Skip to main content

குண்டர் சட்டத்தில் வேல்முருகனை கைது செய்ய எடப்பாடி அரசு திட்டம்?

Published on 15/03/2019 | Edited on 15/03/2019


                 
கடுமையான குடல் வலி பிரச்சனைகளால் சென்னை காவேரி மருத்துவமனையில் அட்மிட் ஆகியிருக்கிறார் தமிழக வாழ்வுரிமைக் கட்சி தலைவர் வேல்முருகன். பல்வேறு அரசியல் கட்சிகளின் தலைவர்களும் அவரை சந்தித்து உடல்நலம் விசாரித்துவிட்டு செல்கின்றனர்.
 

இந்த நிலையில், பழைய வழக்குகளில் அவரை கைது செய்து குண்டர் சட்டத்தில் சிறையில் தள்ள எடப்பாடி அரசு திட்டமிட்டிருப்பதாக தகவல்கள் கசிகின்றன! 

 

velmurugan




இது குறித்து நம்மிடம் பேசிய தமிழக வாழ்வுரிமைக் கட்சி நிர்வாகிகள், ‘’வன்னியர் தலைவர்களை ஒடுக்குவதில் முந்தைய ஜெயலலிதா அரசைப் போலவே தற்போதைய எடப்பாடி அரசும் திட்டமிடுகிறது. திமுகவின் மூத்த தலைவராகவும் சேலம் மாவட்டத்தில் அசைக்க முடியாத சக்தியாகவும் இருந்த வன்னியர் சமூகத்தைச் சேர்ந்த வீரபாண்டி ஆறுமுகத்தை கைது செய்து சிறையில் அடைத்தார் ஜெயலலிதா. 
 

          சிறையில் அவர் அனுபவித்த கொடுமைகள் அதிகம். முறையான உணவுகள் கூட அவருக்கு அப்போது வழங்கப்படவில்லை என தகவல்கள் வந்தன. சிறையில் இருந்து வெளியே வந்த வீரபாண்டியாரின் உடல் நலம் தேறவே இல்லை. உடல் நலிவுற்று ஒரு கட்டத்தில் மரணமடைந்தார். அதேபோல, வன்னியர் சங்கத்தலைவர் காடுவெட்டி குருவை கைது செய்து சிறையில் அடைத்தார் ஜெயலலிதா. சிறையிலிருந்து வெளியே வந்த குருவின் உடல்நலம் பாதிக்கப்பட்டது. உடல்நிலை தேறவே இல்லை. அவரும் சமீபத்தில் இறந்து போனார். 
 

         அதேபோல, ஸ்டெர்லைட் பிரச்சனைக்கு எதிராக அனைத்து அரசியல் கட்சிகளும், பல்வேறு அமைப்புகளும் போராட்டம் நடத்திய நிலையில், வன்னியர் இளைஞர்களின் நம்பிக்கையைப் பெற்ற வேல்முருகனை மட்டும் கைது செய்து சிறையில் அடைத்தது தற்போதைய எடப்பாடி அரசு. 

 

சிறையில் இருந்த ஒரு மாதமும் கொடுமையை அனுபவித்தார். அடிப்படை வசதிகள் கூட அவருக்கு மறுக்கப்பட்டன. சரியான உணவுகள் தரப்படவில்லை. இதை எதிர்த்து உண்ணாவிரதம் போராட்டத்தை வேல்முருகன் நடத்திய போதும், அவரது கோரிக்கைகளை நிறைவேற்றாமல் கொடுமைப்படுத்தினர். 



சிறையில் கொடுத்த உணவுகள் ஒத்துக்கொள்ளாமல் பலமுறை வாந்தி எடுத்தார் வேல்முருகன். அப்போதும் கூட சரியான உணவு வழங்கப்படவில்லை. சட்டப் போராட்டங்கள் நடத்தி சிறையிலிருந்து வெளியே வந்தார் வேல்முருகன். அன்றிலிருந்தே குடல் ரீதியான பல பிரச்சனைகள் ஏற்பட்டு தொடர்ந்து மருத்துவமனைக்கு அலைந்து கொண்டிருந்த அவர், தற்போது மருத்துவமனையில் அட்மிட்டாகும் சூழல் வந்து விட்டது. 

