சீனு ராமசாமி, விஜய் சேதுபதி கூட்டணியில் மூன்றாவது முறையாக வெளியாகியுள்ள படம் 'மாமனிதன்'. முதல் முறையாக இளையராஜாவும் - யுவன் ஷங்கர் ராஜாவும் இணைந்து இசையமைத்துள்ள இப்படத்தை 'ஒய்.எஸ்.ஆர் ஃபில்ம்ஸ்' நிறுவனம் சார்பாக யுவன் ஷங்கர் ராஜா தயாரித்துள்ளார். ரிலீஸ் தேதியில் பலமுறை மாற்றம் செய்யப்பட்டு தற்போது வெளியாகியிருக்கும் இப்படத்திற்கு பாசிட்டிவ் விமர்சனங்கள் வந்து கொண்டிருக்கிறது. ரசிகர்கள் மற்றும் திரைபிரபலங்கள் பலரும் தங்களது வாழ்த்துக்களை சமூக வலைதளப்பக்கத்தில் தெரிவித்து வருகின்றனர். சமீபத்தில் கூட இயக்குநர் ஷங்கர், ரஜினி உள்ளிட்ட பலரும் படத்தை பாராட்டி இருந்தனர்.
அந்த வகையில் இயக்குநர் மிஷ்கின் தற்போது 'மாமனிதன்' படத்தை பார்த்து பாராட்டியுள்ளார். இது தொடர்பான ட்விட்டர் பதிவில், "எல்லா சாமானியர்களின் வாழ்க்கையிலும் விதி என்னும் சூறாவளி அவ்வப்போது வாழ்க்கையை உடைத்துப் போடுகிறது. மிக எளிமையாக எடுக்கப்பட்ட ஒரு அன்பு சித்திரம். இந்தப்படம் என் சிந்தனைகளை மேம்படுத்துகிறது. என் வாழ்க்கையை அர்த்தப்பட வைக்கிறது. மசாலா படங்களுக்கும் பம்மாத்துப் படங்களுக்கும் நடுவே ஒரு மேன்மையான படத்தை தந்த சீனு ராமசாமிக்கு என் மனதின் ஆழத்தில் இருந்து நன்றிகள் " என குறிப்பிட்டு படக்குழுவினரை பாராட்டியுள்ளார்.
மிஷ்கினின் இந்த பாராட்டிற்கு சீனுராமசாமி, " இயக்குனர் மிஸ்கின் உங்கள் வாழ்த்துகள் ராதாகிருஷ்ணன் சாவித்திரி தம்பதிகளின் வீட்டின் மீது ஒளிரும் முழுநிலவு. எனதன்பு முத்தங்கள்" என தனது ட்விட்டர் பக்கத்தில் குறிப்பிட்டுள்ளார்.
