹெக்டே,எஸ்.ஆர்.பொம்மை ஆகியோர் வந்தார்கள். 

 

இரண்டு கார்கள் பின்னால் வர வெரி-சிம்பிளாக வந்தார் வி.பி.சிங். அவருக்காக ஒதுக்கப்பட்ட தனிவழியில் வராமல், தொண்டர்கள் கூட்டத்தில் புகுந்தே வந்தார். வி.பி.சிங். வந்ததும் சிவாஜிக்கு இணையான வரவேற்பு அவருக்கும் கிடைத்தது.

 

மேடைக்கு வந்ததும் தன் வழக்கமான ஸ்டைலில் பொம்மை, சிவாஜி இருவரது கைகளையும் உயரே தூக்கிப் பிடித்துக் கொண்டு கைகளை ஆட்ட, தொண்டர்கள் எழுந்து நின்று டான்ஸ் ஆட ஆரம்பித்தனர்.

 

பிறகு இரா.செழியன் மண்டல் கமிஷன் பற்றி எழுதிய புத்தகத்தை வி.பி.சிங் வெளியிட சிவாஜி பெற்றுக் கொண்டார்.

 

தலைமை உரை ஆற்ற சிவாஜி மைக் முன்னால் வந்தார். 

 

ஆரவாரம் அடங்க இரண்டு நிமிடம் கொடுத்து விட்டு தன் வழக்கமான பாணியில் பேச ஆரம்பித்தார். சிவாஜி பேச ஆரம்பித்ததும் ராஜசேகரன் அவருக்கு பின்னால் வந்து நின்று கொண்டார். ஒவ்வொரு மாநில தலைவரின் பெயரையும் சொல்ல சிவாஜி தடுமாறியபோது ராஜசேகரன் எடுத்துக் கொடுத்தார்.

 

ஞாபக மறதியாக சிவாஜி தமிழ்நாட்டுதலைவர் ...என்று கூற, ராஜசேகரன் 'அண்ணே... அது நீங்கதாண்ணே' என்று கூற, "ஓ..அது நான்தானா? அது ஒண்ணுமில்லை... தொண்டனாவே இருந்து நமக்கு பழக்கமாயிடுச்சு, அதனால நான் தலைவரானது மறந்து போயிடுச்சு. காங்கிரசில அன்னைக்கு காமராஜ் தொண்டன்னு சொன்னேன்...கடைசி வரைக்கும் தொண்டனாவே வச்சிருந்துட்டாங்க. தொண்டனா இருந்தப்ப பொருளையும் திராணியையும் செலவழிச்சோம். இப்ப தலைவனா ஆனப்ப ரெண்டும் இல்லையே அய்யா!... இரண்டுமே இல்லையே. நம்ம இயக்கத்துக்கு கிருஷ்ண பரமாத்மா வி.பி.சிங்தான். என்னைப் பத்தி சொல்லனும்னா நான் அர்ஜுனன். அர்ஜூனனுக்கு கிருஷ்ண பரமாத்மாவின் ஆசி எப்போதுமே உண்டு. அதனால என்னைய தலைவரா ஆக்கிட்டாங்க. தலைவர் ரோலை நான் நல்லா ஆக்ட் பண்ண வேண்டாமா? 'பண்றேனோ..இல்லையோ' நான் நல்லா நடிப்பேன்னுதானே நீங்க எல்லோரும் வந்திருக்கீங்க?"(அவருக்கே புரிந்து விட்டது போலும்)

 

சிவாஜி பேசி முடிந்ததும் கூட்டம் களைந்து விடும் என்று எதிர்பார்த்தனர். ஆனால் பெண்கள் உட்பட ஒருவர் கூட எழுந்து போகவில்லை.  

 

அடுத்து பேசிய ஜனார்த்தன ரெட்டி, ''சிவாஜி தமிழக முதல்வராக வர வேண்டும்'' என்றார்.

 

தொடர்ந்து பேச வந்த பொம்மைக்கு ஏகப்பட்ட வரவேற்பு. வரும் பாராளுமன்ற தேர்தலில் ஜனதாதளம் தனித்து 360  இடங்களில் போட்டியிடுகிறது. பா.ஜ.க.வுடனோ, சந்திர சேகருடனோ கூட்டு கிடையாது.தென்னகம் 67ல் இருந்து காங்கிரசை காப்பாற்றி வருகிறது. இம்முறை நீங்கள் அதைக் குழி தோண்டி புதைக்க வேண்டும்.

