Skip to main content

சேர்மன் பதவிக்கான மோதல் - ஆளும்கட்சி பிரமுகர்களுக்குள் அடிதடி.. காவல்துறை தடியடி..! 

Published on 20/10/2021 | Edited on 20/10/2021

 

Conflict for the post of chairman - beatings within ruling party figures .. Police beatings ..!

 

தமிழ்நாட்டில் ஊரக உள்ளாட்சித் தேர்தலில் விடுபட்ட 9 மாவட்டங்களுக்கான தேர்தல் இரண்டு கட்டங்களாக நடந்து முடிந்தது. இதில் திமுக 85 சதவீத வெற்றியும், அதிமுக 15 சதவீத வெற்றியும் பெற்றுள்ளன. வெற்றி பெற்றவர்கள் அக்டோபர் 20ஆம் தேதி வார்டு உறுப்பினர்களாக, ஊராட்சி மன்ற தலைவர்களாக, ஒன்றிய, மாவட்ட கவுன்சிலர்களாகப் பதவியேற்றுக்கொண்டனர்.

 

திருப்பத்தூர் மாவட்டம், ஆலங்காயம் ஒன்றியத்தில் பதவி ஏற்றுக்கொண்டு வெளியே வந்த கவுன்சிலர்களை ஆளும்கட்சியைச் சேர்ந்த இரண்டு குழுக்கள் இடையே கைகலப்பாகி, அது தள்ளுமுள்ளுவாகி, காவல்துறை தடியடி நடத்தி விரட்டியடித்துள்ளது.

 

ஆலங்காயம் ஒன்றியம் 18 வார்டுகளைக் கொண்டது, நடந்து முடிந்த தேர்தலில் 18 இடங்களில் திமுக 11 இடங்களிலும், அதிமுக 4 இடங்களிலும், பாமக 2 இடங்களிலும், சுயேச்சை 1 இடத்தில் வெற்றி பெற்றுள்ளனர்.

 

ஒன்றியக்குழு தலைவர் பதவிக்கு தேவையான கவுன்சிலர்கள் திமுகவில் உள்ளனர். இதனால் தலைவர் மற்றும் துணைத்தலைவர் தேர்வு திமுகவுக்கு சாதகமாகவே உள்ளது. இந்நிலையில் தலைவர் பதவிக்கு போட்டி ஏற்பட்டுள்ளது.

 

திருப்பத்தூர் மாவட்ட திமுக மாவட்ட பொறுப்பாளர் தேவராஜ் எம்.எல்.ஏ தனது மருமகள் காயத்ரி பிரபாகரனை சேர்மனாக்க முடிவு செய்தார். திமுக பொதுச்செயலாளர் துரைமுருகன் மகனும், வேலூர் எம்.பி.யுமான கதிர்ஆனந்தின் ஆதரவாளர் பாரி என்பவர் தனது மனைவியான கவுன்சிலர் சங்கீதாவை சேர்மனாக்க வேண்டுமென ஆதரவு தேடினார். திமுக கவுன்சிலர்கள், அதிமுக கவுன்சிலர்கள் இருவர், பாமக கவுன்சிலர் இருவர், சுயேச்சை ஒருவர் என 14 பேரை தன் கட்டுப்பாட்டில் கொண்டுவந்த பாரி வெளிமாவட்டம் ஒன்றில் தங்கவைத்து பாதுகாத்துள்ளார்.

 