 

            அதிமுக கூட்டணியில் பாமக இணைந்திருப்பதால் வட தமிழகத்தில் அக்கூட்டணிக்கு எதிராக தேர்தல் பிரச்சாரத்தை முன்னெடுக்க திட்டமிட்டிருக்கிறார் வேல்முருகன். அதேபோல, காடுவெட்டி குருவின் குடும்பத்தினர், பாமகவுக்கும் அதிமுகவுக்கும் எதிராக களமிறங்கும் நோக்கத்தில் வேல்முருகனோடு இணைந்துள்ளனர். வேல்முருகனும் அக்குடும்பத்தினர் மூலம் அதிமுக-பாமகவுக்கு எதிரான தேர்தல் பணிகளை தமிழக வாழ்வுரிமைக் கட்சி மூலம் முன்னெடுக்கும் ஆலோசனைகளை நடத்தி வருகிறார். வேல்முருகனின் இத்தகையை திட்டமிடல்கள் வட தமிழகத்தில் பெரும் தோல்வியை அதிமுக – பாமக கூட்டணி சந்திக்கும்.

 

இதனை அறிந்துள்ள ஆட்சியாளர்கள், வேல்முருகனை தேர்தல் களத்தில் இறங்க விடாமல் தடுக்க, பழைய வழக்கு ஒன்றில் கைது செய்து அதன் வழியாக குண்டர் சட்டத்தில் சிறையில் அடைக்கவும், முந்தைய வன்னியர் தலைவர்களுக்கு ஏற்பட்ட நிலைமையை வேல்முருகனுக்கும் உருவாக்கவும் திட்டமிடுவதாக தகவல்கள் வருகின்றன‘’ என்று சுட்டிக்காட்டுகிறார்கள். 
 

 


 

சார்ந்த செய்திகள்

Next Story

5 ஓ.பி.எஸ்.கள் விவகாரம்; எடப்பாடியின் அசர வைத்த பதில்

Published on 29/03/2024 | Edited on 29/03/2024
5 OPS issue; Edappadi's shocked response

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

இந்நிலையில், மதுரையில் எடப்பாடி பழனிசாமி, முன்னாள் அமைச்சர்கள் செல்லூர் ராஜு, ஆர்.பி. உதயகுமார் மற்றும் மதுரை அதிமுக நாடாளுமன்ற வேட்பாளர் டாக்டர் சரவணன் ஆகியோர் கூட்டாகச் செய்தியாளர்களைச் சந்தித்தனர். அப்போது பேசிய எடப்பாடி பழனிசாமி, 'மதுரையில் அதிமுகதான் அமோக வெற்றி பெறும். அதிமுக கூட்டணிக்கு மக்கள் மத்தியில் மிகப்பெரிய செல்வாக்கு இருக்கிறது. இதனால் எங்கள் கூட்டணி மிகப்பெரிய வெற்றியை பெரும். அதேபோல் விளவங்கோடு இடைத்தேர்தலில் அதிமுக வெற்றி பெறும்'' என்றார்.

அப்பொழுது செய்தியாளர் ஒருவர், 'ஒரு பன்னீர்செல்வத்தை தோற்கடிக்க ஐந்து பன்னீர் செல்வங்கள் தேர்தலில் போட்டியிட்டு உள்ளார்களே' என்ற கேள்விக்கு, ''என்னங்க இது சுதந்திர நாடுங்க. பன்னீர்செல்வமும் ஒன்றுதான், நானும் ஒன்றுதான் இங்கு நிற்கின்ற வேட்பாளர் ஒன்றுதான், நீங்களும் ஒன்றுதான். எல்லாரும் சமம்தான். இது மிகப்பெரிய ஜனநாயக நாடு. இதில் இவர் பெரியவர் அவர் பெரியவர் என்று அல்ல. மக்கள் யார் பெரியவராக நினைக்கிறார்களோ அவர்கள் தான் பெரியவர். அங்கு 5 ஓ. பன்னீர் செல்வம் நிற்கிறார்கள் என்று சொல்கிறீர்கள். அப்பொழுது அவர்களெல்லாம் தகுதி இல்லாதவர்களா? அந்த வேட்பாளர்களுக்கு தகுதி இருக்கிறது என்று தேர்தலில் நிற்கிறார்கள்'' என்றார்.