 

திருமதி.ஜெயலலிதா என்ன கொள்கையில் இருக்கிறார் என்று தெரியவில்லை.(உடனே தொண்டர்கள் திருமதி இல்லை என்று சத்தம்போட்டனர்). ஸாரி... குமாரி, ஸாரி... செல்வி என்று திருத்தி கொண்டார். நான் ஜெயலலிதாவை மரியாதைக்குரியவராக நினைக்கவில்லை. அவருக்கு நோக்கங்கள் இல்லை. மண்டல் கமிஷனின் எதிரி அவர்.

 

'கருணாநிதிக்கு ஓன்று சொல்லிக் கொள்வேன்.வி.பி.சிங் அலையின் அளவைப் புரிந்து கொண்டு எங்களுக்கு நியாயமான இட ஒதுக்கீடு கொடுக்க வேண்டும்' என்று கோரிக்கை கலந்த எச்சரிக்கை விடுத்தார்.

 

அடுத்து பேச வந்த ஹெக்டேவுக்கும் ஏக வரவேற்பு. பெங்களூரில் இருந்து வந்த ஒரு குரூப், ''ஹெக்டே வாழ்க'' என்று கோஷமிட்டு கொண்டிருந்தது. ஹெக்டேவும், 'ஜனதா தள வலிமையை புரிந்துகொள்ள வேண்டும்' என்று கருணாநிதிக்கு எச்சரிக்கை விடுத்தார்.

 

அடுத்து வி.பி.சிங் பேச வந்தார்.அதுவரைக்கும் எங்கேயோ தலைமறைவாய் இருந்த பாண்டிச்சேரி முன்னாள் அமைச்சர் பெத்தபெருமாள் மேடையில் தோன்றி பொன்னாடை வாங்கிக் கொண்டு காணாமல் போனார்.

 

வி.பி.சிங் பேசுவதற்கு முன் ராஜசேகரனை ஆசிரியராக கொண்ட 'மக்கள் எழுச்சி' என்ற பத்திரிகையை வெளியிட்டார். 

 

தனது வழக்கமான பாணியில் பேச ஆரம்பித்த சிங், பந்தயம் கட்டி செருப்படி வாங்கி, நூறு ரூபாயையும் இழந்தவனோடு சந்திரசேகரை ஒப்பிட்டுப் பேசி, மண்டல் கமிஷனை அமல்படுத்தியதால் பா.ஜ.கவும்,காங்கிரஸும் சேர்ந்து தனது அரசை கவிழ்த்துவிட்டதாக குற்றம் சாட்டினார். அத்வானி தனிப்பட்ட முறையில் இதனால் லாபம் அடைந்தும் விட்டார்'' என்றார். வி.பி.சிங் பேசி முடிக்கும் வரை கூட்டம் கொஞ்சம் கூட கலையவில்லை.

 

மதியம் 2 மணிக்கு தொடங்க இருந்த ஊர்வலம் மாலை 5.45 மணிக்கு அம்மாபேட்டை காமராஜர் வளைவில் இருந்து தொடங்கியது. சேலம் டவுன் ஸ்டேஷன் அருகில் போடப்பட்டிருந்த மேடைக்கு மாலை 5.45 க்கு, சிவாஜி, வி.பி.சிங்,பொம்மை ஆகியோர் வந்தனர். 

 

ஊர்வலத்தில் ஜனதாதள தொண்டர்களைவிட கரைவேட்டி கட்டியிருந்த திமுக தொண்டர்களை அதிகம் காண முடிந்தது. சரியான ஏற்பாடு இல்லாததால் நான்கைந்து பேராக வந்து கொண்டிருக்க, சுமார் 25ஆயிரம் பேர் கொண்ட ஊர்வலம் போஸ் திடலை அடைய நேரமானது.

 

மேடையில் இருந்த சிவாஜியை பக்கவாட்டில் இருந்த பெண்கள் அழைக்கவே, குனிந்து அவர்களுடன் பேசிய சிவாஜியின் கையை பெண்கள் சட்டென்று பிடிக்க, கையை விடுவித்து கொள்வதற்கு சிவாஜி படாதபாடுபட்டு விட்டார். விடுவித்த கையை வலி தாங்காமல் நெடுநேரம் தடவிக் கொண்டிருந்தார். தொடர்ந்து நின்றுகொண்டு இருக்க முடியாமல் சேரில் உட்கார்ந்து விட்டார். தொண்டர்களை நோக்கி கையை ஆட்டி வலி கண்ட வி.பி.சிங், பொம்மை, ஹெக்டே ஆகியோரும் உட்கார்ந்து விட்டனர்.