அக்டோபர் 20 ஆம் தேதி பதவியேற்பு நிகழ்வுக்காக ஆலங்காயம் ஒன்றியக்குழு அலுவலகத்துக்கு அழைத்து வந்துள்ளார். கவுன்சிலர்களாக பதவியேற்றுக்கொண்டு கவுன்சிலர்கள் வெளியே வரும்போது, அதில் திமுக கவுன்சிலர்களை தங்கள் பக்கம் இழுக்க மா.செ. தேவராஜ் மச்சானும், ஆலங்காயம் ஒ.செவுமான அசோகன், கார்களோடு சென்றவர், தன் ஆட்களை வைத்து கவுன்சிலர்களை இழுத்துள்ளார். அதனை பாரி ஆட்கள் விடாமல் தங்கள் பக்கம் இழுத்துள்ளனர். இதனால் இருதரப்புக்கும் இடையே தள்ளுமுள்ளு, கைகலப்பு ஏற்பட்டுள்ளது. பாதுகாப்புக்கு வந்திருந்த காவல்துறை அதிகாரிகள் இருதரப்பையும் விலக்கிவிட முயல, அது முடியாமல் போய் உள்ளது. இறுதியில் காவல்துறை தடியடி நடத்தி கூட்டத்தை கலைத்துள்ளது. அந்த சந்தர்ப்பத்தில் கவுன்சிலர்கள் கார்களில் ஏற்றிக்கொண்டு சென்றுள்ளது இருதரப்பும்.

 

திமுக பாரிக்கு ஆதரவாக அதிமுக கவுன்சிலர்கள், பாமக கவுன்சிலர்கள் வெளிப்படையாக ஆதரவு தெரிவிப்பது பல தரப்பிலும் ஆச்சர்யத்தை ஏற்படுத்தியுள்ளது. இதுகுறித்து அதிமுக தரப்பில் விசாரித்தபோது, திமுக மா.செ தேவராஜ் மீதுள்ள அரசியல் ரீதியிலான பகையில் அவரது குடும்பத்தை சேர்ந்தவர்கள் சேர்மனாகக் கூடாதென முன்னாள் எம்.எல்.ஏ. சம்பத்குமார், சிட்டிங் எம்.எல்.ஏ. சதிஷ்குமார் தரப்பு தீவிரமாக வேலை செய்கிறது. அதனால் திமுகவில் சேர்மன் போட்டி ஏற்பட வெளிப்படையாக அந்த போட்டி குரூப்புக்கு ஆதரவு தெரிவிக்கிறார்கள் என்றார்கள்.

 

 

சார்ந்த செய்திகள்

Next Story

“என்ன எல்லாரும் பளபளன்னு இருக்கீங்க... ஆயிரம் ரூபாய் வந்துடுச்சா” - கதிர் ஆனந்த் பிரச்சாரம்

Published on 28/03/2024 | Edited on 28/03/2024
Kathir Anand campaign in Vellore

வேலூர் மாவட்டம் கே.வி.குப்பம் சட்டமன்றத் தொகுதிக்குட்பட்ட பரதராமி, கல்லப்பாடி, கொண்டசமுத்திரம்,  பி.கே.புரம் உள்ளிட்ட பல்வேறு இடங்களில் வேலூர் பாராளுமன்றத் தொகுதி திமுக வேட்பாளர் கதிர் ஆனந்த் பிரச்சாரம் மேற்கொண்டார்

அப்போது பேசிய கதிர் ஆனந்த், ட்ரைவர் வண்டி மேல இருக்க ஹெட் லைட் எல்லாம் ஆஃப் பண்ணுப்பா. என் மூஞ்சு தெரியமாட்டுதாம் என்று கூற, உடனடியாக ட்ரைவரும் லைட் ஆஃப் பண்ண, மக்களை பார்த்து இப்போது எனது முகம் தெளிவாக தெரிகிறதா? என்று கேட்டார். அதற்கு மக்களும் தொண்டர்களும் தெரியுது தெரியுது என்று சிரித்துக்கொண்டே கூற தனது பேச்சைத் தொடங்கினார்.

அந்த கலகலப்பு குறையாமல் இருக்க மக்களைப் பார்த்து, என்ன எல்லாரும் பல பளபளன்னு இருக்கீங்க... எல்லாம் ஃபுல்லா மேக்கப் போட்டு வந்து இருக்கீங்களா... ஃபேரன் லவ்லி, ஸ்டிக்கர் பொட்டு எல்லாம் போட்டு ஜம்முன்னு வந்திருக்கீங்களா... என்று கேட்க கூட்டத்தில் இருந்தவர்கள் சிரிக்க ஆரம்பிக்க, அதைவிட உங்க முகத்தை பார்க்கும் போது ஒரு புன்னகை, சந்தோஷம் தெரிகிறது.

