கொத்தமங்கலம் சிதம்பரவிடுதி கிராம மக்கள் அரசு பள்ளி மாணவர்கள் சென்று வர கிராம மக்கள், இளைஞர்கள் வேன் வாங்கி பள்ளிக்கு வழங்கியுள்ள நெகிழ்ச்சி சம்பவம் நடந்தது.

அரசு தொடக்கப்பள்ளி :
    புதுக்கோட்டை மாவட்டம் கீரமங்கலம் அருகில் உள்ள கொத்தமங்கலம் சிதம்பரவிடுதி கிராமத்தில் 1973 ம் ஆண்டு தொடங்கப்பட்ட ஊராட்சி ஒன்றிய தொடக்கப்பள்ளி உள்ளது. இந்த பள்ளியில் படித்த 3 பேர் மருத்துவர்களாகவும், பலர் பொறியாளர்கள், ஆசிரியர்கள், பல துறை அதிகாரிகள், தனியார் நிறுவன ஊழியர்களாக உள்ளனர். கடந்த சில ஆண்டுகளாக பள்ளியில் மாணவர்களின் எண்ணிக்கை படிப்படியாக உயர்ந்துள்ள நிலையில் பள்ளிக்கு அரசு ஆசிரியர்கள் 4 பேருடன் கூடுதலாக பெற்றோர் ஆசிரியர் கழகத்தின் சார்பில் சிறப்பு ஆசிரியர்கள், 5 கனிணி, போன்ற வசதிகளும் உள்ளது. இந்த பள்ளி மாணவர்கள் படிப்பு முட்டுமின்றி அறிவியல் ஆய்வுகள், விளையாட்டு போட்டிகளிலும் மாநில அளவில் சாதித்து வருகின்றனர்.

பள்ளிக்கு வேன் :  
    இந்த நிலையில் சிதம்பரவிடுதி பகுதியில் இருந்து சுமார் 50 மாணவ, மாணவிகள் பல ஊர்களிலும் உள்ள தனியார் பள்ளிகளுக்கும் வேன்கள் மூலம் சென்று வருகின்றனர். அதனால் அரசு பள்ளிக்கு மாணவர்களை அழைத்து வரவும் அரசு பள்ளியை தரம் உயர்த்தவும் திட்டமிட்ட முன்னால் மாணவர்கள், பெற்றோர் ஆசிரியர் கழகம், கிராம மக்கள் இணைந்து பள்ளிக்கு பல்வேறு நலத்திட்டங்களை வழங்கியதுடன் தற்போது தனியார் பள்ளி மாணவ, மாணவிகள் போல அரசு பள்ளி மாணவ, மாணவிகளும்  பள்ளிக்கும், வீட்டுக்கு சென்று வர கிராம மக்கள், முன்னால் மாணவர்கள், வெளிநாடு வாழ் இளைஞர்கள் இணைந்து வேன் வாங்கி கொடுத்துள்ளனர்.

    இந்த நிலையில் பள்ளியில் நடந்த விழாவில் மாவட்ட தொடக்க கல்வி அலுவலர் குணசேகரனிடம் பொதுமக்கள் வேன் சாவியை வழங்கினார்கள். அதிகாரி பள்ளி தலைமை ஆசிரியர் சந்திராவிடம் வேன் சாவியை வழங்கினார். 

சைக்கிள்கள் வழங்கினார்கள் :
    வேன் வழங்கியது குறித்து முன்னால் மாணவர்கள் துரைராசு, சுரேஷ் ஆகியோர் கூறும் போது.. இந்த பள்ளி 1973 ம் ஆண்டு தொடங்கப்பட்டது. இந்த பள்ளி வளர்ச்சிக்காக முன்னால் மாணவர்கள், கிராம மக்கள் இணைந்து பல்வேறு குழுக்கள் அமைத்து கண்காணித்து வந்தோம். அப்போது தான் மாணவர்களின் பெற்றோர்கள் ஆங்கில மோகத்தால் தான் தனியார் பள்ளிக்கு குழந்தைகளை அனுப்புகிறார்கள் என்பது தெரிய வந்தது. அதனால் 5 கணினிகள் வாங்கி வகுப்பறையில் வைத்தோம். தொடர்ந்து கணினி க்கு சிறப்பு ஆசிரியர், ஆங்கிலம் கற்பிக்க தனி ஆசிரியர் என்று 3 ஆசிரியர்களை பெற்றோர் ஆசிரியர் கழகம் சார்பில் நியமித்து வகுப்புகள் நடத்தப்படுகிறது.