ஓபிஎஸ்-ஐ அதிமுகவிலிருந்து நீக்கியது 2 கோடி தொண்டர்கள் எடுத்த முடிவு. எடப்பாடி பழனிசாமி நான் எடுத்த முடிவு அல்ல. தனிப்பட்ட முறையில் திட்டமிட்டு சிலவற்றை கற்பனையாக வெளியிடுவது தவறு. ஒட்டுமொத்தமாக அதிமுக நிர்வாகிகள், மாவட்டச் செயலாளர்கள், 2 கோடி தொண்டர்கள் எடுத்த முடிவுப்படி தான் நான் செயல்படுகிறேன். திமுக மாதிரி வெளியில் வீர வசனம் பேசவில்லை. நாங்கள் பிரதமரை எதிர்க்கிறோம் என்று வெளியில் வீர வசனம் பேசுகிறார்கள் கறுப்பு குடை பிடித்தால் அவர் கோபித்துக் கொள்வார் என்று வெள்ளைக் குடை பிடிக்கிறார்கள். அப்படிப்பட்ட தலைவர் தான் தமிழ்நாட்டில் இருக்கிறார்கள். ஓடோடி போய் தமிழ்நாட்டில் திட்டங்களை துவக்கி வைக்க மோடியை அழைக்கிறார் முதல்வர். அங்கு சரணாகதி இங்கு வீர வசனம். இதுதான் திமுகவின் இரட்டை வேடம்'' என்றார்.

Next Story

'எல்லாருமே திருடங்கதான்... சொல்லப் போனா...' - பாடலுக்கு நடனமாடியபடி வந்த சுயேச்சை வேட்பாளர்

Published on 28/03/2024 | Edited on 28/03/2024
Independent candidate danced to the song 'ellarume Thirudangathan... sollpona...'

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

நேற்று வேட்புமனு தாக்கல் முடிந்த நிலையில் இன்று மனுக்கள் பரிசீலனைக்கு எடுத்துக் கொள்ளப்பட இருக்கிறது. நேற்று முக்கிய கட்சிகளின் பிரமுகர்கள் முதல் சுயேச்சை வேட்பாளர்கள் எனப் பலர் இறுதி நாள் என்பதால் வேட்பு மனுக்களைத் தாக்கல் செய்தனர். வேட்புமனு தாக்கல் செய்ய வரும் சுயேச்சை வேட்பாளர்கள் மற்றும் அரசியல் கட்சியைச் சேர்ந்த வேட்பாளர்கள் சிலர் நூதன முறைகளில் வந்து வேட்புமனு தாக்கல் செய்வது முன்னரே பல தேர்தல்களில் நடந்துள்ளது.

தேர்தல் நேரங்களில் இதுபோன்ற நூதன சம்பவங்கள் நடைபெறுவது வழக்கம். அந்த வகையில் திண்டுக்கல்லில் வேட்புமனு தாக்கல் செய்ய வந்த சுயேச்சை வேட்பாளர் ஒருவர் 'எல்லாருமே திருடங்கதான் சொல்லப்போனால் குருடங்கதான்' என்ற பாடலை ஒலிக்கவிட்டபடி சாலையில் நடனமாடிக்கொண்டே வேட்புமனு தாக்கல் செய்ய வந்தார். இது தொடர்பான வீடியோ காட்சிகள் இணையத்தில் வைரலாகி வருகிறது.