நான் வந்தவுடனே சீதாராமன் கிட்ட கேட்டேன், “என்னாங்க எல்லார் மத்திலயும் ஒரு சந்தோஷம் இருக்குதே என்னா காரணம்னு கேட்டேன். அதுக்கு அவரு சொன்னாரு எல்லாருக்கும் மாசம் மாசம் ரூ. 1000 பணம் கொடுக்குறாங்களாம். அதான் எல்லாரும் ஹாப்பியா இருக்காங்களாமானு சொன்னாரு...’ என்ன உண்மையா அது? என்று பெண்களை பார்த்து கேட்க, அவர்களும் ஆம் என்று கூச்சலிட்டனர். அப்பொழுது சிலர் இன்னும் எங்களுக்கு வரவில்லை என கூறினர். அதற்கு இந்த தேர்தல் முடிந்தவுடன் அனைவருக்கும் கலைஞர் மகளிர் ஊக்கத்தொகை வழங்கப்படும் என்று  மக்களிடையே தனது கலகலப்பான பேச்சை தொடர்ந்து பிரச்சாரம் மேற்கொண்டார்.

இருப்பினும், ஃபேரன் லவ்லி போட்டீங்களா? பொட்டு வச்சீங்களா? பளபளன்னு இருக்கீங்க என கதிர் ஆனந்த் கேட்டது பெண்களிடம் முகச்சுழிப்பை ஏற்படுத்தியுள்ளது. இதனை எதிர்க்கட்சிகள், பெண்களை கொச்சைப்படுத்தி பேசுகிறார் வேட்பாளர். இது மேட்டிமைத்தனம், ஆயிரம் ரூபாய் இல்லை என்றால் பெண்கள் என்ன பொட்டு வைக்கக் கூடாதா? தங்களை அழகுபடுத்திக் கொள்ளக் கூடாதா? எனக் கேள்வி எழுப்பி விமர்சனம் செய்து வருகின்றனர்.

Next Story

கமல்ஹாசனை சந்தித்த டி.ஆர். பாலு

Published on 28/03/2024 | Edited on 28/03/2024
TR Balu met Kamal Haasan

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

நேற்று வேட்புமனு தாக்கல் முடிந்த நிலையில், இன்று வேட்புமனு பரிசீலனை நடைபெற்று வருகிறது. இந்நிலையில் திமுக கூட்டணிக்கு ஆதரவு தெரிவித்துள்ள கமல்ஹாசனின் மக்கள் நீதி மய்யம், இந்த தேர்தலில் இந்தியா கூட்டணியை ஆதரித்து தமிழகத்தில் பிரச்சாரம் செய்யும் எனக் கட்சியின் தலைவர் கமல்ஹாசன் தெரிவித்திருந்தார் .

திமுக கூட்டணியில் இடம்பெற்றுள்ள விசிக கட்சியின் தலைவர் திருமாவளவன் நடிகர் கமல்ஹாசனை நேரில் சந்தித்து தங்களுக்கு ஆதரவாகப் பிரச்சாரம் செய்ய வேண்டும் எனக் கேட்டுக் கொண்டிருந்தார். தற்போது ஸ்ரீபெரும்புதூர் திமுக நாடாளுமன்ற வேட்பாளராக அறிவிக்கப்பட்டுள்ள டி.ஆர்.பாலுவும், அமைச்சர் சேகர்பாபுவும் ஆழ்வார்பேட்டையில் உள்ள மக்கள் நீதி மய்யத்தின் தலைமை அலுவலகத்திற்குச் சென்றனர். இந்த சந்திப்பில் நடிகர் கமல்ஹாசன் தேர்தல் பிரச்சாரத்தில் பங்கேற்க வேண்டும் எனக் கோரிக்கை வைத்ததாகத் தகவல்கள் வெளியாகி உள்ளன.