 

ஹெக்டே மட்டும் லெப்ட், ரைட் என்று கைகளை ஆட்டிக் கொண்டிருந்தார். திடீரென,இரா.செழியன் வெள்ளை பேண்ட்..,பச்சை ,வெள்ளை என டபுள் கலரில் சட்டை, சட்டையில் சக்கர சின்னம் என பபூன் வேசத்தில் பாதி ஊர்வலத்தில் கொடி பிடித்துக் கொண்டு வந்து, மேடை வந்தவுடன் ஊர்வலத்தை விட்டுவிட்டு மேடைக்கு தாவிவிட்டார்.

 

உடல் முழுவதும் வி.பி.சிங் பேட்ஜை அலகு குத்திக் கொண்டு வந்த தொண்டரைப் பார்த்ததும் அருகில் கூப்பிட்டு விசாரித்தார் வி.பி.சிங். ஆறடி உயர சக்கர சின்னம் மலர்களால் அலங்கரிக்கப்பட்டு கொண்டு வந்த போதும்,பாபர் மசூதியை அத்வானி இடிப்பது போலவும், அதை வி.பி.சிங் தடுப்பது போலவும் செய்து வேனில் கொண்டுவரப்பட்ட 'செட்டப்' பொம்மைகளையும் பார்த்து வி.பி.சிங் கைதட்டி மகிழ்ந்தார். கோஷங்கள் ஆங்காங்கே திமுகவினர் எழுப்பியதைத் தவிர மற்றவை நாகரீகமாகவே இருந்தன.

 

ஊர்வலம் முடிந்ததும் 8.30மணிக்கு மாநாட்டு திடலான போஸ் மைதானத்துக்கு தலைவர்கள் வந்தனர். 11-மணி வரை கூட்டம் நடந்தது. மதியம் பேசியதையே அனைவரும் 'ரிபீட்' செய்தனர்.  

 

நேரு கலையரங்கத்தின் மேற்கூரை மேல் சக்கரம் சுத்துவதுபோல சீரியல் செட் போட்டிருந்தனர்.மேடைக்கு எதிர்ப்புறம் சர்ச்,மசூதி,கோபுரம் சீரியல் செட்டிங்குக்கு நடுவில் வி.பி.சிங்,காமராஜர்,சிவாஜி கட்-அவுட்கள் வைக்கப் பட்டிருந்தன.மேடையும் பச்சைத் துணியில் சக்கரம் சின்னத்துடன் அலங்கரிக்கப்பட்டிருந்தது.

 

'எப்படியோ நாங்க உங்களை காப்பாத்திட்டோம்' என்று மார்தட்டிக் கொண்டிருந்தார் ஒரு உடன்பிறப்பு. அது உண்மைதான்.மாநாட்டு திடலில் கொள்கைப் பாடலை பாடிக் கொண்டிருந்த கலைக் குழுவினருக்கு, நீண்ட நேரம் கழித்து திமுக கவுன்சிலர் ஒருவர் ஐந்து ரூபாய் அன்பளிப்பு தர....அவர், 'நமக்கு எல்லாத்துக்கும் திமுக காரன்தான் தேவைப்படுறான்...அன்பளிப்பு விசயத்தில் கூட' என்று நொந்து கொண்டார்.

 

''மாநாடு வெற்றி'' என்று போகும்போது வி.பி.சிங் சொன்னாலும் வெற்றியில் பாதியை அவர் திமுகவினருக்கு பங்கு கொடுக்க கடமைப்பட்டுள்ளார்.

 

வந்திருந்த கூட்டத்தில் முக்காலே மூணு வீசம் சிவாஜி மன்றத்தினர்தான். பிள்ளைகள் இம்முறையும் "சிவாஜிதான் ஜனதாதளம்: ஜனதாதளம்தான் சிவாஜி" என்று நிரூபித்து விட்டதைக் கண்டு அவர் பெருமைப்பட்டுக் கொள்ளலாம்.