ரஜினி நடிப்பில் பி.வாசு இயக்கத்தில் 2005-ஆம் ஆண்டு வெளியாகி மாபெரும் வெற்றி பெற்ற படம் 'சந்திரமுகி'. அதன் பின்பு 17 வருடங்கள் கழித்து இப்படத்தின் இரண்டாம் பாகம் 'சந்திரமுகி 2' தற்போது பிரமாண்டமாக உருவாகிறது. இப்படத்தை முதல் பாகத்தை இயக்கிய பி.வாசுவே இயக்குகிறார். முதன்மை கதாபாத்திரத்தில் ராகவா லாரன்ஸ் நடிக்க முக்கிய கதாபாத்திரத்தில் வடிவேலு நடிக்கிறார். லைகா நிறுவனம் தயாரிக்கும் இப்படத்திற்கு எம்.எம் கீரவாணி இசையமைக்கிறார். இதற்கான அதிகாரப்பூர்வ அறிவிப்பு சமீபத்தில் வெளியானது.
இந்நிலையில் 'சந்திரமுகி 2' படத்தில் லட்சுமி மேனன் முக்கிய கதாபாத்திரத்தில் நடிக்கவுள்ளதாக தகவல் வெளியாகியுள்ளது. ஏற்கனவே அந்த முக்கிய கதாபாத்திரத்தில் த்ரிஷா நடிக்கவுள்ளார் எனத் தகவல் வெளியானது. ஆனால் சில காரணங்களால் த்ரிஷா நடிக்க மறுத்ததாகவும் அதனால் தற்போது லட்சுமி மேனனிடம் படக்குழு பேச்சுவார்த்தை நடத்தி வருவதாகவும் கூறப்படுகிறது. மேலும் இப்படத்தின் படப்பிடிப்பு மைசூரில் வருகிற 15-ஆம் தேதி முதல் தொடங்கி தொடர்ந்து 30 நாட்கள் நடத்த படக்குழு திட்டமிட்டுள்ளதாக சினிமா வட்டாரங்கள் தெரிவிக்கின்றனர்.