    அதன் பிறகு பலரும் இப்பகுதியில் இருந்து தனியார் பள்ளிக்கு வேனில் ஏறிச் செல்வதை ஏக்கத்துடன் அரசு பள்ளி மாணவர்கள் பார்த்து கொண்டே வந்தார்கள். அதனால் அவர்களின் ஏக்கத்தை போக்கவும் அரசு பள்ளிக்கு மாணவர்களை கொண்டு வரவும் பலருடை உதவியுடன் பள்ளிக்கு வேன் வாங்கி வழங்கினோம். ஓவ்வொரு நாளும் 3 கி.மீ சுற்றளவில் உள்ள அனைத்து மாணவ, மாணவிகளையும் இந்த வேனில் ஏற்றி வந்து பள்ளியில் விடுவதும், மாலை வீட்டிற்கு அழைத்துச் செல்லவும் திட்டமிடப்பட்டு அதற்கென தனி ஓட்டுநர் நியமிக்கப்பட்டு அவருக்காண சம்பளம், எரிபொருளை கிராம மக்களே வழங்க திட்டமிட்டுள்ளோம். மேலும் அரசு பள்ளி மாணவர்களை ஊக்கப்படுத்த மாணவர்களுக்கு இலவச சைக்கிள் வழங்கும் திட்டத்தை அறிமுகப்படுத்தியுள்ளோம். அதாவது கடந்த ஒராண்டில் பாடங்களில் சிறப்பிடம் பெற்ற மாணவர்கள், வருகை பதிவு, அந்த மாணவர்களின் பெற்றோர் ஒவ்வொரு பெற்றோர் ஆசிரியர் கழக் கூட்டத்திலும் கலந்து கொள்கிறாரா என்பதை ஆய்வு செய்து மாணவர்கள் தேர்வு செய்யப்பட்டு இந்த ஆண்டு ஒன்று முதல் 5 ம் வகுப்பு வரை 19 மாணவ, மாணவிகளுக்கு சைக்கிள் வழங்கி உள்ளோம் என்றனர்.

ஆசிரியர்கள் :
    இது குறித்து பள்ளி தலைமை ஆசிரியர் சந்திரா மற்றும் ஆசிரியர் அருண் ஆகியோர் கூறும் போது.. மாணவர்கள் மீது பெற்றோர்கள் இளைஞர்கள், கல்விப்புரவலர்கள், மிகுந்த அக்கரை செலுத்துவதால் அனைத்து உதவிகளையும் உபகரணங்களையும் அவர்களே செய்து கொடுக்கிறார்கள். அதனால் எங்கள் பள்ளியில் படித்த மாணவர்கள் மேல் படிப்புகளில் சாதித்து வருகின்றனர். மேலும் விளையாட்டிலும் தொடர்ந்து சாதிக்கிறார்கள். தற்போது இலவச சைக்கிள், வேன் வழங்கி இருப்பது மாணவர்களை மேலும் ஊக்கப்படுத்தும். மேலும் கடந்த 10 ஆண்டுகளாக அரசு பள்ளி மாணவர்கள் டைரி எழுதப்படுகிறது. பெற்றோர்களின் ஊக்கம் அடுத்த ஆண்டுகளில் மேலும் நிறைய மாணவர்களை சேர்க்க பெற்றோர்கள் ஆவலாக உள்ளனர் என்றனர். 

    அரசு பள்ளியை தரம் உயர்த்த அரசு உதவியை மட்டும் எதிர்பார்த்து காத்திருக்காமல் கிராம மக்களே தனியார் பள்ளிக்கு இணையாக செயல்படுத்தி வருவது பாராட்டத்தக்கது என்றார் மாவட்ட தொடக்கக்கல்வி அலுவலர் குணசேகரன்.

- பகத்சிங்